¹ Weno Mosesa shimpe akara mushita wavivunda vya Jethro tamweyi yendi, muruti waMidiyani. Mosesa a pipitire shivunda kuruha rwa ure namalitiro ano akatika kuHorebu, ndundu yaKarunga. ² Okunya muengeli waHompa a mumonekere mushite shamundiro mushishwa. Mosesa a kenge, ano amona, shishwa kuna kuhwama, ano ngoli shishwa kapi sha pire. ³ Mosesa a ghamba ashi, ''Kuni shwena pepi nakumona eli limonekero. Mukonda munke shina kudira kupya.'' ⁴ Apa Hompa a monine ashi ana shiuka aye kuntere muku mona. Karunga amu kughu kutundilira mushishwa nakughamba ashi, ''Mosesa, Mosesa.'' Mosesa a limburura, ''Ame uno.'' ⁵ Karunga amutantere, ''Washa shwena nka pepi! ghupako nkaku kumpandi doye, elino livango una yimana livhu nakutulira ame.'' ⁶ A wederereko, ''Ame Karunga wavasho, Karunga waAbrahamu, Karunga waIsaaka, naKarunga waJakopo.'' Ano MOsesa aku fiki kushipara, mukondashi akalire nautjirwe wakukenga Karunga. ⁷ Karunga a ghamba, ''Ame namona ruhepo rwa vantu vande vakaro muEgipute. Ame nayuva dimutaku davo konda yava Kurona vamushirongo vana kuvahepeko, kovyo nayiva kuhamena runyando rwavo. ⁸ Ame naghurumuka mukuyava mangurura munkondo dava Egipute kumwe nakuvaghupamo mushirongo shinya nakuvatwara mushirongo shashiwa, shirongo shashinene, shirongo shapupango mashini naghushi, kuruha shirongo shaKanana, vaHeti, Amoli, Peresi, vaHevi, kumwe navaYebusi. ⁹ Weno mutaku waIsraeli unaya kukwande. Vavayingi, namona mundjira oyo vavahepekanga vaEgipute. ¹⁰ Makura weno, Ove nakukutuma kwaPharao mposhi ghuka shimbe vantu vande, vantu vaIsraeli, muEgipute.'' ¹¹ Ano ngoli Mosesa a ghamba kwaKarunga, ''Ame are, ashi niyende kwaPharao nakukashimba vantu vaIsraeli muEgipute?'' ¹² Karunga amu limburura ashi, ''Ngani kara kehe pano nove. Eshino ngashikara shiyivito kukoye ashi me nakutumo. Opo ngoka ghupa vantu muEgipute, ngamuya nkandereranga kuno kundundu.'' ¹³ Mosesa a ghamba kwaKarunga, ''Opo niyenda kuvantu vamuIsraeli nakukava tanterashi, 'Karunga wa vanyakulyetu ana ntumu kukwenu,' ano opo ngava kampura me ashi, 'Are lidina lyendi?' vinke ngani kavatantera?'' ¹⁴ Karunga alimburura, '' Ame ne ame.'' Karunga a ghamba, ''Ghuna kona kukavatantera vantu vaIsraeli ashi, ''Ame nakutumo kukwavo.'' ¹⁵ Karunga a tantere Mosesa nka ashi, ''Ghuna kona kukavatantera vantu vaIsraeli nka ashi, 'Hompa, Karunga wavanyakulyenu, Karunga waAbrahamu, Karunga waIsaaka, Karunga waJakopo, ana ntumu kukwenu. Olino ndyo lidina lyande na naruntje, ntani nka oshino mo nganishi pungura mu maghano kumaruvaro naghantje.' ¹⁶ Yenda nakukapongeka vakurona vaIsraeli pamwe tupu. Ghukavatantere ashi, 'Hompa, Karunga wavanyakulyenu,Karunga waAbrahamu, Karunga waIsaaka, naKarunga waJakopo, ana monekere ano mpo ana ntantere ashi, 'Anwe a kengeranga kehe pano ntani nka kwavi monanga evi vamurughananga muEgipute. ¹⁷ Ame navatwenyidiri mu kuvaghupa mu mahepeko ghamuEgipute nakuvatwara kushirongo shavaKanana, Hitite, Amori, Peresi, Heviti, naYebusi, shirongo shapupo mashini naushi.'' ¹⁸ Kuvakakuteghererera. Ove navakurona va vaIsraeli muna kona kukayenda kwa Hompa wamuEgipute, nakukamutantera ashi, 'Hompa, Karunga Heberu, ana gwanekere natwe. Ano weno tuyendenu muruyendo rwamu mburundu, mposhi tuka djambe kwaHompa, Karunga wetu. ¹⁹ Ngoli nayiva ashi Hompa waEgipute kapi ngamupulitira muyende, nkwandi kupitira mulighoko lyakupongoka. ²⁰ Ngani ghorora lighoko lyande nakuva homona vaEgipute navitetu navintje ovyo ngani ruwana mukatji kavo. Kutunda po, ngamupulitira muyende. ²¹ Nganipa vano vantu uwa wakutunda kuvaEgipute, mposhi opo ngamuyenda, kapishi ngamuyende maghoko ghoko. ²² Kehe mukamali ngapura vamuvatere mawe ghamulyo gha siliveli nangorodo navidwata kuvaEgipute vamushinda na kehe mukamali ogho akaro mumundi wava mushinda. Ngamuvatura pavana venu va vakamali na vana venu va vakafumu. Mundjira yino ngamuvaka mauwa kuvaEgipute.''