¹ Aporo paanga ari Kuwakorinti, zwakaitika kuti Pauro paakapinda mumbuto dzese dzakakwirira, iyena wakauya kuAEfeso, paakagumira afundi amweni ² Wakaabvunzisa: makatambira Mwiya Mutswene pamakatendeuka? Uye awona akaamubvunza: Isusu atisati takambozwa zwetchireketwa kuti kune Mwiya Mutswene. ³ Uye ieyena wakaati: Makababatidzwa kudhini? awona akamudhaira: No babatidzo raJuau. ⁴ Uye Pauro wakaati: Juau zwezwirokwazwo wakababatidza nobabatidzo rokutchinyuka, etchiti kuwanhu kuti atendendere kuna uya utchazouya sure kwake, zwaireya Djesu Kirisitu. ⁵ Paakazwa izwi, awona akababatidzwa muzina raDjesu kirisitu. ⁶ Pauro, pakaatsanzika nyara, wakauya Mwyia Mutswene pam`soro, uye aireketa nomureketero umweni, uye waiphorofita. ⁷ Uye ese anarume angaarigumi noairi. ⁸ Uye iyena, paaipinda musinagoga, waireketa asikathyi pamwedzi mitatu, etchiphikizana nokununudzira zwiro zwoUmambo waMwari. ⁹ Asi amweni paaiomesa mwoyo, awona ana kuzwitenda, etchichaisha kureketa kogwanza pamberi perujinji, uye iyena wakabhudhepo, uye waakaparadzanisa afundi, eikakawadzana tsiku dzese mutchikora tche Tirano. ¹⁰ Izwi zwakaitika kumakore mayiri, zwokutoti ese aigara kuAzia angaakazwa soko raIshe Djesu, kurewa wadjuda noagedhegi. ¹¹ Uye Mwari waaita minana isati yakambooneka nonyara dzaPauro, ¹² zwokutoti kana tchiduku nomatchira angaakapfeka aitorwa kuno airwara, uye arwere aitamba, uye nemweya yetswina yaibhudha. ¹³ Uye amweni afemberi omadjuda aherereki, akaedza kukumbira zina raIshe Djesu kune anga ano mwiya yotswina, eiti: Isusu tinomudzingirai muzina raDjesu, unoparidzwa naPauro. ¹⁴ Hino anga ari ana anomwe aSikeva, mudjuda, mukuru womaphirisita aya aitisa izvo. ¹⁵ Asi mwiya yotswina wakaadhaira: Inini indinomuzia Djesu, uye ndinoziwazwe ndiani Pauro; asi imwimwi, ndimwi ani? ¹⁶ Uye mwanarume wangaane mwiya wotswina wakaambukira, uye wakaakunda, wanga ano simba guru kupinda awona, zwokutoti aona akatiza mito, uye akakuwara kubva panyumbepo. ¹⁷ Izwi zwakazika kuno agari ese ekuwaEfeso, kubhira kuwadjuda noagidhigi, kwakaoneka kuthya kuna ese, uye nokudharo zina raIsheDjesu rakakudzwa zwikuru. ¹⁸ Uye ajinji aitendera aiuya, eipupura, eitsa patchena zwiito zwawo. ¹⁹ Wuye ajinji aita zwouroi aiuya nomabukhu, uye akaapisa pambheri pawo, wakaerenga mutengo wazwo, akawona kuti zwanga zwaiguma zwuru zwishanu zwomasiriva. ²⁰ Nokudharo soko raIshe raikura rairumbwa rinosimba guru. ²¹ Uwe pazwakadzadziswa zwiro izwi, Pauro wakaoneswa muMwiya kuti, apinde nokuMasedonia noku aKaia, aenda dhakara kuDjerusarema, eiti: Musure ndikagumeyo, ndhinozodhikana kuti ndiyende kuRoma. ²² Uye iena, paaka tuma aseenzi ake airi, kuMasedonia, Timotio naErasito, iyena wakazogara nguwa dhoko kuAzia. ²³ Asi panguwa yeneo kwakaitika bhongozozo guru ngodawa yogwanza. ²⁴ Ngokuti umweni mwanarume mupfuri womasiriva wazwi Dimitio, waigadzira zwiro zwomasiriva zwomuthemberi yaDiana, uye waipasa mare jinji kuwa apfuri amweni. ²⁵ Paakaunganidza wasenzi wakaabvunzawo zwiro hinga izwi: Amunemwi, zwamunoziwa kuti tirikubhudhirira ngobhasa iri. ²⁶ Uye zwamunowona uye nokuzwa kuti iyena Pauro, azwiri kuwaEfesopi bhasi, asi kumatii majinji wokuAsia, anoosokwerera etchitora ajinji, ecthiti asiri amwariakadhi atinopfura nonyara dzedhu. ²⁷ Uye azwisiri kutswaka kunyozeka kobhasa redhu bhasi, asi, thembere yamwari mukuru Diana aizosenzi, nokukudzwa kwake, kwaanopua kuAsia no munyika yese, uyezwe inozoputswa . ²⁸ Uye awona, paakazwa zwiro izwi, akazadzadzwa noushungo, etchikuwa eiti: ²⁹ Mukuru ndi Diana wokuwaEfeso! Guta rese rakazara nobhongozozo, uye mukutenderana awona akapinda pabhongozozopo, otora Gaio naArisitariko, woKumasdonia, atereri aPuro pakufamba. ³⁰ Uye Pauro, etchidha kuuya kuno anhu, afundi akamurambisa. ³¹ Uye atugamiriri amweni wokuAzia, shamwari dzake, akamutumira tchiziiso, etchimukumbira kuti asauye pabhongozozopo. ³² Nokudharo, amweni aikhuwa nemukhaindi wawo, amweniwo aikhuwawo nomukhaidi umweni, ngokuti rujinji ranga rakaringa zwizii zwokuita; uye anga akawanda angasikazwizii zwaakaunganira. ³³ Uye akabvisa parujinji Arixandre, waDjuda etchimukwera mberi. ³⁴ Wuye Arixandri, akakhopera no nyara yake, waidha kureketa kuwanhu. Uye pakaziwa kuti iyena wanga arimudjuda, ese akakhuwa noizwi rimwe panguwa mbiri: ''Mukuru ndi Diana okuwAifeso''. ³⁵ Wuye mutari paakanyaradza rujinji, waiti: ''Anarume woaEfezo, ndhiani usingazii kuti guta rewaEfeso ndiro rino tchengeta themberi rikuru ramwari Diana, yuwe netchipangidziro tchakambwera kubva kudhenga? ³⁶ Nokudharo izwi azwidhikanwi kurambwa, imwimwi munodhikanwua kunyarara uye musaite tzwiro zwe pfunvupfunvu. ³⁷ Aya amhu emwaunza pano aana ndawa kana ushaishi okurusisa, kana ukumisi, kana matsambo zwakaringana na mwari kadzi wenyu. ³⁸ Hino dhai Dimetirio nowatsetsi anonyaya naye, zwianze zwakafungurwa, uye panoatongi, kuti atchipumhana, umwe noumwe. ³⁹ Uye kudhai mutchitswaka zwimweni zwiro, zwitchazo gadziriswa pagungano rakatenderwa. ⁴⁰ Ngei tirikudha kupinda mundawa yokusatererera, ngukuti nyamasi isusu atina tchokureketa pabhongozozo ir''i. ⁴¹ uye paakapedza kutsa izwi wakayeneka ungano.