¹ Phauri, Sirivhanusi naThimothi, ndinonyorera kuchiara chevaThesaronika chiri munaMwari Baba nomunaMambo Jesu Kristu. Nyasha nokunyarara ngazvigare nemwi. ² Tinobonga Mwari nguva dzeshe ndimwi mweshe, techimukarakadza mumukumbiro yedu. ³ Tinogara techimukarakadza pamberi paMwari naBaba edu ngemushando wenyu wokugonda nokushandira kwenyu murudo nokusengerera kwokugonda munaMambo wedu Jesu Kristu. ⁴ Ngekuti tinozia, hama munodiwa ndiMwari, kuti wakamusarudza, ⁵ ngekuti vhangeri redu arizi kuuya kwomuri ngeizwi rega, asi ngesimbawo nomuMweya Wakachena nokugwinyiswa kukuru. kudai ngezvomunozia kuti tainga tiri vanhu vakadini pakati penyu ngendaa yenyu. ⁶ Nemwi mwakaita vaedzereri vedu nevaMambozve, mwechiashira izwi mukutambudzika kukuru, ngekudakara kwoMweya Wakachena. ⁷ Ngekudaro mwakaita chionero kwavari veshe vanotenda muMasedhonia nomuAkhaiya. ⁸ Ngokuti kubvira kwomuri izwi raMambo rakazwika haiwa muMasedhonia nomuAkhaiya mwega, asi kundau dzeshe kugonda kwenyu munaMwari kwakaziikanwa, akuchasisiri kuti isusu tirekete chiro. ⁹ Ngekuti avo vemene vanoshuma tisu ngenjira yemwakatiashira ndiyo pakati penyu, nenjira yemwakatendeuka ndiyo kuna Mwari kubva kumuedzaniso yekudira, kuti mushandire Mwari unopona wegwinyiso, ¹⁰ nokugarira Mukororo wake unobva mudenga, waakamusa kubva kwavakafa, ndiJesu uwo unotinunura kubva muushungu unouya.