¹ Ka Tiyofilo! Bukwini ya mina leyakusungula, nitsalile hi ta svilo hinkwasvu lesvi Yesu angasungula kusviyendla ni kusvijondzisa, ² kuyafika siku leri angatlhantukisiwa ha rona aya tilweni, loko aleletile, hi Moya Wokwetsima, vapostola lava aavahlawulile. ³ Ndzhaku ka loko axanisiwile, atikombile ka vona ali lweyi ahanyaka hi svikombiso lesvotala lesvikholwisaka; avoniwile hi vona, hi masiku ya mune wa makume, na ali karhi avulavula na vona hi ta Mfumu wa Xikwembu ⁴ Siku rin'wana, loko ali na vona, avabzela aku: “Mingatshukeni misuka Yerusalema, kambe tshamani kona, milangutela lesvi Tatana amitshembiseke svona, lesvi mingasvitwa nisvihlaya, ⁵ hikuva Yohani aakhuvula hi mati, kambe n'wina mitakhuvuliwa hi Moya Wokwetsima, ndzhaku ka masiku mangali mangani.” ⁶ Kutani loko vaha hlengeletanile na vali na Yesu, vamuvutisa vaku: “Hosi, xana hi wona nkama lowu ungatapfuxa mfumu wa Israyele ke?” ⁷ Yesu aku ka vona: “Asvimifanelanga kutiva tinguva, hambi yili minkama leyi Tatana angatihlawulela yona hi vukulukumba bza yena; ⁸ kambe mitanyikiwa matimba, siku leri Moya Wokwetsima wungatata henhla ka n'wina; kutani mitava timboni ta mina kola Yerusalema, ni le tikweni hinkwaru ra Yudeya, ni ra Samariya, ni kuyafika magan'wini ya misava.” ⁹ Loko avulavulile timhaka leto, atlhantukisiwa na vamuvona, kutani refu rimusiva, vangahamuvoni. ¹⁰ Navaha tlakusile mahlo valanguta tilweni loko ali karhi atlhantukisiwa, xikan'we kufika vavanuna vambirhi lavayambaleke sva kubasa, vahumelela kola vangakona, ¹¹ vaku: “Vavanuna va Galeliya, miyimela yini na milangutile tilweni ke? Yesu lweyi asusiweke xikarhi ka n'wina ni kutlhantukisiwela tilweni, atatlhela avuya hi ndlela leyi mingamuvona aya tilweni ha yona.” ¹² Kutani loko vasuka ntshaveni leyi vange i ya Maolivhera, vatlhelela Yerusalema, mpfhuka wakona wuli wa kolomu ka kilometru rin'we. ¹³ Kuteloko vanghenile muntini, vakhwela ndlwini ya le henhla, laha avatshama kona. Aku na Petrosi, na Yohani, na Yakobe, na Andreya, na Filipi, na Tomasi, na Bartolomewu, na Matewu, na Yakobe n'wana Alfewu, na Simoni Muhiseki, na Yudasi n'wana Yakobe. ¹⁴ Volavo hinkwavu avatiyisela kukhongeleni, hi mbilu yili yin'we, vali ni vavasati van'wana, na Mariya mamana wa Yesu, ni vamakwavu va Yesu ¹⁵ Hi masiku wolawo, Petrosi ayima nhlengeletanweni ya vamakwavu Hosini (lava nhlayo ya vona ayilava kuva dzana ni makume mambirhi, kutani aku: ¹⁶ “N'wina valekwerhu, svafanela lesvaku Tsalwa rihetiseka, leri Moya Wokwetsima wungarivula hi nomo wa Davhida, mayelano na Yudasi lweyi aali mufambisi wa lavakhomeke Yesu. ¹⁷ Kasi Yudasi aahlayiwa xikarhi ka hina, nasvona aali mun'we wa hina ntirhweni.” ¹⁸ (Yudasi aatixavele nsimu hi male leyi aayikumile hi ndlela yohomboloka; kutani ayile ayawa hinhloko nsin'wini yakona, ahandzuka hi le xikarhi, marhumbu ya yena mahuma hinkwawu. ¹⁹ Mhaka leyi yitiviwile hi vanhu hinkwavu lavayakeke Yerusalema; hikokolaho vangachula nsimu leyi vito ra “Hakeldama” hi ririmi ra xiheberu, hi lesvaku “Nsimu ya Ngati”.), ²⁰ Kutani, bukwini ya Tipisalema, kutsaliwile lesvi: “‘Munti wa yena awuhundzuke rhumbi, kungahavi ni munhu lweyi atshamaka kona!’ Nakambe: ‘Mun'wana aateke vulanguteli bza yena.’ ²¹ Hikolaho-ke, kulaveka munhu mun'we ka vavanuna lava avali na hina minkameni hinkwayu leyi Hosi Yesu angatshama na hina ni kufambafamba na hina, ²² kusukela nkameni lowu Yohani aakhuvula vanhu, kufikela loko Yesu atlhatukisiwile ayahenhla, asuka xikarhi ka hina; munhu wakona afanele kuva mboni ya kupfuka ka Hosi kufeni, svin'we na hina.” ²³ Hi loko vahumesa vambirhi: Yosefa lweyi avaku i Barsaba (rin'wana avaku i Yusto), na Matiyasi. ²⁴ Kutani vakhongela, vaku: “Hosi, wena lweyi ativaka timbilu ta vanhu hinkwavu, kombisa lweyi umuhlawuleke ka lava vambirhi, ²⁵ lesvaku ateka ndhawu ya Yudasi, ntirhweni wa vapostola lowu awutshikeke aya lomu angaya kona.” ²⁶ Kutani vanghenisa mavito lawa mambirhi vahlahluva tinhlolo kukuma musivi, kutani kuhumelela vito ra Matiyasi; kutani ahlayiwa svin'we ni vapostola lava va khume ni mun'we.