¹ Mina Pawulo, mupostola wa Kriste Yesu hi kurhandza ka Xikwembu, hikolaho ka kutshembisiwa ka vutomi lebzinga kona ka Kriste Yesu, ² nitsalela Timotewu n'wananga lweyi arhandzekaka, nili: Timpsalu, ni vunene, ni kurhula, asvive na wena, svihuma ka Xikwembu Tatana, ni le ka Kriste Yesu Hosi ya hina. ³ Nikhensa Xikwembu, xona lexi nixitirhelaka hi ripfalu leribaseke kufana ni vakokwana, na ningatshiki kukukhongelela vusiku ni nhlekanhi. ⁴ Loko niyanakanya minhloti ya wena, ninavela ngopfu kukuvona, lesvaku nitatsaka ngopfu; ⁵ nitsundzuka ta kupfumela ka wena lokutiyeke, kunga kupfumela lokungarhanga kuyaka ka kokwana wa wena Loyisi ni mamana wa wena Ewunise, kutani svosvi nitshemba svinene lesvaku kuyakile ni le ka wena. ⁶ Hikolaho nakutsundzuxa kupfuxeta nyiko ya Xikwembu, leyinga ka wena, leyi uyikumeke siku leri nikutlhantekeke mavoko. ⁷ Hikuva Xikwembu axihinyikanga moya wa vutoya, kambe xihinyikile moya wa matimba, ni wa rirhandzu, ni wa kutikhoma. ⁸ Hikolaho, ungavi ni tingana kuveka vumboni hi tlhelo ra Hosi ya hina, hambilesvi mina ninga mubohiwa hikolaho ka yona. Na wena, khensa kuxanisekela Evhangeli, hi kupfuniwa hi matimba ya Xikwembu. ⁹ Xihiponisile ni kuhivitana hi vitaniwo rokwetsima kuva vanhu va xona, kungali hikolaho ka mintirho ya hina, kambe kuli hikolaho ka makungu ya xona ntsena ni hikolaho ka timpsalu leti xihinyikeke tona ka Kriste Yesu na minkama yingasiva kona. ¹⁰ Kutani svosvi timpsalu leti tatikomba rivaleni, hi kuta ka muponisi wa hina Kriste Yesu, yena lweyi aheliseke rifu, ahumesela rivaleni vutomi lebzingawonhekiki, hi matimba ya Evhangeli. ¹¹ Mina nivekiwile kuva muchumayeli wa Rito ni mupostola ni mujondzisi hikolaho ka Evhangeli leyi. ¹² Kutani nixaniseka hi ndlela leyi hikolaho ka svona; kambe a ni na tingana, hikuva nitiva lweyi nipfumeleke ka yena, kutani nitshemba svinene lesvaku wasvikota kuhlayisa lesvi asvivekeke mavokweni ya mina, kuyafika siku lerikulu. ¹³ Tshama amaritweni lamatiyeke ya ntiyiso, lawa umatweke ka mina, kupfumeleni ni le rirhandzwini leringa ka Kriste Yesu. ¹⁴ Hlayisa. ¹⁵ Wasvitiva lesvaku hinkwavu lavanga le tikweni ra Aziya vanisukelile, xikarhi ka vona ku na Fixjelo na Hermoxjene. ¹⁶ Ingi Hosi yingatsetselela njangu wa ka Oneziforo, hikuva makhambi yotala anirhulisile mbilu; na svona, kubohiwa ka mina hi machini akumukhomisanga tingana. ¹⁷ Kambe loko afikile le Roma anilavile hinkwaku hi matimba akondza anikuma. ¹⁸ Ingi Hosi yingayendla lesvaku akuma kutsetseleliwa mahlweni ka yona sikwini lerikulu. Na wena wayitiva svinene mintirho leyi aniyendleleke le Efesa.