¹ Ngokuti, patakawona kuti atitchiripi kukwanisazve kugara tisina zwiziso zwenyu tagara hedhu kuAtenas. ² Isusu takatuma Timoti, hama yedhu uye mushumiri waMwari muVangeri raKirisitu, kuti tikusimbisei uye nokukunyaradzai pamusoro pokutenda kwenyu. ³ Isusu takazwiita notchidho tchokuti musatambudzike nokudha kwedhamu dzataipinda. Ngokuti munozwiziya kuti ndizwo zwatakarongerwa na Mwari. ⁴ Zwirokwazwo, patanga tiri nemwi, takaporofita kuti tichapinda mukushupika, uye izwi zwakaitika, sezwamunoziya imwimwi. ⁵ Ngondaya yeizwi, pandakaona kuti anditchakwanisi kuimira, inini ndakamutuma kuti tiziye pamusoro pokutenda kwenyu, nokuti dhakangani muedzi, wamuedzai uye bhasa redhu roita pasina. ⁶ Asi Timoti wakawhirira kwatiri nozwiziso zwakanaka zwokutenda kwenyu norudhu. Sezwakativunza iyena, imwimwi nguwa yese muno pfungwa dzakanaka pamusoro pedhu uye munodha kutiwona, sezwatinodhawo kumuwonai. ⁷ Ngondaya yazwo, hama, isusu takanyaradzwa nokudha kwekutenda kwenyu, pakutsukwara kwedhu nokushupika. ⁸ Nokuti isusu zwino tinorarama, kana imwimwi mukaramba masimba muna Ishe. ⁹ Nokuti nyasha dzingana dzitishapa Mwari ngondaya yenyu, ngokudha kwemufaro watinawo pamberi paMwari ngondaya yenyu? ¹⁰ Usiko nomasikati isusu tinonamata nosimba kuti tiwone hopedzenyu uye kuti muwone zwirikushota pakutenda kwenyu. ¹¹ Zwino iyena Mwari, Bhabha edhu, uye Ishe edhu Djesu, ngatibhatsire kuzdamara taguma kwamuri. ¹² Uye Ishe ngaku kurisei pamweya nokugara murudho amwe ne amweni uye ne anhu ese, se zwatinoitaw nemwi. ¹³ Kuti Iyena ngabhambise mwoyo dzenyu, kuitira kuti muwe atswene asina tchokupumuwa pamberi paMwari wedhu Bhabha, pakuuya kwa Ishe edhu Djesu ne atswene Awo.