¹ Vamakwerhu, lesvi minga ni kupfumela ka Hosi ya hina Yesu Kriste, Hosi ya kukwetsima, mingayeneni hi nghohe. ² Hikuva siku rin'wana, sinagogeni ya n'wina, kunga nghena munhu lweyi anga ni ringi ya golidi ritihweni, lweyi ayambaleke xiyambalu xa risima, kutani kunghena ni lweyi ayambaleke xiyambalu xa chaka; ³ kambe n'wina mixixima lweyi angayambala xiyambalu xa risima miku: “Ahikombela lesvaku mitatshama halenu”, kasi ka lweyi anga xisiwana miku: “Yima koseyo”, kumbe: “Tshama hansi laha milengeni ya mina!” ⁴ Hakunene, loko miyendlisa svosvo, miya hi nghohe, mikomba kuhambana xikarhi ka n'wina kutani mihundzuka vayavanyisi lavanga ni miyehleketo leyobiha. ⁵ Yingisani, vamakwerhu lavarhandzekaka: Xana Xikwembu axihlawulanga lavanga svisiwana misaveni leyi lesvaku vava lavafuweke hi tlhelo ra kupfumela ke? Xana axivahlawulelanga kuja ndzhaka ya Mfumu lowu xiwutshembiseke lava vaxirhandzaka ke? ⁶ Kambe n'wina michipisa svisiwana! Xana ahi vafuwi lava vamixanisaka ke? Xana ahi vona lava vamirhurhuvulelaka tihubzeni ke? ⁷ Xana ahi vona lavarhuketelaka vito lerohlawuleka leri michuliweke rona ke? ⁸ Loko hakunene mihetisa Nawu lowunga wukulu ka hinkwayu, hi kulandza Tsalwa leringe: “Utarhandza munhukuloni kukota loko utirhandza”, miyendla lesvinga svinene. ⁹ Kambe loko miya hi nghohe, majoha, kutani Nawu wumurhwexa nandzu hi lesvi minga vatluli va wona. ¹⁰ Mhaka hi lesvaku mun'wana ni mun'wana lweyi aringetaka kuhlayisa milawu hinkwayu kambe atsandzeka ka wun'we wa yona ntsena, ayitlulile hinkwayu. ¹¹ Hikuva lweyi angate: “Ungatshuki uwosva”, hi yena kambe lweyi angate: “Ungatshuki udlaya.” Loko ungawosvi kambe udlaya, utlula Nawu hinkwawu. ¹² Hikolaho, kuvulavuleni ka n'wina ni le mintirhweni ya n'wina, tikombeni lesvaku mi lava vangatayavanyisiwa na vali hansi ka Nawu lowunyikaka tshunxeko. ¹³ Hakunene kuyavanyisa kungakala kungatweli vusiwana munhu lweyi angatweliki vusiwana van'wana. Kambe kutwela vusiwana kutahlula sikwini ra kuyavanyisa. ¹⁴ Svipfuna yini, vamakwerhu, loko munhu aku a ni kupfumela, kambe angali na mintirho? Xana kupfumela ka yena kungamuponisa ke? ¹⁵ Loko vamakwenu, vaxinuna kumbe vaxisati, vasvelile ni kupfumala svakuja sva siku rin'wana ni rin'wana, ¹⁶ kutani mun'wana wa n'wina aku ka vona: “Fambani hi kurhula, mikufumela, mixurha.”, na angavanyikanga lesvilavekaka sva miri wa vona, xana svingapfuna yini svosvo ke? ¹⁷ Hikolaho loko kupfumela kuli koxe, kungali na mintirho, kufile. ¹⁸ Kambe munhu angavula aku: “Wena u ni kupfumela; Mina ni ni mintirho.” “Nikombe kupfumela ka wena lokungaliki ni mintirho, kutani mina hi mintirho ya mina nitakukomba kupfumela ka mina!” ¹⁹ Wena upfumela lesvaku ku ni Xikwembu xin'we ntsena. Uyendla svona. Hambi mali madimoni mapfumela svosvo, na mali karhi marhurhumela. ²⁰ Wena xihunguki ndziwena, xana ulava kukombiwa lesvaku kupfumela lokungatikombiki hi mintirho akupfuni nchumu k ²¹ Xana Abrahamu tatana wa hina angayendliwanga lweyi alulameke mahlweni ka Xikwembu hi mhaka ya mintirho ke, loko anyiketile Izaki n'wana wa yena alitarini? ²² Wasvivona lesvaku kupfumela ka yena akuseketeliwa hi mintirho ya yena, kutani kupfumela kuyendliwile loku kuhetisekeke hi mintirho. ²³ Nasvona Matsalwa mahetisekile lawa mange: “Abrahamu apfumelile ka Xikwembu, kutani ximuhlayile lweyi alulameke hikolaho ka svona.” Kutani avuliwile nakulobze wa Xikwembu. ²⁴ Wasvivona lesvaku munhu ayendliwa lweyi alulameke mahlweni ka Xikwembu hi mhaka ya mintirho, kungali hi kupfumela ntsena. ²⁵ Hi ndlela yoleyo, xana Rahabe lweyi wa nghwavana, lweyi arhurheleke tinhloli ni kukomba vavanuna volavo ndlela yobaleka ha yona, angayendliwanga lweyi alulameke hi mhaka ya mintirho xana? ²⁶ Hikolaho, tani hi lesvi miri lowungahava moya wufeke, kupfumela nakona lokungahava mintirho kufile