¹ Hikolaho, lesvi Kriste atweke kuvava nyameni, na n'wina hlomani matlhari ni miyanakanyu yofana ni ya yena, hikuva mun'wana ni mun'wana lweyi angatwa kuvava nyameni, atshikile kujoha. ² Kutani nkameni wa n'wina lowusaleke wa kuhanya laha misaveni, mingahafambisiweni hi kunavela kutitsakisa, kukota vanhu van'wana, kambe mifambisiwa hi lesvi Xikwembu xirhandzaka svona. ³ Tshikani kuyendla lesvitsakeliwaka hi vamatiko, hikuva sviringene loko misviyendlile minkameni leyihundzeke. Khale amihanya hi kuyendla sva kubiha, hi kunavela kutitsakisa, hi kudakwa, ni makolo, ni kuhanya mabzaleni, ni kugandzela svikwembu sva hava lesvingalavekiki. ⁴ Vahlamala loko vamivona svosvi na mingahafambi na vona, kuwonhekeni loku kutlulisaka mpimo, kutani vamisandza. ⁵ Kambe vanhu lava vatatihlamulela mahlweni ka lweyi atilungiseleke kuyavanyisa lavahanyaka ni lavafeke. ⁶ Hi svona lesvingayendla lesvaku Evhangeli yipaluxiwa ni ka lavafeke: Vona lava vayavanyisiweke kufana ni vanhu van'wana, na vahali misaveni, svosvi vahanya moyeni kufana ni Xikwembu. ⁷ Kuhela ka svilo hinkwasvu kule kusuhi. Hikolaho, tlharihani mitikhoma, mitakota kukhongela. ⁸ Kutlula lesvi hinkwasvu, tiyani kurhandzaneni, hikuva rirhandzu rifunengeta svijoho lesvotala. ⁹ Titoloveteni kuyamukela vayendzi, mirhurhelana, handle ka kutseketsela. ¹⁰ Lesvi mun'wana ni mun'wana anyikiweke nyiko ya yena, tirhisani tinyiko leti, mipfunana ha tona, miva valanguteli lavanene va tinyiko ta Xikwembu ta tinxakaxaka. ¹¹ Loko mun'wana anyikiwile kuvulavula, aavulavule hi kulandza marito ya Xikwembu; loko mun'wana anyikiwile kutirhela vanhu, aasviyendle kufana ni lweyi asvitirhaka hi matimba lawa Xikwembu ximunyikaka wona, lesvaku ka svilo hinkwasvu Xikwembu xidzunisiwa ha Yesu Kriste. Kudzuneka ni matimba svi le ka xona hilaha kungaheliki. Amen. ¹² Varhandziwa, mingahlamaleni loko miweliwa hi miringo leyipfurhaka kufana ni ndzilo kutaringa kutiya ka n'wina, onge hi loko mihumeleliwa hi lesvohlamalisa. ¹³ Kambe tsakani hi lesvi miyaveliwaka kuvaviseka ka Kriste, lesvaku siku leri ahumelelaka kukwetsimeni ka yena, na n'wina mitatsaka mitsakisisa. ¹⁴ Loko misoliwa hikolaho ka vito ra Kriste, mikatekile, hikuva Moya lowukwetsimaka, lowunga wa Xikwembu, wu le ka n'wina. ¹⁵ Ntsena kungavi na mun'we wa n'wina lweyi atwisiwaka kuvava hi lesvi anga mudlayi, kumbe muyivi, kumbe xigevenga, kumbe lweyi anghenelaka timhaka ta van'wana. ¹⁶ Kambe loko munhu atwisiwa kuvava hikolaho ka lesvi anga mukriste, angatshuki akhomiwa hi tingana, kambe aadzunise Xikwembu, hi mhaka ya vito leri ra “mukriste”. ¹⁷ Hikuva nkama wufikile wa kuyavanyisiwa lokungatasungula hi va yindlo ya Xikwembu. Kutani, loko kusungula hi hina, xana makumu ya lavangayingisiki Evhangeli ya Xikwembu matava lawa yoyini ke? ¹⁸ Nasvona, vate: “Loko munhu wolulama apona hi kunonon'hwa, xana lavasandzaka Xikwembu ni lavajohaka, vatakumeka na vali ka xiyimu xihi ke?” ¹⁹ Hikolaho, lavatwisiwaka kuvava hilaha Xikwembu xirhandzaka hakona, avayendle lesvi sva kululama, kutani vaveka mimoya ya vona mavokweni ya Muvumbi lweyi atshembekaka.