¹ Weno, tuna kara nambunga yayinene ya vambangi oyo yina tukundurukido, tushuvenu ngoli mudgho wa ndjo odi dina tungilikido. Makura tudukenu na lididimiko mumarumbatano oghano ana karo kumeho yetu. ² Tukengenu mantjo ghetu kwa Yesusa, mukonda ashi lipuro ndje alitameko ntani mbyo alitikitiliramo. Ghuye kwa kudidimikira mfa da pa shikurushe, kapi aku fire ntjoni, ghuye weno akashingira kurulyo rwa lipuna lya Karunga. ³ Ghayarenu ngoli, ogho akudidimikiliro unkore wa kuhurapo omo vamuruwanine vakandjo, mposhi mudire kuroroka na kudompa mutjima. ⁴ Mukurwana kwenu nandjo shimpe kapi muna rwana dogoro mumfa dene-dene; ⁵ Anwe kuna vhurama makorangedo ogho vatapa kwa vana vaKarunga ashi: "Monande, kapishi udine lipuro lya Hompa, ntani washa dompa mutjima nkene kuna kukuvyukita mundjira ya uhunga. ⁶ Mukonda ashi Hompa kuvyukita kehe uno ahora, ntani kutengeka vana ovo vayo kukwendi." ⁷ Muna hepa kudidimika nkene kuna kumuvyukita. Karunga kuvyukita vana vendi. Ndi mpwali mona ogho vapiranga kuvyukita vashe? ⁸ Nkeneshi anwe kundereko ukaro wa uwa, ogho vakara nagho vana navantje, anwe vamushwa kapishi muvana vendi. ⁹ Mukuwederako, atwe twakara na vashetu va palivhu va kutuvyukita ano ngoli shimpe twava fumadeka. Tuna hepa kulimburuka unene kwa shetu wapa mpepo ngatu kakare namonyo! ¹⁰ Vashetu vapano kutuvyukita tupu shirugho shashifupi kutwara mu ukonentu wavo. Ano ngoli Karunga kutu vyukita ngatu kawanenemo maghuwa ghetu, ntani natwe ngatujawaneko kughupongoki wendi. ¹¹ Shirugho nashintje sha kukuvyukita kapishi sha kuyita ruhafo, mposhi ukore. Ano ngoli kuruku kukayita mbili ya ukaro wa uhungami kwavo vapito madeghuro gha weno. ¹² Weno yerurenu maghoko ghenu gha kupira nkondo ntani shaghekenu kukankama mungoro denu. ¹³ Yendenu mundjira ya kuvyukilira, mposhi vantu vavirema vaveruke uvera kapishi ukuwederere. ¹⁴ Kondjenu kukara nampora na kehe uno, ntani karenu mughupongoki, mbyovyo ashi nkene ghupirapo kapi ngamukamoumona Hompa. ¹⁵ Takamitenu ashi kundereko umwe mukatji kenu wakutunda ku nkenda ya Karunga, ndi akare yira ndandani ya ghureru vavangi ku ushungi wayo. ¹⁶ Kehe uno wa rushonda ndi mundjoni wa kufana yira Esaghu ogho aghulitiro umbeli wendi kundjwata muyusha umwetu. ¹⁷ Mwayiva ashi kuruku ya shirugho, ahanine ashi akare mupingi wa matungiko ava mushwena, mukondashi kapi pa kalire livango lya kupulitira.likutjindjo ashi likarepo, ghu kwa ghuholire unene dogoro alilirimo. ¹⁸ Anwe kapi mwaya yira momu vayire va Isragheli kundundu ya Sinayi ya kuvhura kuguma muntu ya kutwedera mundiro, ndi mundema, ndi dovera, ndi likundungu oli lya kaliroko. ¹⁹ Kapi mwaya ku liywi lya marumbendo, na liywi lya kudameka unene opo valiyuvire ava kanderere ashi kapishi lighambe navo. ²⁰ Mukonda ashi vavo kapi vavhulire kukudidimikira mpangero odo vavapire ashi, "Kehe shino shikorama shina gumo kundundu, vashi dipaye na mawe." ²¹ Limoneko lya udito unene lya kaliro makura Mosesa aghamba ashi, "Ame natukuka kuna kukankama." ²² Mpo ngolishi, anwe kwaya kundundu ya Siyoni kushitata sha Karunga wa monyo, ku Jerusalema ya muliwiru na mayovi ghava Engeli vana karo mushipito. ²³ Anwe kwaya ku lipongero lya mbunga Kriste ya mbeli, kwavo vatjanga muliwiru. Anwe kwaya kwa Karunga, mupanguli wanavantje ntani na mpepo da vahungami ovo vatikiliromo. ²⁴ Anwe kwaya kwa Yesusa, ogho ayito likukwatakano lyalipe, ntani honde yendi kwa tekera papetu yayo kughamba vyaviwa kupitakana ya Abeli. ²⁵ Kengenu walye muna kupira kutambura liywi lyagho ana kughambo nanwe. Vavo kapi vavhulire kutundamo mukondashi kapi vavhulire kulimburuka kumarondoro ogho vawanine pano pa livhu, omo ngaghukavhura kutundamo ne weni nkene ghuna shwena kulimburukwa kwagho wa muliwiru ogho ana kughambo nove. ²⁶ Pamwe, liywi lyendi kwakankamitire livhu. Ano ngoli shirugho shino ghuye kwa ghamba ashi, "Shimpe nka shikando shino kapishi livhu pentjako ngani kankamita, nani ngoli na liwiru nalyo. ²⁷ Odino nkango, "Shmpe nka," kutanta ashi kushorora nawa-nawa vininke ovyo vashita, ngava vikankamite ngavitundepo makura vya kupira kukankama ngavi karerepo. ²⁸ Mpongolishi, mukukawana untungi wa kupira kukankama, tupandurenu ntani tuwaperenu Karunga nakumuruwane na lifumadeko na utjirwe. ²⁹ Mukondashi Karunga wetu mundiro wa kuveveka.