¹ Petro, muwapostora waJesu Kristu, kune wakatsarwa wakatorwa munyika wakapararira mupondasi, Garacia, neKapadhonia, Ezhia neBhitinia, ² wakatsarwa nemahererano nekuziwa zviri mberi zvinoita Mwari, wachipupurirwa neMweya Mutswene, kuti muterere Jesu Kristu nekusaswa neropa rake. Kuti Nyasha dziwe nemi uye rugare rwenyu rewande. ³ Mwari, Baba vaIshe wedu Jesu Kristu, ngaarumbidzwe Nengoni dzake dzekuru, akatibereka patsva akatipinza mutariro mhenyu nokumuka kwaJesu Kristu kubva kuvakafa, ⁴ akatiisa munhaka isingagoni kuparara, isingaori kana kusvawa, yamakachengeterwa kudenga, ⁵ imi munodzivirirwa nesimba raMwari nokutenda kusvikira ruponeso rwauya rwakagadzirirwa kuti ruratidzwe munguva dzokupedzisira. ⁶ Mune izvi munofara zvikuru kunyange zvino, kana zvichifanira, muchitambudzika kwechinguva chiduku nenzira dzose dzemiedzo. ⁷ Izvi zvakauya kuitira kuti kutenda kwenyu, kunokosha kupfuura goridhe, rinoparara kunyange zvaro rakanatswa nomoto, kuwanikwe kwakakwana uye kuve kunorumbidzwa, kunobwinya uye kunokudzwa pakuratidzwa kwaJesu Kristu. ⁸ Kunyange musina kumuona, munomuda; kunyange zvazvo musingamuoni zvino, munotenda kwaari uye muzere nomufaro usingagoni kurondedzerwa. ⁹ Nokuti muri kugamuchira chinovavarirwa nokutenda kwenyu, irwo ruponeso rwemweya yenyu. ¹⁰ Nezvoruponeso urwu, vaprofita vakataura nezvenyasha dzaizouya kwamuri, vakanzvera zvikuru uye vakabvunza zvikuru, ¹¹ vachiedza kunzvera kuti vaone nguva nezvinhu zvairatidzwa noMweya wakanga uri mukati mavo pawakaprofita nezvokutambudzika kwaKristu, uye nezvokubwinya kwaizotevera. ¹² Zvakapangidzwa kwavari kuti vakanga vasingazvishumiri ivo, asi imi, pavakataura nezvezvinhu zvakataurwa kwamuri zvino naavo vakaparidza vhangeri kwamuri noMweya Mutsvene wakatumwa uchibva kudenga. Kunyange vatumwa vanoshuva kuona zvinhu izvozvi. ¹³ Naizvozvo, pfungwa dzenyu ngadzigadzirire kushanda, muzvidzore; muise, zvizere, tariro yenyu panyasha dzamuchapiwa pakuonekwa kwaJesu Kristu.  ¹⁴ Sawana vanoteerera, musaenzaniswa nezvido zvakaipa zvamaiva nazvo pamairarama mukusaziva. ¹⁵ Asi, saiye akakudanai mutsvene, ivai vatsvene pane zvose zvamunoita. ¹⁶ nokuti kwakanyorwa kuchinzi: “Iwai vatsvene, nokuti ini ndiri mutsvene.”  ¹⁷ Sezvo muchidana kuna Baba vanotonga basa romunhu mumwe nomumwe vasingatsauri, mugare upenyu hwenyu pano savatorwa muchitya. ¹⁸ Nokuti munoziva kuti hamuna kudzikinurwa nezvinhu zvinoora, zvakadai sesirivha kana goridhe, kubva paupenyu hwenyu husina maturo, hwamakagamuchira kubva kumadzitateguru enyu, ¹⁹ asi neropa rinokosha raKristu, iro gwayana risina charingapomerwa uye risina kuremara ²⁰ Akasanangurwa kare nyika isati yavapo, asi akaratidzwa kwamuri mumazuva ano okupedzisira nokuda kwenyu. ²¹ Kubudikidza naye munotenda kuna Mwari, akamumutsa kubva kuvakafa uye akamukudza, kuti kutenda kwenyu netariro yenyu zvive muna Mwari. ²² Zvino zvamakanatsa mwoyo yenyu nokuteerera chokwadi kuitira kuti mude hama muzvokwadi, munofanira kudanana zvikuru, zvichibva pamwoyo. ²³ Nokuti makaberekwa patsva, kwete nembeu inoora, asi isingaori, neshoko raMwari benyu uye rinogara nokusingaperi. ²⁴ Nokuti, “Vanhu vose vakaita souswa, uye kuyevedza kwavo kwakaita samaruva ouswa; uswa hunosvava uye maruva anowira pasi, ²⁵  asi shoko raShe rinogara nokusingaperi.” Uye iri ndiro shoko ramakaparidzirwa.