¹ Djesu wakapinda mubhande, wakabhira ngombera, akaenda muguta rake. ² Hino akamundzisira mwanarume wakakhokhodhara wakawata pabhonde. Djesu paaka wona kutenda kawo, wakati kumwanarume uya kakhokhodhoka:" usatsukware, mwana! zwitema zwako zwareguererwa". ³ Wanyori amweni akareketa pachawo kuti: "Mwanarume uyu unonyepa". ⁴ Djesu waiziya ndzero dzawo uye wakati: "Nguei mwoyo wenyu ino rangarira zwakashata?. ⁵ Ndizwipi zwirinyore? kuti: " zwitema zwako zwareguererwa", pano kuti: " prumuka, uhambe"? ⁶ Kuti muzwiziye kuti mwanakomana womunhu unosimba pano panyika rokureguerera zwitema, Iyena, wakati, kuwiya wakakhokhodhara :Muka, tora bhonde rako enda kumba kako". ⁷ Mwanarume uya waka muka akaenda kumba kwake. ⁸ Mbumba iya paayakazwiwona yakashakiswa uye yakanamata Mwari, wanga akapasa simba kuanhu. ⁹ Etchi budha apona, Djesu wakawona mwanarume waidhainzwa Mateu, wanga akagara pambuto wokurongosa musoho akamuti:"Nditeere" iyena wakamuka akamuteera. ¹⁰ Djesu paanga ari panyumba imweni, wakagara pathafura etchidha kurha, ajinji anosoheressa omusoho pamwepo nowatadzi akawiya akagara pamwepo uye akarha pamwepo na Djesu nowa fundi ake. ¹¹ Wafarisi paaka zwiwona wakabvunzisa kuwafundi ake: "Ngei mufundisi wenyu unorha pamwepo nowanosoheressa misoho panwepo noatadzi?" ¹² Paakazwa izvo, Djesu wakati: "Akatamba awsvagui murapi, anorwara ndiwo anowsvaga murapi. ¹³ 13 Imwimwi maitodhikana kufundira kuthumbudzura izvi: Ndinodhisisa nyasha kudharika tchipiriso, andizi kuwiya kuzodhainza anatsi asi anozvitema. ¹⁴ Afundi aJuau akaenda kuna Djesu akati: "Ngei isusu newa fharisi tinotsanya nguwa yese, asi afundi ako aatsanyi?." ¹⁵ Djesu akati: zwinoita here kuti akadhainzwa pamutchato akatsamwa atchiri ese notchikomba? Asi pamazuwa atchauya chikomba tchitchabudha pakati pawo, atchazo tsanhya. ¹⁶ Apana unokanda tchitembwe tchiswa padjira rokare, nokuti tchinozo nyanya kubhora, kumweka kukuru kunoitika ¹⁷ Apana unokanda vinyu iswa mudzuwi rekare, ngekuti inomweka, vinhyu inosweteka. Kundza kazwo kandai vinhyu mudzuwi iswa kuti zwese dzizotchengetane. ¹⁸ Paireketa Djesu masoko aya, umwe mukuru mukuru wakauya pamberi pake kakugodhama akati:"Mwana wangu wafa, uyai mumutsanzike nyara kuti ararame". ¹⁹ Djesu wakamuka akaenda pamwepo nowafundi ake. ²⁰ Pakanga pano mwanakadzi, wanga ano gumi remakore namairi etchibudha ngazi, wakaenda sure kaDjesu akabhata matchira ake; ²¹ iyena wakazwibvunza kuti; "Ndikando bhata matchira akewo ndinothamba" ²² .Djesu wakatendeuka, pakamuwona akamuti: " Fara, mwana, kutenda kwako kakuponesa". Mwanakadzi uya waka rapwa tchiriporipotcho. ²³ Djesu paakapinda mumba momutungamiriri, mbumba hairesa; ²⁴ Iyena wakati: "Bhudhai kunza ngokuti mwana azi kufa, wakawata". Awona akamuseka zwakanyanhya ne kutswinyira. ²⁵ Apo mbumba payakabudiswa kundza, iyena wakabata mwana omussikana pamoko akamumutsa. ²⁶ Masoko awo akabharariswa muthanhewo wese. ²⁷ Apona Djesu paaka tanga kwenda mberi, mapofu mairi akamutera, etchidhainzira kuti: "Tinzwireiwo ngoni, mwana waDavidi" ²⁸ Apo Djesu pakapinda mumba, mapofu aya akawiya kwari. Djesu wakaati:" munotenda here kuti inini ndinga kwanisa kuzwiita?" Awona akati:" Honde Ishe." ²⁹ Djesu wakabhata madziso awo akati: "ngazwi itwe maererano nokutenda kwenyu". ³⁰ Madziso awo akafunungurwa. Djesu wakaa kohomedzesa:" Munowona apana unodhikana kuzwizia" ³¹ Assi anarume airi aya akaparadza masoko mumu tanhewo wese. ³² Panguwa yaienda anarume airi, mwanarume tchimumu wanga akagarwa ngoshai wakaundzuwa kuna Djesu. ³³ Panguwa yaka bviswa dimoni riya mwanarume tchimumu tchakatanga kureketa. Mbumba hakapatika:" Izwi azwisati zwamboitika kareko kuIziraeri" ³⁴ Mafariseu akati" Mukuru womadimoni urikuwadzinguira madimoni". ³⁵ Djesu wakaenda mumaguta nomutadha etchifundisa mumaSinagoga ake, paridza vangeri roumambo uwe etchirapa muchobo wese wonhenda. ³⁶ Paaka wona mbumba, wakazwira ngoni, ngokuti wanga akaremba uye anoshungu, wanga akatingana makwai asina muuchi. ³⁷ Iyena wakati kuwafundi ake:" Mundha mukuru asi asendzi akashomanika. ³⁸ Ngokudharo kumbirai Muridzi womundha, kuti atume asendzi mumundha".