¹ Edino ndo nkango da mushongi, vamuhoko wa David ntani hompa wa Jerusalem. ² ''Kwato kutanta vintu! Kwato kutanta vintu! aghamba mushongi.'' Ushili vene kwato kutanta vintu! Kehe vino kapi vya kutanta vintu!'' ³ Viyeramo munke ngawana muntu muvirughana navintje ovyo arughana mumwi? ⁴ Likutjindjo lyaudjuni kupita, ntani likutjindjo lyaudjuni kuya, ene ngoli livhu lyalyo ngoli mo ngalikara nanaruntje. ⁵ Liyuva kupuma, ntani katoka nka kumwe nakukwangura kuvyuka kumavango oko lyakapuminanga. ⁶ Mpepo kuyunga ucuma ntani kukudinga kuumboyera, kehe pano kuyenda kukudinga mundjira yayo ntani nakuya nka shimpe. ⁷ Dimukuro nadintje kupupira mulifuta, ene ngoli lifuta kapi ngaliyura. Kumavango ogho ghayendanga mukuro, nko nka ngaghayenda shimpe. ⁸ Kehe vino vininke ngaviyitanga liroroko, ntani kwato ogho ngavishingonono. Mantjo kapi ngavagha tikitiliramo kovyo ghamonanga, matwi kapi ngavagha ywidilira kovyo ghayuvanga. ⁹ Kehe shino shakaro mbyo ngashikara, ntani kehe vino varughana mbyo ngava rughana. Kwato vininke vyavipe kuntji ya liyuva. ¹⁰ Mpovili ko nka vimwe vyakuhamena ko vyakughamba, 'Kenga, evino vipe'? Kehe vino vina karoko weno vyakalireko kare, mumwaka odo dayiroko kare kumeho yetu. ¹¹ Kwato ogho ana kumoneko a vuruke vininke ovyo vya shorokiro muruvede rwavadimu, ntani vininke ovyo vya shorokiro kuruhulilira, ntani vininke ovyo ngavishoroko kumeho kwato ogho ngahoro kuvivuruka nka.'' ¹² Ame mushongi, ntani nka nakalire hompa kuvaIsraeli muJerusalem. ¹³ Natulireko ndunge dande mukushonga ntani nakupapara mukotoki kehe vino ovyo varughananga kuntji ya liwiru. Lipaparo lino kwayita shinka shavirughana osho apa Karunga kuvanuke vavantu vakara virughana nasho. ¹⁴ Nakenga virughana navintje ovyo varughanangakuntji ya liyuva, ntani kenga, navintje kwato vyo vyakutanta ntani yira kuna kutjida ukakwate mpepo. ¹⁵ Vininke ovyo vyalimango kapi ngava videra! Vininke ovyo vya kombano kapi ngava vivarako! ¹⁶ Naghamba kumutjima wande, nakughambasi, ''Kenga, nina wana ukotoki waunene kwanavantje ovo vakaliroko kumeho yetu muJerusalem. Ndunge dande dina kenge ukotoki waunene ntani unandunge.'' ¹⁷ Mposhi natulireko mutjima wande niyive vininke vyaukotoki ntani vya upurumuke nevi vya uvaya. Nayire niya yuve nawa ashi odino nkondo da kukunga mpepo. ¹⁸ Mposhi muunene waukotoki kwakaramo ugara waunene, ntani ogho wakuyerura unandunge kuyerura likuyuvo lyalidona.