¹ Kuruku rwa mfa da Joshua, mbunga yaIsraeli avapura Karunga, ava ghamba, ''Are wamuhovo wakuvura kuhomona vaKanani mumwetu, mukuvarwita?'' ² Karunga aghamba, ''Judah ndje wakuvura kuhomona. Kengenu, ame navapa lipangero mushirongo shino.'' ³ VaJudah va vakafumu avatantere vaSimeon, vakuru vavo va vakafumu, ''Yiyenu kumwe natwe mushirongo osho vatupa tukakupakererengatuvhure kurwanita vaKanani. Opo ngatukavyuka ngatuyayenda mushirongo shenu osho vamupa.'' Makura rudi rwa Simeon aruyendi kumwe navo. ⁴ VaJudah va vakafumu avahomona, ano Karunga avapa lifundo kuvaKanani na vaPerisi. Ava dipagha mayovi murongo ghavo paBezeki. ⁵ Ava wana Adoni-Bezeki ku Bezeki, nakurwana naye nakufunda vaKanani na vaPerisi. ⁶ Ngoli Adoni-Bazeki aduka, nko kumukonka nakumukwata, avatete mapumbwara ghendi gha kumaghoko nagha ghakumpadi. ⁷ Adoni-Bezeki aghamba, ''Vahompa dimurongo ntambiri, vakundembuka mapumbwara ghavo ghakumaghoko nakumpadi ghamanene vapongayikango ndya davo kutunda munda yantishe yande. Yira momo navirughanine, mo nka Karunga anaviruwana kukwande.'' Avamuyita kuJerusalemu, ano nko akafelilire nkoko. ⁸ VaJudah va vakafumu avarwita shitata sha Jerusalemu kumwe nakushighupa. Vavo kwashihomonine namarufuro ghakutwepa nakutura shitata mumundiro. ⁹ Kuruku yavyo, vaJudaha ava ghurumuka mukukarwanita vaKanani ovo vatungiro kuvirongo vyandundu, muNegeva, nakumavango gha mumayana. ¹⁰ VaJudah ava twikiri dimuhoko na vaKanani ovo vatungiro muHeburoni (lidina Deburoni lyalyo kwakalire muhovo Kiriath Arba), nakufunda vaSheshai, Ahiman, na vaTalmai. ¹¹ Kutunda opo vaJudah va vakafumu nko kutwikira dimuhomo navatungimo vamuDebire (Lidina Debire lyalyo kwakalire muhovo Kiriyata Sefere). ¹² Kalebu aghamba, ''Kehe uno ahomono Kiriyata Sefere nakuyighupa, nganimupa Akisah, monande wamukadona, mukuara mukamali wendi.'' ¹³ Otiniyeli, mona wamukafumu waKenazi (mughunya waKalebu wamukafumu) akwata Debire, makura Kalebu amupa Akisa, monendi wamukadona, mukukara mukamali wendi. ¹⁴ Mpopo tupu Akisa nko kuya kwa Otiniyeli, na kumutumangeda Otiniyeli mukukapura vashe vamupeko lifuva. Ano tupu adumpukire pashidongi, Kalebunko kumupura, ''Vinke ovyo nikuruwanena?'' ¹⁵ Amutantere, ''Mpe matungiko. Kutunda opo wampa shirongo sha Negeva, shimpe nka runone rwamema.'' Makura Kalebu atapa kukwendi runone rwa kughurundu na runone rwa kughudami. ¹⁶ Ruvharo rwatamwayi ya Mosesa wamukeni avatundumo mushitata shavikereva kumwe na mbunga ya Juda, vayende mumburundu ya Juda, oyo yakaro ashi Negeva, mukukatunga kumwe na kumwe na mbunga ya Juda pepi na Aradi. ¹⁷ VaJuda vavakafumu avayendi na vakaSimiyoni vavakafumu vakuruvavo nakukahomona vaKanani ovo vatungiro muZefati nakushimanenapo kushihanaghura. Lidina lya shitata avaliruku ngoli Homora. ¹⁸ Mbunga ya Juda ayikakwata nka Gaza na mukunda wakundurukido ko, Ashikeloni na mbunga dakundurukido