¹ Mpo ngoli ashi tuhamenu kwavi twa yuvha, ngatupire kupempuka. ² Nkene ashi mbudi oyo yayiro kupitira muva engeli ya karo ya ushili, kehe uno urunde na kupira kutikitamo veta ngava kawana matengeko, ³ omo ngatu katunda mone weni nkene kapituna kutambura liparu lya linene! Liparu lya linene olyo ahovilire kuyivita mwene Hompa ntani vana kuyivita kukwetu ovo vayiyuviro. ⁴ Waronka Karunga atapa ma ungambi nakuneyeda vivyivito, navitetu ntani naviruwana vyankondo vyakutunda kuma ushwi ghampepo ya kupongoka, momu avishanine mwene. ⁵ Untungi unotuna kuyuvita ogho ghuna kuyo, Karunga kapi nga utapa ukare mulipangero lyava engeli. ⁶ Ano ngoli muntu ghumwe kwa ngambipara ashi: "Muntu nani shininke munke, ovyo wa mutulira nunaghano? Ndi mona Muntu, mukonda munke umu parekera mbili? ⁷ Wamudipita vamupitakane va engeli shirugho shashifupi: mbyo wamupa nkata wamuyerepeka nalifumano. ⁸ Mbyo wa mutura akare mupangeli wanavantje." Kutanta ashi Karunga kwatura navintje vikare mulipangero lya muntu. Kwato oshi apira kutura mulipangero lyendi.Ano ngoli weno kapituna kumona waro ashi untungi mulipangero lyendi unakara. ⁹ Weno kuna kumona, Yesusa, ogho vadidipitire shirugho shashifupi vamupitakane va engeliweno ntantani vana ghuyerere na lifumano konda ruhepo rwendi na mfa, mukonda ya nkenda ya Karunga ashi ngafere vantu navantje. ¹⁰ Vya wapa kwa Karunga, mukonda ashi navintje mumwendi vyatunda ntani mushiti wa navintje, ngatwa vana vendi mughuyerere. Mposhi uye nyakare muyogholi walipuro lyavo mpo ngoli ashi ruhepo rwendi rutikiliremo. ¹¹ Navantje kumwetupu mupomgoli na vapongoli shavo umwetupu. Ghuye kwato ntjoni mukavatwenya ashi va ghunivande. ¹² Ghuye kwaghamba ashi, "Ame nganitangauka lidina lyoye kuva ghunivande, Ame ngani kuyimbira mukatji ka Mbunga yoye." ¹³ Shimpe nka, "Ame nganiku huguvara." Shimpe nka, "Kengenu, ame uno novanuke ovo atapa kukwande Karunga." ¹⁴ Mpo ngoli ashi, momu vakara vanuke pa rutu na honde, naye mbyo akufana navo pankedi ndjoyo, mposhingadjonaurepo mfa dogho akaro nalipangero lya mfa, uye ndje, Satana. ¹⁵ Ghuye mukuruwana weno ghamangurura navantje ovo vakararo muukaro wa ghoma na upika wa kutjira mfa. ¹⁶ Vya ushili shinka shendi kapishi sha kukwafa vaengeli, ngoli mukuvatera ruvharo rwa Abrahamu. ¹⁷ Mpo akarera hepero ghuye akufane nava unyendi mumaruha naghantje, mpo ngoli ashi ngakare mupristeli wavo wamunene wankenda wa kulimburukwa kwa navintje vya hameno kwa Karunga, nga gwanikite dimuhoko na kudongonapo ndjo davo. ¹⁸ Mukonda Yesusa mwene kwa kalire muruhepo na mumasheteko, mpo avhuliranga kukwafa ava vana karo mumasheteko.