¹ Ghuno ngo uporofete wa Obadiya. Vino mbyo ana kutanta Hompa Karunga mupangeli kuhamena kwa Edomu: Hompa kwa tuma ntumi yendi kumuhoko, ntani atwe twayuvha mbudi yendi ashi, "Kuwapayikirenu! Tuyendenu tukarwite Edomu!" ² Karunga atantere ashi," Ame nganu mutura ngamukare muhoko wa kupira nkondo; ntani dimuhoko dadingi ngadi munyenga. ³ Kukunenepita koye kwa mumutjima kwayita maudito mukatji kenu, anwe ngamu tunga mumawe gha mundundu, ngaghakare mandi ghenu; Mbyo mwaghamba mudi mutjima denu ashi, "Are wa kuvhura kungupa kuno kuwiru nuvhure kukuganda nuwere palivhu?" ⁴ Nampili momu wakara wayeruka kuwiru-wiru unene yira likangakodi mbyo wa tura uturo ghoye ghukare mumbungururu, ame nganu kukarumuna ngaghu kugandere palivhu, Karunga mupangeli mo ana kutanta. ⁵ Nkene muwidi atjora mumundi ghoye, kumatiku ngavaka - aghupe navintje ovyo vana shana? Pakunyanga muyangure mandjembere kehe pano, kushuvidamo ghamasheshu? - Ano ngoli vana nkore venu vavo kushimbamo navintje? ⁶ Anwe vatekuru va Esau, limona lyenu ngava limushakana? ⁷ Muvantu va ghunyenu mwato lihuguvaro, vavo ngava mutjidamo mushirongo shenu. Vantu ovo mwakalire navo mumpora, mbongava mupiruko va mukwate. Vaghunyenu ovo mwalyanga navo mbongava mupiruko vamuteye viraha na marutenda. Kapi ngamukara navo nalikuyuvho. ⁸ Karunga kuna kutanta ashi, "Muliyuva lino", ghuye "ngafutita va Edomu ntani ngahana ghurapo ghukonentu wavo na ghuntje? ⁹ Mapenda ghava kavita ghava Temani, ngava kara naghoma ntani ruvharo rwa Esau ngava ruhanaghurapo, ngava vadipaye." ¹⁰ Mukondashi mwaruwana ghurunde kuva likoro lyenu ku ntekuru daJakopu, mbyo ngava muhanaghulirapo ntani ngamukara mulishwaghu lya naruntje. ¹¹ Anwe kwayimanine tupu mukengere, opo vayire vana nkore vavo vaya tjora-ghure vavero ghavo vangene mu Jerusalemu vakavake limona lyavo, valikutapere, anwe kwakalire muna fana yira vana nkore. ¹² Mukonda munke mukarera naruhafo, pakumona valikoro lyenu vana kara mumaghudito, ntani mukonda munke ghukarera naruhafo pakumona muhoko wava Juda ghuna kara murunyando muliyuva olyo. ¹³ Kapi vyahungama ashi muva shepe mumaruntjodi ghavo. Kapi vyawapa ashi anwe mungene mushitata sha vantu vande mukare naruhafo muvirugho vyama lirankali ghavo; kapishi muvake limona lyavo muliyuva lyama hepeko ghavo. ¹⁴ Kapi vyahungama ashi muyimane pama gwanekero ghandjira mukwate ovo vana kuduko vatjire, ntani kapi vyahungama ashi vantu ovo vana duko vaparuke waro muvakwate muvatape nka shimpe mumaghoko ghava nankore vavo muliyuva lyarunyando rwavo. ¹⁵ Liyuva pepi lina kara opo nganu pangura ame Hompa dimuhoko nadintje. Edomu ovyo waruwana kukwavo, navo mbyo ngava ruwana kukoye; viruwana vyoye navo ngava vikuvyutira. ¹⁶ Ame kwatininika vantu vande vanwe kunkinda ya ghururu yalishandu lyande kundundu yande ya kupongoka, ntantani tupu dimuhoko nadintje mo ngadi kanwa munkinda ya ghururu ya lishandu lyande lyalinene lyakupitakana lyakukarererapo. Vavo ngava kanwa ngava korwa ntani ngava kadongonoka vakatundepo yira kapi vakalirepo. ¹⁷ Vantu va Karunga ovo ngava paruko ngava yenda ku Ndundu ya Siyoni ku livhango lya kupongoka; muhoko wa Jakopu ngaghukaghupa shirongo shavo osho shavatumbukiro. ¹⁸ Muhoko wa Jakopu ngaghukara yira mundiro, muhoko wa Josef ngaghukara yira mundiro ngava hanaghurepo muhoko wa Esau ngaghupunduke, ngava ghushore ghupye yira momu vyavevanga virwenge. Kwato ntekuru wa Esau ogho ngaparuko ngahupopo, mo ana kutanta Hompa." ¹⁹ Vantu vaku ruha rwa urundu wava Juda ngava ghupa shirongo shava Esau sha kundundu ntani vaku Utokero ngava ghupa shirongo shava Filistine. Va Israeli ngava ghupa shirongo shava Efurayimi kumwe na Samariya, muhoko wa Benyamin ngaghughupa shirongo sha Giliyata. ²⁰ Vankwati vava Israeli ovo vatwara mu upika ngava kavyuka ngavaya ghupa sharongo sha Kanani dogoro ku Sarefata. Ntani vankwati ovo vatundo mu Jerusalemu, ovo vakaro muSeredisi, ngava kwata vitata vyakuruha rwaku urundu wa Juda. ²¹ Ovo ngava paruko ngava yenda vakatunge kundundu ya Siyoni ngava kapangere shirongo sha Esau, ano ngoli Karunga mwene ndje ngakaro mupangeli.