¹ Makura Karunga aghamba na Noah ashi, ''Yiya nove nava kalipata lyoye, muwato mbyo vyoshi nakumono ove tupu muhungami pavantu ava. ² Pavikorama navintje vya kukushuka shimba vikorama ntambiri vya virume ntani ntambiri vya vkadi. Pavikorama va kudira kukushuka, shimba viviri vya virume na vya vikadi. ³ Vidira vya kuyendera muwiru, ntambiri vya virume ntani ntambili vya vikadi, mposhi shirughana kehe shikorama na shidira ngavi kuvaratane nka pantunda ya livhu. ⁴ Ngapa pita mayuva ntambiri ngani renkita mvhura yiroke palivhu mayuva dimurongo ne ntani matiku dimurongo ne. Ngani djonaura palivhu vina mwenyo navntje ovyo na shita.'' ⁵ Noah aruwana navintje evi amuraulire Karunga. ⁶ Opo rwayire ruhandjo palivhu Noah ghuye kwakalire namwaka mafere matano-namwaka umwe. ⁷ Makura Noah, vana vendi, mukamali wendi, na vakamali vavana vendi navantje ava yendi kumwe muwato mukonda ya ruhandjo rwa mema. ⁸ Vikorama va kukushuka navikorama vya kudira kukushuka, vidira, navintje vyaku hovana palivhu, ⁹ Viviri viviri, vyavi rume navi vyavikadi, aviya kwa Noah nakuronda muwato, yira momo tupu Noah amutantilire Karunga. ¹⁰ Apa ghapwire mayuva ntambiri, ruhandjo rwa mema mpo rwa valikire palivhu. ¹¹ Opo atikire Noah mwaka mafere matano na mwaka umwe, mu mwedi wa uviri, mumwedi ngogho mumayuva murongo na ntambiri, ndyo lyo liyuva, marunone naghantje gha manene gha kuntji agha gharuka, ntani makende gha muliwiru nagho agha gharuka. ¹² Mvhura ayi vareke kumwe na kuwa palivhu mayuva ronane matiku na mwi. ¹³ Muliyuva ndyo lyo Noah na vana vendi, Sem, Ham, na Japhet, na mukamali wendi ntani vakamali vatatu vavana vendi ava rondo muwato. ¹⁴ Vavo kwa rondire nakehe shikorama sha muwiya kutwara kurudi rwavyo, ntani navimuna kutwara kurudi rwavyo, ntani navikorama vya kughavana, navintje evi vyahovana ngo palivhu kutwara kurudi rwa vyo, ntani navidira kutwara kurudi rwa vyo, kehe shino shishitwa shakaro namavava. ¹⁵ Kehe vishitwa va shita na nyama ovyo vya kaliro na mpepo paru kwayire kwa Noah kumwe nakungena mu wato. ¹⁶ Vikorama ovyo vya yendiro vya virume na vya vikadi ovyo vashita na nyama, avi ngene yira momo tupu avi muraulire Karunga. Makura Karunga aghara livero kunyima yavo. ¹⁷ Makura ruhandjo aruya pantunda yalivhu ayiroko mayuva dimurongo ne, ntani mema agha vhuka makura wato aghuyeruka. ¹⁸ Mema mpo ngoli afikilire livhu nalintje, natni liwato ali pupana pantunda ya mema. ¹⁹ Mema agha furu unene ndundu dadinene nadintje adi ngene mumema, liwiru nalintje ali kufiki. ²⁰ Mema agha furu kupitakana mpadi murongo na ntano kuwiru do ndundu. ²¹ Vinamwenyo navintje vya kaliro palivhu avi fu, vidira, vimuna, vikorama, navishitwa navintje ovyo vya tungiro mu nomora ya yinene, na vantu. ²² Vishitwa navintje ovyo vyatungiro palivhu, ovyo kavisheterango munku waliparu kupitira mumayuru, navintje vya fire. ²³ Makura vishitwa navintje ovyo vya kaliro pantunda yalivhu avavi djonaurapo, vantu na vikorama na vikora vya kughavana palivhu na vidira vya muwiru. Navintje avavi djonaura po. Noah tupu navo arondire navo mumwato mbo vahupaliropo. ²⁴ Mema mpo akalire palivhu shirugho sha kutika mayuva lifere limwe nadimurongo ntano.