¹ MuSizaria waiyamwo munhu waizwi Khoneriusi, nduna yezana yechikwata chomaonere chaizwi cheItaria. ² Waiya munhu unodira nounotya Mwari pamwepo nomumba yake yeshe, wakakovera zvipo ngenyasha kuvanhu nokugara echikumbira kunaMwari. ³ Zvino nguva yooda kuita awa lechipfumbamwe rezuva, wakanasa kuona muchikobigiro ngirosi yaMwari yechipotera, yechiti kwaari: “Khoneriusi.” ⁴ Wakaringisisa ngirosi yechitya, akati: “Chiinyi, Mambo?” Nayo yakati kwaari: “Mikumbiro yako nokukovera zvipo kwako zvakakwira kuita mulangaririse pamberi paMwari. ⁵ Zvino tuma vanhu kuJopa vaunze munhu unozwi Simoni, uwo unozwi Petro. ⁶ Iye unogala nomunhu unozwi Simoni, musukuti, mumba yake iri pasinde poruandhle. ⁷ Apo ngirosi yakavereketa kwaari yaenda, wakadaidza vairi vovaranda vmumba make, nejoni lanigira leavo vaigara vechimushandira. ⁸ Naapo aronza kwavari zveshe, wakavatuma kuenda Jopa. ⁹ Zvino nechimangwani, avo vachahamba vechikwedzera kudhorobha, Petro wakakwira padenga remhatso rakaterama kookumbira, rooda kuita awa rechitanhatu. ¹⁰ Wakazwa nzara, echidisisa kuti adye chiro; asi vachanasirira, wakabatwa ndimweya. ¹¹ Naye wakaona denga lakabeuka, nechiro chaidzaka chakadai ngejira gurutu lakadzaswa panyika lakasungwa marupande aro marongomuna. ¹² Mukati mwaro mwaiya nombeu dzeshe dzemhuka dzine mugacha murongomuna nezvipuka zveshe zvinotamanda zvomunyika neshiri dzomudenga. ¹³ Nayezwi lakawiya kwaari lechiti: “Miruka, Petro; uraya, wechidya.” ¹⁴ Asi Petro wakati: “Haiwa, Mambo! Ngokuti andizi kumbodya chiro chisina shwiro nechakasvipiswa.” ¹⁵ Neizwi lakauyazve kwaari ngokwechipiri lechiti: “Chaakachenesa Mwari, usati achina shwiro.” ¹⁶ Ichi chakaitika mikuwo mutatu, jira rakaashirwazve mudenga. ¹⁷ Zvino Petro achakangaidzwa mukati mwake kuti chinoronzenyi chioniso yecho chaainga aona, penya, avo vanhu vakatumwa ndiKhoneriusi, vainga vechibvunza mhatso yaSimoni, vakaema pamusuyo. ¹⁸ Navo vakadaidzira, vakabvunza kuti, Simoni unozwi Petro unogarapo here. ¹⁹ NaPetro achapindudza ngechioneso, Mweya wakati kwaari: “Nngirai, vanhu vatatu vanokutsvaka. ²⁰ Asi muruka udzake, uende navo usikagonondi; ngokuti ndini ndakavatuma.” ²¹ Petro wakagala kune vanhu avo, akati: “Ndini uwo womunotsvaka; mwahambirenyi?”. ²² Navo vakati: “Khoneriusi, nduna yezana, munhu wakarurama nounotya Mwari, unembiri yakanaka kudzindza reshe lovaJudha, wakapangwa ngongirosi yakachena kukudaidza kuti uuye kumuzi yake, nokuzwa mazwi anobva kwouri.” ²³ Ndizvo Petro wakavadaidza kuti vagene mukati, wakavapa zvokudya. Ngomangwani wakamuruka, akaenda navo, nehama dzimweni dzeJopa dzakaendawo naye. ²⁴ Ngomangwani vakapotera muSizaria, naKhoneriusi vaivagarira, waiya adaidza pamwepo nohama dzake neshamwari dzake dzinodikanwa. ²⁵ Naapo Petro vapinda, Khuneriusi wakasangana naye, vakawira pasoka dzake, akamudira. ²⁶ Asi Petro