¹ Ndikaonererwa, apana tchandinowina ndizvo. Hino, nditcharumbwa ndeiziisa zwiwoneso nozwipangidziro zwaIshe. ² Ndinoziya mwanarume umwe muna Kirisitu, wokuti, kumakore gumi ne marongomuna adharika, wakatorwa tchikangaidzo kwenda kudhenga-- kudhai panyama kana kuti kunza kwenyama, inini andizwizii; Mwari anozwiziya. ³ Ndinozwizia kuti munhu iyena-- kudhai panyama, kana kuti kunza kwenyama, andizvizii; Mwari anozviziya-- ⁴ wakatorwa kwenda kuparadizo, uye wakazwa zwiro zwinoyera kuti munhu azwirekete. ⁵ Nomunhu iyena ndinoonererwa nae, kunza kwekutama kwangu simba. ⁶ Kudhai ndaidha kuonererwa, ndaisoitapi bhenzi ne, asi ndinonga ndeireketazviro kwazvo; asi andionererwi, kuitira kuti pasaoneke anorangaridza kupindiridza zwaanosoona kwendiri kana kuti zwaanozwa kwendiri. ⁷ Andionererwio ngozwipangidzo zwandinosoizirwa. Hino kuti ndisaite maonererwa, ndakapuwa munzwa panyama, mutumwa wasthani kuti anditiyisidzire, kuti ndisadzi tutumadze. ⁸ Ndaka kumbira kuna Mwari katatu kese pamusana pazwo, kuti andibvisirewo. ⁹ Uye Iyena wakati: "Nyasha dzangu dzinokukwanira; ngokuti masimba anowanda pakurembedzeka". Hino, zwirinani hangu kuonererwa pakuremba, kuitira kuti simba raKirisitu ri rarame mendiri. ¹⁰ Ndinozwa kudhakara nazwo pakurembedzeka, pakutukwa, pamhiyangwa, pakuteerwa no patsaona,ngopamusana paKirirsitu. Zwokuti, kudhai ndakarembedzeka, ndipo pandinonga ndakasimba. ¹¹ Ndakaita bhenzi! Ndimwi mandi bhambidzira kuita izvi, ndaidha kukudzwao nemwi. Ngokuti apana tchakandi dhodhokesa pamberi pe anozwi maphostori makuru, kunyangwe ndisiripi hangu tchiro. ¹² Zwipangidziro kwazvo zwouphostori zwakaizwa pakati penyu nousisi, zwipangidziro, minana nozwishamiso. ¹³ Hino, zwamakanga muri imwimwi musina bhasa kupinda makherekhe amweni, kuzoti inini andizi kuita mutoro kemuri kani? Ndiregerereio nokuposha kwandaita! ¹⁴ Wonai bhasi! ndapera kugadzirira kuti ndiuye kweneio ketchitatu. Andizoiti mutoro; andidhi zviro zwenyu, ndinodha imwimwi. Ngokuti azwiiti kuti ana aunganidze midzio ku madzibhabha ao, asi madzibhabha ku ana ao. ¹⁵ Nokudhakara nditchapedza nokusiya kuti muoedze zwandinazwo no mweiya yenyu. Zwandino nyanya kumudhai, munozotamao kudhiwa? ¹⁶ Nomushobho uwona, amuzoremerwi; asi, zvandiri mushukutu, ndikamusungai no manyepo. ¹⁷ Tswakadhi pane zvenyu zvandaka tora nomunhu wandakatuma? ¹⁸ Ndakakumbira Tito auye kweneio, ndotuma hama imweni iende nae pamwepo. Tito wakatora tchenyu? Isusu atizi kuhamba pa mweiya umweo? Atizi kuita muthanyu imweio? ¹⁹ Rangaridzai kuti, yese nguwa yatapedzei tanga tetchidzi vikhira pamberi penyu? Pamberi paMwari, taireketa zviro izvi zvese kuti musimbe ²⁰ Ndinotiya kuti, ndikauyeio, ndisagumire se madhiro andaidha, uye kuti musandione se madhiro amaidha. Ndinotiya kuti panozooneka kureketedzana, shanje, kuzondana, mbao, kutukana, matswedha ushukutu noushaishi. ²¹ Ndinotiya kuti, ndikagumeio, Mwari wangu anditswerudze pamberi panyu, zvokuti pamweni nditcha tchema ngopamusana pe akaita ushaishi kareko, uye aazikutchinyuka muzvakashata, pakuita useki zvinorambidzwa uye no zvimwenio zvakashata zvaai ita.