¹ Paangatchireketa kuwanhu, maphirisita akauya kwaari, nowakuru wothemberi, nowaSadusi, ² Etchinyangadzwa zwikuro nokufundisa kwaaita wanhu, nokuziisa muzina raDjesu kumuka kuwakafa. ³ Akaasunga, wowakanda mukaribhoso dhkamara mangwana wakhonewo, nokuti kwanga kwadhoka. ⁴ No ajinji wakazwa soko, wakatenda; mutengo wowanarume wakaguma zwuru zwishanu. ⁵ Zwakaitika mangwana akhonewo, kuti akuru-akuru no atchenjebvu, nowatari, akaunganidzana kuJerusarema; ⁶ Kuzoti Anazi, muphirisita mukuru, na Kefasi, najuau, naArixandre, na ese angaariyo okudzinza routongi romaPirisita. ⁷ Akaakanda pakati, woabvunzisa: ''Nosimba ripi kana kuti nozina raani romakaita naro izwi?'' ⁸ Hino Peduru, wakadzarirwa noMweya Mutswene, akaati: "Akuru-akuru wewanhu, noatchenjebvu woIsraeri, ⁹ Toyobvunjiswa nyamasi nge tchibhatsiro tchaizirwa munhu murwari ne mushobho warapwa ndiwo; ¹⁰ Ngazwizikanwe kunemwi mwese, no ese anhu waIsraeri, kuti nozina raDjesu Kirisitu, muNazareta, uya wamakakhomera pam`tchinjikwa, okuti Mwari wakamupurumutsa muanyakufa, ngokudha kwake uyu wakatamba pakati penyu. ¹¹ Iri ndiro bhuwe rakanyozwa ndimwi, wawaki; ndiro rakazoitwa musoro wopakhona. ¹² Uye akuna rimweni zina rinoponesa; kana kuti akuna rimweni zina pasi podhenga, rinopuwha ku anhu, rokuponeswa naro''. ¹³ Hino awona, nokuwona kusakangaidzika kwaPeduru, na kwaJuau, nokuti angaakabvunzwa kuti azi kufunda, zwakaashamisa; iwona aizwiziya kuti anga anaDjesu. ¹⁴ Nokuwona zwekuti wakarapwa uya anga anaye, akatama tchiro tchokuwapumha. ¹⁵ Akazowabhudhisa kunza kuwatongi, akazosara etchibvunzana, ¹⁶ Etchiti: Tingaaitei anarume aya? Nokuti tirikuwona pamhene tchaitwa ndiwo, tchitchiwoneka kuwagari ese woMujerusarema, zwisingaiti kuramba. ¹⁷ Asi kuti soko iri risabhararike kuwanhu ese, ngatiyathyisidzire, kuti asasareketa kuno umwe hake muzina rimwerimwero''. ¹⁸ Paakazowadhaidza, akaabvunza kuti narini musazoreketezwe neekufundisa zwe muzina raDjesu. ¹⁹ Asi, Peduru naJuau akaadhaira: mbozwirangariraiwo kuti zinoita here pamberi paMwari, kuzwa imwimwi kupinda Mwari. ²⁰ Nokuti isusu atingarekeri kureketa zwatakawona nozwatakazwa''. ²¹ Asi awona, akaatyisidzira zwakanyanya, azii kuwona ndawa yokuwashupha, akaasiya woyenda ngondawa wowanhu. ²² Nokuti ese aikudza Mwari nozwese zwakaitika. Nokuti wanga anomakore makumi marongomuna mwanarume wanga waitirwa tchishamiso tchiya. ²³ Hino aona, paakazorekerwa, akauya adhoniawo, akaaerengera zwese zwangazwakareketwa nowakuru-wakuru owaphirisita, nowatchenjebvu. ²⁴ Hino awona, paakazwa izwi, akamuka otchitenderana no izwi raMwari, etchiti: ''Ishe, imwimwi ndimwi Mwari wakaita ndenga nonyika, bhahari, nozwese zwirimo; ²⁵ Ngo mweya mutswene kubva pamuromo wabhabha wedhu, musenzi wenyu Davidi mwakati: 'Nguei mahedeni anonyangadzwa, nowanhu anoparadza pfungwa pazwiro zwisina gwanza? ²⁶ Madzimambo enyika, akabhatana pamwepo nowanokudzwa akamukira Ishe, no mudzodzwa wenyu. ²⁷ Nokuti zwozwiro kwazwo, naHerodi, na mambo Pirato, nomahedeni pamwepo noanhu woIsraeri akamukiramwana wenyu mutswene Djesu. ²⁸ kuti aite zwese zwaanga akaronga kuita nonyara dzawo. ²⁹ Hino pano Mwari, onai bvinga rawarikuita, ipai asenzi enyu simba kuti arekete soko renyu asikatyi; ³⁰ Twasamisai moko wenyu pakurapa, nopaluita zviwoneso zwinoshamisa muzina romwana wenyu mutswene Djesu''. ³¹ Paakapedza kukumbira, pakahuta paanga akagara, ona ese akazara nomwiya mutsweni. aktanga kureketa soko raMwari nosimba. ³² Kuno ajinji aitenda anga ane mwoyo umwe, nopfungwa imwe; akuna waiti itchi tchangu pazwia zwaanga anazwo, asi zwese zwanga zwiri zwaese. ³³ Uwe nosimba guru waPhositori waipa tchapupu tchokumuka Ishe Djesu; uye paese panga pane nyasha huru. ³⁴ Panga pasina munhu aishaiwa tchiro; nokuti ese anga anomunda, peno nyumba, aitengesa, mareyo aiuya nayo kuna Aphositori. ³⁵ Hino zwaizo kuwaniswa ku ese mayererano nomunhu tchaidha. ³⁶ NaJuze, wakadhaidzwa noaPhositoriri mwana waBarinabe ( zwikathumbudzurwa ndi mwana womunyaradzo), murevi, okubharwa kuShiperi, ³⁷ Wangaano munda, wakautengesa mareyo wakauya nayo kuna aPhositori.