¹ Ndizvo kwechioneka kuti isusu takatendenedzwa ngegore guru rembungano yakadaro yevanopupura, ngatirashe zveshe zvinodzimbira nokushaisha kunotibatirira, ngatirumbe ngokushingirira mujaho wakaemeswa pamberi pedu, ² techiningira kunaJesu, muambi nomupedzi wokugonda kwedu, uwo ngendaa yokudakara kwakaiswa pamberi pake, wakashingirira muchinjiko, asikaerengi chimene chawo, wakagara pashi ngokumudyo kwedendemaro raMwari. ³ Pinimidzai ndiye wakashingirira pachake kurwisa kwakadaro kunobva kuvashaishi vanomukira, kuti musazoremba nokuti kudemera mumweya yenyu. ⁴ Mukurwisana kwenyu nekushaisha imwimwi amusati mwarwa metsa kuguma pakubomha ngazi. ⁵ Nemwi mwakariyarwa kupotwa kunonyengerera kwakaitwa kwomuri kudai ngokuvana, “Mwana wangu, usashoora kupanga kwaMambo nokuti kudemera apo wechiororwa ndiye. ⁶ Ngokuti uwo waanoda Mamb unomuorora nekushkwapura mwana weshe waanoashira. ⁷ Shingirirai kuororwa. Mwari unomubata kudai ngevana; ngokuti uri pari mwana usikaororwi ndibaba ake? ⁸ Asi kuti musikaororwi, kudai ngevana veshe, zvino muri mibvandirimwo, amuri vana vakepi. ⁹ Ngepabanze peizvi, tainga nemadzibaba edu ngokwenyama waitiorora, nesu takavareremedza. Atingapindi kuda kudzipfaisa kwakapindisisa kukuru kunaBaba emweya kuti tipone here? ¹⁰ Ngokuti ngegwinyiso avo vakatiorora mazuva mashomani, kudai ngezvezvaioneka zvakanaka kwavari, asi unotiorora kuti tidetserwe, kuti tikoanisirane kuchena kwake. ¹¹ Kweshe kuororwa akudakadzi zvinopano, asi kunochemedza, asi ngesure kunobara michero mukunyarara yokunakaa kwavari vakadzidziswa. ¹² Ndizvo murudzai nyara dzenyu dzakarembaremba nokugwinyisa mabvi enyu asina simba, ¹³ munasire njira dzakarurama dzetsoka dzenyu, kuti icho chakaremara chisazoguduguka, asi kuti chiponeswe. ¹⁴ Tsvakai kugarisana ngokunyarara nevanhu veshe nokuita vakacheneswa, ngokuti pasina izvi apana munhu ungazoona Mambo. ¹⁵ Mwechingwarira kuti kusazoapo naumwe unokorera kuashira nyasha dzaMwari, kuti rusazoapo runzinde rwokuvava runomera, runounza kutambudza, nokubudikidza ndirwo vazhinji vaitwe vakasvipiswa. ¹⁶ Wonai kuti kusaapo naumwe wakadai ndiIsau, muombi nousikatyi Mwari, uwo wakatengesa nhaka youtangwe wake kuti apuwe tsima imwe yechokudya. ¹⁷ Ngokuti munozia kuti ngesure kwazvo, apo paakadisisa kuti agare nhaka yechipfumiso, wakarambwa, ngokuti aazi kuona nguva yokutendeuka, kunyazwi akanyaitsvakisisa

ngokuchema.

¹⁸ Ngokuti imwimwi amuzikuuya kuchiro chingagwamwa, muriro unobaka nechidima nokusvipa nomubvumo, ¹⁹ nokuridzwa kwegwama nemaungira emazwi, izwi iro maungira aro akaita kuti avo vakarizwa vakapota kuti izwi rimweni risachazoreketwa kwavari. ²⁰ Ngokuti avazi kukona kushingirira izvo zvakapangwa, “Kudai kunyazwi mhuka yaigwama mutunhu, yaizopondwa kufa ngemapuwe.” ²¹ Ngegwinyiso zvakaoneka zvechityisa yaamho, kuti Mosi wakati, “Ndinohuta kukuru ngokutya.” ²² 2 Asi imwimwi mwauya kuMutunhu weZioni nokudhorobha raMwari unopona, Jerusarema remudenga, nekuhondo dzengirosi dzisikaerengeki mumushongano wedhiri. ²³ Nokumusangano wematangwe awo akanyorwa mudenga, nokunaMwari Mutongi wavo veshe, nokumweya yevanhu vakanaka vakaitwa vakaperera. ²⁴ NokunaJesu, muemereri wechitenderano chitsva, nokungazi yokufafazwa, inoreketa zvakanaka kupinda ngazi yaAbhera. ²⁵ Ngwarai kuti musaramba uwo unoreketa; ngokuti kudai vasikazi kupokonyoka avo vakaramba uwo wakavapanga munyika muno, isusu tinozoita mapokonyokereyi, kuti techiramba uwo unotipanga echibva mudenga! ²⁶ Panguvayo izwi rake rakazungunyisa nyika; asi zvino wakagondisa echiti: “Ndichazozungunyisazve kamwe, haiwa nyika yega, asi nedenga naro. ²⁷ Izwi iri rokuti: “Ndichazozungunyisazve kamwe,” rinoronza kubviswa kweizvo zvinozungunyika, kuronza kuti zviri zvakaitwa, kuti izvo zvisikazungunyiswi zvisare. ²⁸ Ndizvo ngatibonge, ngokuti tinoashiran umambo husikazungunyiswi, ndizvo ngatidire Mwari ngenjira inomudakadza nokureremedza nokutya. ²⁹ Ngokuti ngegwinyiso Mwari wedu muriro unoparadza.