ko, na Ekironi na mukunda dakundurukido ko. ¹⁹ Karunga kwakalire kumwe na mbunga ya Juda nakughupa limona lyashirongo shakundundu, ngoli kapi vatjidire vatundemo vatungi vamumayana konda vavo kwakalire naturukara twavikugho. ²⁰ Heburoni yayo kwayitapire kwa Kalebu (momu aghambire Mosesa) nakutjida vatundemo vana vatatu va Anaki. ²¹ Ngoli mbunga yaBenjamini kapi vayitjidire yitundemo vaJebusi ovo vatungiro muJerusalemu. Makura vaJebusi avatungu nambunga ya Benjameni muJerusalemu nanamuntji lino. ²² Vakaliro lya Josefa avakuwapayikiri mukuhomona Beteli, ano Karunga kwakalire pavo. ²³ Avatumuko vakafumu vakanenge Beteli (shitata pamuhovo kwashirukire Luzi). ²⁴ Vakashoro avamono mukafumu anakurupuko mushitata, nakumutantera, ''Tuneghede, tunakanderere, omuvangenanga mushitata, natwe turuwanene mwamuwa.'' ²⁵ Avanegheda ndjira yamushitata, makura vavo avahomona shitata namarufuro ghakutwepa, ngoli avashuvu mukafumu nalipata lyendi nalintje mukurupuka mo. ²⁶ Makura mukafumu ayendi kudimukunda davaHiti nakukatunga shitata ashiruku Luzi, olyo linakaro ndyo lidina lyasho nanamuntji lino. ²⁷ Mbunga yaManase kapi vatjidire vantu vatungiro muvitata vyaBethShan nadimukunda dasho, ndipo Taanach nadimunda dasho, mpiri ovo vatungiro muDor nadimukunda dasho, ndi novo vatungiro muIbileyamu nadimukunda dasho, mukonda vavo ovo vatungiro muMegido nadimukunda dasho, mukonda vaKanani kwavapulidilire mushirongo sho. ²⁸ Apa vayankondopalire vaIsraeli, avatininiki vaKanani vavaruwanene muviruwana vyavidito, ngoli kapi vavatjidiremo navantje vapwe. ²⁹ VakaEfurayimu kapi vatjidire mo vaKanani ovo vatungiro muGezera, ano vaKanani avatwikiri kutunga muGezera kumwe navo. ³⁰ VakaZebuluni kapi vatjidiremo vantu vatungiro muKitironi ndi vantu vatungiro muNahaloli, makura vaKanani avatwikiri kutunga kumwe navo, ngoli vaZebuluni avatininiki vaKanani mukuvaruwanena muviruwana vyaghudito. ³¹ VakaAsheri kapi vatjidiremo vantu vatungiro muAkko, ndi vantu vatungiro muSidoni, ndi ovo vatungiro muAhilabu, Akizibu, Heliba, Afeki, ndi Rehoba. ³² Makura rudi rwa Aseri aruttungu kumwe navaKanani (Ovo vatungiro mushirongo), mukondashi kapi vavatjidire mo. ³³ Rudi rwaNafitali kapi vatjidiremo ovo vatungiro muBete Shemeshi, ndi ovo vatungiro muBete Anati. Makura rudi rwaNafitali avatungu kumwe navaKanani (vantu ovo vatungiro mushirongo sho). Ano ngoli, vatungimo vaBete shemeshi navaBete Anati avavatininiki mukuruwana viruwana vyavidito vyavaNafitali. ³⁴ VaAmori avatininiki varudi rwaDana mukutunga mushirongo shandundu, kapi kavavapulitiranga mukughurumuka muliyana. ³⁵ Makura vaAmori avatungu pandundu ya Heresi, muAiyaloni, namuShalibimu, ngoli vakavitavankondo vamulira lya Josefa avavafundu, nakuvatininika mukuvaruwanena viruwana vyavidito . ³⁶ Murudi wavaAmori kwayenda kutundilira kundundu ya Akirabimu paSela dogoro mushirongo shandundu.