¹ Zvino Abhurahama akabvapo akapinda mudunhu rokuNegevhi akandogara pakati peKadheshi neShuri, akagara muGerari kwechinguva. ² Uye ikoko Abhurahama akati nezvomukadzi wake Sara, hanzvadzi yangu. Ipapo Abhimereki mambo weGerari akatuma vanhu kuti vandotora Sara. ³ Asi Mwari akauya kuna Abhimereki usiku mukurota uye akati kwaari, Wakangoita somunhu akafa nokuda kwomukadzi wawatora; mukadzi womunhu. ⁴ Zvino Abhimereki akanga asati aswedera kwaari, saka akati, Ishe, muchaparadza rudzi rusina mhosva here? ⁵  Ko, iye haana kuti kwandiri, hanzvadzi yangu here, naiyewo mukadzi haana kuti kwandiri Ihanzvadzi yangu here? Ndakaita izvi nehana yakachena uye namaoko akachena. ⁶ Ipapo Mwari akati kwaari mukurota, Hongu, ndinozviziva kuti wakaita izvi nehana yakachena, nokudaro ndakukonesa kuti unditadzire. Ndokusaka ndisina kukutendera kuti umubate. ⁷  Zvino chidzosera mukadzi womurume uyu, nokuti muprofita, uye achakunyengeterera urarame. Asi kana usina kumudzosa, uzive kuti iwe navose vari vako muchafa. ⁸ Mangwanani akatevera Abhimereki akadana varanda vake vose, uye paakavaudza zvose zvakanga zvaitika, vakatya kwazvo. ⁹ Ipapo Abhimereki akadana Abhurahama kuti apinde akati, Waiteiko kwatiri? Ndakakutadzira zvakaita seiko zvawauyisa mhosva huru yakadai pamusoro pangu napamusoro poumambo wangu? Wandiitira zvinhu zvisingafaniri kuitwa. ¹⁰ Uye Abhimereki akabvunza Abhurahama akati, Wakaoneiko chakaita kuti uite izvi? ¹¹ Abhurahama akapindura akati, Ndakati mumwoyo mangu, Zvirokwazvo munzvimbo ino hamuna kutya Mwari, uye vachandiuraya nokuda kwomukadzi wangu.  ¹² Zvisinei hazvo, zvirokwazvo ihanzvadzi yangu, mwanasikana wababa vangu kunyange hazvo asina kuberekwa namai vangu; uye akazova hake mukadzi wangu. ¹³ Uye Mwari paakandiita kuti ndifambe kubva paimba yababa vangu, ndakati kwaari, Izvi ndizvo zvaungandiratidza nazvo madiro aunondiita: Kwose kwatinoenda, utaure pamusoro pangu uchiti, Ihanzvadzi yangu. ¹⁴  Ipapo Abhimereki akauya namakwai nemombe uye navarandarume navarandakadzi akavapa kuna Abhurahama, uye akadzosa Sara mukadzi wake. ¹⁵ Uye Abhimereki akati, Nyika yangu iri pamberi pako; gara paunoda. ¹⁶ Kuna Sara akati: Ndiri kupa hanzvadzi yako mashekeri chiurua esirivha. Ichi ndicho chichava chifukidzo pamusoro pemhosva yandakaita kwauri pamberi pavose vaunavo; waruramiswa kwazvo. ¹⁷ Ipapo Abhurahama akanyengetera kuna Mwari, uye Mwari akaporesa Abhimereki, mukadzi wake uye navarandakadzi vake kuti vakwanise kuita vana zvakare. ¹⁸ Nokuti Jehovha akanga azarira zvizvaro zvavo zvose muimba yaAbhimereki nokuda kwaSara mukadzi waAbhurahama.