¹ Hompa kwamonikire Abrahamu pamaunyandi gha Mamre, ghuye Abrahamu kuna shungiri palivero lya tende yendi, mwi pamutwe katji waliyuva. ² Apa ashapukire amono vakafumu vatatu vana yimana kuuto wendi. Apa ava monine makura aduka palivero lyatende yendi, makura ava dukiri aka gwanekera navo ano atu ngoro kumwe nakunyongeka shipara shendi mulivhu. ³ Aghamba ashi, ''Hompa wande, ntjene nawana uwa mumantjo ghenu, nakanderere mwasha pitakana mupika wenu. ⁴ ''Renkenu nikayiteko tu mema, muya kukushe kumpadi denu, mupwiyumukeko muno mushitondo. ⁵ Renkenu nimuyitire twakumakera, mu waneneko nkondo. Ano opo munana ntani mutwikira naruyendo rwenu, mukondashi nwe kunaya mumundi wa mupika wenu.'' ava limburura, ''Rughana tupu yira moomu una vighamba.'' ⁶ Abrahamu ayendi mutend, atantere Sara ashi, ''Kwangulitako, ghupa vikumba vitatu vya utura wa naaka-naaka uduve ukange mboroto.'' ⁷ Abrahamu adukiri ngombe, aka ghupa ntana yayiwa yakuneta, ayapa kwamukareli wendi, akwangulite kuyiwapayika. ⁸ A ghupu maghadi na mashini na nyama, makura ava vikutuliri, evi vana kulya, ghuye kuna vayimanene mu mundulye. ⁹ Ava mupura ashi, ''Mukamali ghoye Sara ne kuni ana kara?'' ghavalimburura ashi, ''Mpwali mutende.'' ¹⁰ Guye a ghamba, ''Kuna kukutwenyidira ashi, mumakwedi matano na mane mukamali ghoye Sara ngakuwanena mwanuke wamumati, shirugho sho ntjo ngani kaya nka.'' Sara ghuye kuna kuteghererera pa livero lya tende, eyi yakaliro kuruku yendi. ¹¹ Abrahamu na Sara kwakurupire unene, ghuye Sara apitapo pa mwaka dakuyita. ¹² Sara akushepe mwene, aghamba kwa ghumwendi ashi, ''Muntu ame nakurupo weno namukafumu wande akurupa, uwa munke nka niwana?'' ¹³ Hompa apura Abrahamu ashi, ''Nke ana kushepa Sara nakughamba ashi, 'Kunivura kuyita mwanuke, ame nakurupa?' ¹⁴ Ndi walye mpovili vyavidito vyamuvuro Karunga? yira moomu naghamba opo ngani kavyukirako kuno mwaka ogho una kukwamoko Sara nganiya muwana namona wamumati.'' ¹⁵ Ano Sara akanana ashi, ''Kapi nashepe,'' mukondashi ghakalire na ghoma. A mulimburura, ''Hawe, una shepe.'' ¹⁶ Makura vakafumu ava shapuka vayende nakukatwikira ruyendo kuSodomu. Abrahamu naye aka yenda navo ava tindikideko. ¹⁷ Ano Hompa a ghamba ashi, ''Kapi nivura kuhorekera Abrahamu evi nakumurughanena, ¹⁸ mbyevishi ruvaro rwendi ngarukara waunene wankondo, ano dimuhoko nadintje dapalivhu nganidi tungika mupitira mwendi. ¹⁹ Mbyovyoshi ame kwamutoghorora ashi nga tantere vana vendi namulira lyendi lyakumeho ashi ngava limburukwe kudimuragho daKarunga, pakurughana virughana ovyo vya hungamo, ntani munduwanene navintje evi namu twenyidira.'' ²⁰ Ano Hompa a ghmba ashi, ''Mukondashi rulilito rwa vaSodomu na vaGomora runene unene, mbyevishi ndjo davo di dito unene, ²¹ ame naku urumuka nika kenge ntjeneshi vya shiri vavo kuna kurughana yira moomu yinaya ngwana yino nkugho, ntjene mo vyaushiri vavirughana. Ano kapishi mo, kuni kaviyiva nka.'' ²² Ano vakafumu vyukamo tunda panya, nakuka yenda kuSodomu, ano Abrahamu ayimana mpopanya kushipara sha Karunga. ²³ Makura Abrahamu ashwene pepi nakupura ashi, ''Nava hungami navo kuna kuva djonaura kumwe nava dini Karunga ndi? ²⁴ Nangeshi omo mushitata vahungami dimurongo ntano. Navo kuna kava djonaurapo molyo livango un kudira kufera nkenda, morwa vahungami dimurongo ntano vana kara mo ndi? ²⁵ vyaushiri nakuvurashi udjonaure vahungami kumwe nava dini Karunga. Ngoli kuvura urughane vahungami kumwe na dini karunga , ure nakara navy me vyo! kapi ngaka hungameka kupangura nani?'' ²⁶ Karunga alimburura ashi, ''MuSodomu nange niwanemo vahungami dimurongo ntano shitata osho kuni kashishuva morwa vahungami mo ovo dimurongo ntano.'' ²⁷ Makura Abrahamu alimburura ashi, ''Kenga, ame kuna kudivi mumantjo,nighambe naHompa, mpindi moomu nakara mbundu na mutwiti! ²⁸ Pavahungami vano dimurongo ntano ntjeneshi papire vatano? mbyo ngoli mudjona wirapo shitata nashintje morwa vana piripo vahungami vatano ndi?'' Hompa alimburura ashi, ''Hawe, ntjene niwanemo vahungami dimurongo ne navatano, kapi nishidjonaura shitata.'' ²⁹ Ghuye aghamba naye nakumupura ashi, ''ntjene ngoli mukawanamo dimurongo ne tupu?'' Karunga alimburura ashi, ''Naposhi nakushidjonaushi mukonda ya mbovo vantu dimurongo ne.'' ³⁰ Abrahamu aghamba ashi, ''Hompa, washa garapa, mbyevishi me nahoro shimpe kughamba. Makura weni ntje uka wanemo dimurongo ntatu tupu?'' Hompa alimburura ashi, ''Napo nakuvirughanashi, ntjene niwaka wana mo dimurongo ntatu.'' ³¹ Abrahamu a ghamba nka ashi, ''Hompa ndi kapishi ugarape, mbyevishi me nahoro shimpe kughamba. Ntjene ngoli dimurongo mbiri tupu mo?'' Hompa a limburura, ''Naposhi kunishishuva morwa mbovo dimurongo mbiri tupu.'' ³² Makura Abrahamu aghamba ashi, ''Hompa ndi kapishi ugarape, mbyevishi me kunahoro shimpe nighambe rwa kuhulilira. Gheee, ntjene ngoli ukawane mo vahungami murongo tupu?'' Hompa a limburura ashi, ''Naposhi kuni shuva morwa mbovo murongo.'' ³³ Hompa apa amanine kughamba naAbrahamu, makura aka yenda , ano Abrahamu naye a vyuka kumundi wendi.