¹ Mina mukulukumba nitsalela muhlawuliwa waxisati, ni vana va yena, lava mina nivarhandzaka hi ntiyiso, ingali mina ntsena, kambe ni hinkwavu lava vativaka ntiyiso. ² Hikolaho ka ntiyiso lowu wutshamaka na hina, lowu wungatatshama na hina hilaha kungaheliki. ³ Timpsalu ni musa ni kurhula, asvive na n'wina, svihuma ka Xikwembu Tatana ni ka Hosi Yesu Kriste, N'wana wa Tatana, asvive na hina hi ntiyiso ni rirhandzu. ⁴ Nitsakile ngopfu loko nikuma lesvaku vana van'wana va wena vafamba ntiyisweni, tani hi lesvi hiyamukeleke milawu ya Tatana hakona. ⁵ Svosvi-ke muhlawuliwa waxisati na kukombela, anikutsaleli Nawu lowumpsha, kambe wolowu hinga na wona kusukela kusunguleni: Lesvaku hirhandzana. ⁶ Kutani rirhandzu rakona hi leri: Hifanela kuhanya mayelanu ni milawu ya yena. Lowu hi wona Nawu, tani hilaha misvitweke hakona kusukela kusunguleni. Lesvaku mihanya ha wona. ⁷ Hikuva vakanganyisi lava votala se vanghenile misaveni, lava vangapfumeliki lesvaku Yesu Kriste atile tani hi munhu. Lweyi avulaka svosvo i mukanganyisi nasvona i Antikriste. ⁸ Hikolaho tivoneleni n'wina ha n'wexe, lesvaku mingalahlekeliwi hi lesvi mingatikarhatela svona, kambe mikota kukuma hakelo leyi yimifanelaka. ⁹ Mani na mani lweyi ayaka mahlweni hi kutsandzeka, angatiyiseli jondzweni ya Kriste, anga na Xikwembu; lweyi atiyiselaka jondzweni ya Kriste, lweyo ana Tatana ni N'wana. ¹⁰ Loko munhu wokarhi ata ka n'wina, kambe angatisi jondzo leyi, mingatshukeni mimuyamukela mintini ya n'wina, nasvona mingatshukeni mimuxeweta. ¹¹ Hikuva lweyi axewetaka munhu wotanu atwanana ni mintirho ya yena leyobiha. ¹² Ni ni lesvotala kumitsalela, ntsena anilavanga kusviyendla hi papela ni tinta; kambe nilangutela kuta koseyo, nitavulavula na n'wina hi nomo, na hili karhi hivonana, lesvaku kutsaka ka hina kuva loku kuhetisekeke. ¹³ Avana va makwenu, lweyi anga muhlawuliwa waxisati, vakurungula.