¹ Svosvi-ke, ni khongotela vakulukumba lavanga mahlweni ka n'wina, lesvi na mina ninga mun'we wa vona; ningamboni ya kuvaviseka ka Kriste, ni lweyi atshembaka kuyaveliwa kukwetsima lokungatahumelela, kutani nili: ² Risani ntlhambi wa Xikwembu lowunga xikarhi ka n'wina, miwuhlayisa kungali hi kusindzisiwa, kambe kuli hi kusvirhandza, hilaha Xikwembu xisvilavaka hakona, nasvona kungali hi kulangutela bindzu lerikhomisaka tingana, kambe hi kuhiseka. ³ Mingatshukeni mifuma lava minganyikiwa vona kuvarisa, kambe miva svikombiso lesvinene ka ntlhambi. ⁴ Kutani siku leri murisi lwenkulu angatahumelela, mitakuma hari leyo ya kudzuneka, leyingaliki na kuwonheka. ⁵ Svixitanu na n'wina lavampsha: Titsongahateni ka lavakulu. Hinkwenu yambalani kutitsongahata, mitiveka hansi, van'we ka van'wana, hikuva va khale vate: “Xikwembu xiyalela lavatikulisaka, kambe xitsetselela lavatitsongahataka.” ⁶ Hikolaho, titsongahateni hansi ka voko ra matimba ra Xikwembu, lesvaku hi nkama wakona xitamitlakusa. ⁷ Rhulani kukarhateka hinkwaku ka n'wina ka xona, hikuva xitikarhatela n'wina. ⁸ Tikhomeni mihiteka. Nala wa n'wina anga Sathana, warhendzelekarhendzeleka kufana ni nghonyama leyibongaka, yilava lweyi yingamujaka. ⁹ Muyaleleni, mitiya kupfumeleni ka n'wina, hi kutiva lesvaku vamakwenu misaveni hinkwayu vahlangana ni kuxaniseka kofana ni loku minga nakona. ¹⁰ Kutani ndzhaku ka loko mitava mixanisiwile nkamanyana. Xikwembu xa timpsalu hinkwatu lexi ximivitaneke kunghena kukwetsimeni ka xona lokungaheliki, ka Kriste, xona hi xoxe xitamipfuxa, ximiyaka ni kumitiyisa, mingatsekatseki. ¹¹ Matimba amave ka xona hi masiku ni masiku. Amen. ¹² Nimitsalela hi kukomisa, hi xiyandla xa Silvhano, makwerhu lweyi hi kuvona ka mina anga lweyi atshembekeke; namikhongotela, ni kutiyisa lesvaku timpsalu ta ntiyiso ta Xikwembu hi tona leti! Tiyani ka tona. ¹³ Kereke leyinga Babilona, ya lavahlawuliweke kufana na n'wina, yamirungula, ni n'wana wa mina Marka wamirungula. ¹⁴ Xewetanani hi kun'quntana hi rirhandzu ra vukwavu. Kurhula akuve ka n'wina hinkwenu va ka Kriste.