wakamumirudza echiti: “Miruka; neniwo ndiri munhu. ²⁷ Naapo akavereketa naye, akapotera mukati, akaona vazhinji vakaungana. ²⁸ akati kwavari: “yemwi munozia kuti azvitenderwi ngemipango kuti muJudha ashonganiswe nokuti auye kunomunhu wedzinza rimweni. Asi inini Mwari wakandipangidzira kuti ndisazoronza kuti munhu chiro chisina shwiro nokuti wakasvipiswa. ²⁹ Ndizvo apo ndadaidzwa, ndauya ndisikarambi. Ndizvo ndinobvunza mwakandidaidzirenyi?” ³⁰ NaKhoneriusi wakati: “Aamazuva marongomuna akapinda, mesa kuguma awa iri, ndaingwarira awa okukumbira yochipfumbamwe mumba yangu; ndakaona munhu wakaema pamberi pangu anezvokufuka zvinonhetukira. ³¹ Naye wakati: ‘Khoneriusi, mikumbiro yako yakazwika, ngokukovera zvipo kwako kwakakarakadzwa pamberi paMwari. ³² Ndizvo tuma kuJopa, udaidze Simoni, uwo unozwi Petro; unogara mumhatso yaSimoni, musukuti, pasinde poruandhle.’ ³³ Ndizvo paripo ndakatuma vanhu kwouri, newe ngokuuya wanasa; ndizvo tiri pano teshe pamberi paMwari kuzwa zveshe zvakapangwa kwouri ndiMwari.” ³⁴ NaPetro akachama mulomo wake, wakati: “Ngogwinyiso ndinoona kuti Mwari andiyepi muketo wevanhu. ³⁵ Asi kumadzinza yeshe, weshe unomutya nokuita zvakarurama unoashirika kwaari. ³⁶ Munorizia izwi iro raakatuma kunavana vaIsuraeri, yechichumaira mashoko akanaka okunyalala ndiJesu Kristu ndiyena Mambo wavo veshe. ³⁷ yemwi munozvwzva yezwi lakachumairwa munyika yeshe yeJudhia, kubvira ngomuGarire ngesure kworubhabhatidzo vakachumaira Johani. ³⁸ Ngenjira iyo Mwari yaakamudzodza ndiyo Jesu weNazaretha ndiMweya Wakachena nesimba; uwo waihamba yechiita zvakanaka, yechiponesa avo veshe vaitambudzwa ndiDhiabhorosi, ngokuti Mwari waiya naye. ³⁹ Nesuyo tiri zvapupu zveizvo zveshe zvaakaita vzeshe munyika yevaJudha nomuJerusarema. Ndiye wevakauraya ngokumuturika pamuti. ⁴⁰ Uyu Mwari wakamumusa kubva murufu ngezuva rechitatu, akamupa simba kuti aoneke pamhene. ⁴¹ Asi haiwa kuoneka ngevanhu veshe, asi kwetiri isusu, takatsanangurwa karetu ndiMwari kuita zvapupu, avo vakadya nokumwa naye ngesure kwokumuka kwake kubva kwevakafa. ⁴² Wakatipanga kuchumaira kuvanhu nokupupula kuti uyu ndiye wakaemeswa ndiMwari kuita Mutongi wevanozwa novakafa. ⁴³ Kwoari vaprofeti veshe vanoita chapupu ndiyena, kuti ngezina lake, munhu weshe unotenda kwoari unozorekererwa zvishaishi.” ⁴⁴ Naapo Petro achavereketa aya mazwi, Mweya Wakachena wakateredza pamberi pavo veshe vakazwa yezwi. ⁴⁵ Naavo vatendi vovakachekwa avo vakauya naPetro vakashamiswa ngokuti chipo choMweya Wakachena chakadururwawo padenga pomadzinza. ⁴⁶ Ngokuti vaivazwa vechivereketa ngondimi ngokukudza Mwari. Naapo Petro wakapingula, akati: ⁴⁷ “Pane ungalambidza mvura here kuti ava vasabhabhatidzwe, avo vakaashira Mweya Wakachena kudai tisu?” ⁴⁸ Nayene wakapanga kuti vabhabhatidzwe ngezina raJesu Kristu. Vorovomupota kuti agarepo mazuva amweni.