¹ Ndinokupanga mukuona kwaMwari nokwaKristu Jesu, uwo unozotonga vachazwa nevakafa, mukuoneka kwake noumambo hwake:

² Chumaira izwi, ugwinyisire ngenguva kwayo neisiri nguva kwayo, rambidza, ukaraidze, upange ngokusengerera kweshe nokudzidzisa ³ Ngokuti nguva ichauya apo vanhu yevacharamba kupurutana kudzidziso dzegwinyiso, asi vane nzee dzinovava, vanozodziunganidzira vadzidzisi kudai ngokuemura kwavo. ⁴ Vanozotsiira nzee dzavo kubva kugwinyiso, vechienda kungano. ⁵ Asi iwewe, ngwara muzviro zveshe, gwinyira zvakakonza, ita mushando womuvhangeri, pedzisa mushando wako. ⁶ Ngokuti zvino inini ndatodururwa kuitwa mudiro, nomukuwo wokuenda kwangu waguma. ⁷ Ndarwa kurwa kwakanaka, ndapedza mujaho, ndangwarira kugonda. ⁸ Kubvira zvino ragadzikirwa inini dzungudza rokururama, iro raanozondipa ngeiro zuva Mambo, mutongi wakarurama, haiwa kwendiri ndega, asi nokwavariwo veshe vakada kuoneka kwake. ⁹ Uya kwendiri ngokukasira. ¹⁰ Ngokuti Dhemasi wakandisiya, ngokuda iyi nyika, wakaenda Thesaronika; Kresikhenesi wakaenda Garatia, Thithusi wakaenda Dharamatia. ¹¹ NdiRuka ega uchineni. Tora Marako uuye naye, ngokuti unorudetso rukurutu kwendiri mumushando. ¹² Ndakatuma Thichikusi kuEfesu. ¹³ Jazi rendakasiya Troasi naKhapusi, uya naro woouya, nemabhuku, kakurutu mapepa emakanda. ¹⁴ Arekizanda mupfuri wethusi wakandishaishira kakurutu; Mambo unozomuunzidzira kudai ngemishando yake. ¹⁵ Newe unosisira kungwara ndiye, ngokuti wakaphikisa kakurutu mazwi edu. ¹⁶ Pakudzirwira kwangu kwokutanga apana wakandiemerera, asi veshe vakanditiza. Isaita ndaa kwavari! ¹⁷ Asi Mambo wakandiemerera, akandigwinyisa, kuti kubudikidza ndini mashoko ateketeswe yaamho nemadzinza eshe amazwe. Neni ndakapokonyorwa kubva pamuromo wemhondoro. ¹⁸ Mambo unozondipokonyora kubva kumishando yeshe yakashata, unozondiponesa metsa ndapinda muumambo hwake hwomudenga. Kwaari ngahugare uthende mhera nariini nariini. Ameni. ¹⁹ Tambisa Prisikha naAkwira nemhuri yaOnesiforusi. ²⁰ Erastusi wakasara Khorinte, asi ndakasiya Trofimusi Miretusi echirwara. ²¹ Kasira kuti uuye chando chisati chaguma. Yubhurusi unokutambisa naPhudhenesi naRinusi naKraudhia nevatendi veshe. ²² Mambo ngaagare nomweya wako. Nyasha ngadzigare nemwi.