¹ Oghano ngo madina ghava vana vaIsraeli vavakafumu ovo vayiro muEgipute naJakopo, kehe uno navikwalita vyendi: ² Reubeni, Simeoni, Levi, naJuda, ³ Isaka, Zebuluni, naBenjamini, ⁴ Dani, Naphtali, Gadi, naAsheri. ⁵ Vantu navantje ovo mbo va ruvarwa rwa Jakopo vavo kwakalire dimurongo ntambili mu muvaro. Josefa kwa kalire kare muEgipute. ⁶ Makura Josefa navakuru vendi vavakafumunavantje, muhoko nauntje wafire. ⁷ Ano ngoli vaIsraeli kwakalire naruvaro, mbyo vakuvukire unene muruvaro, ava kara nankondo, mushirongo shavo amuyura muhoko wavo. ⁸ Opo mpo a shapukire Hompa kuvaEgipute, umwe ogho a diliro kuyiva Josefa. ⁹ A ghamba kuvantu vendi ashi, ''Kengenu, vaIsraeli vayingi ntani vavo nka nkondo kupitakana twe. ¹⁰ Yiyenu, renkenu tuva neghede ndunge, vadire kukuvaratana, manashi vakuvukita mushivaro, ntani nka ntjene vita viye, kuvura ngakukwatakane navankore vetu, vaturwite, nakushuva shirongo shetu.'' ¹¹ Ano mpo vatulirepo lirughanito lya lihepeko nakuvapa virughana vyaudito. VaIsraeli mpo vadikire nkurumbara yayinene yaPharao naRamesesi. ¹² Ano ngoli nampindi moomo va vahepikre vaEgipute, vaIsraeli mpo vakuvukitire unene na kukuhanena mushirongo. Ano va Egipute mpo va valikire kukoka vaIsraeli. ¹³ VaEgipute vatulire vaIsraeli nakuvaruwanita naukenya. ¹⁴ Vaditopitire maparu ghavo mukuvapa virughana vyaudito mukudika mawe navirughana navintje vya mumafuva. Navintje virughana vyavo vyakalire vya udito. ¹⁵ Makura Hompa wavaEgipute a ghamba kuvakakushampurukita, umwe wavo ndje Shiphra naPua. ¹⁶ A ghamba ashi, ''Ntjene ngava shampurukita vakamali va vaHeberu, vakengerangenu, opo ngava shampuruka. Ntjeneshi mwanuke wamukafumu vana shampuruka muna kona kumudipagha ano ntjeneshi wamukamali kumushuva tupu a pare, ¹⁷ Ano ngoli vashumpurukiti mpo vakalire naghoma kwaKarunga ano kapi avi rughanine yira moomu avimurawilire Hompa wavaEgipute kukwavo, mulivango lyakuivadipagha, vavo ava shuvu vanuke vavamati vapare. ¹⁸ Hompa waEipute ava garapere nakuvatantera ashi, ''Nke muna rughanene vyakufana weno, ntani nke muna parwiri vanuke vavamati mulivango lyakuvadipagha?'' ¹⁹ mukakushampurukita a limburura Pharao ashi, ''Vakamali vavaHeberu kapi vakara yira vakamali vavaEgipute. Vavo vakara naukoli ntani nka vavo kukushampurukita naumwavo kumeho yaku yita mushampurikiti kukwavo.'' ²⁰ Karunga a kungu vakakushampurukita vano. Vantu ava yingipa mushivaro nakukara nankondo unene. ²¹ Mukondashi vakakushampurukita vanya vatjilire Karunga, ghuye ava pe liro. ²² Pharao arawiri vantu vendi navantje, ''Muna kona kuvukuma kehe mwanuke wamukafuma ogho vana shampuruka, ano ngoli vavakamali kuvashuva vapare.''