¹ Apa ngamu rupuka mudivyuke kamba yava nankore venu, na kumona nkambe, turkara, na vantu ovo vapitakano pa muvaro wenu, anwe nakufashighoma, Hompa Karunga wenu nga kara kumwe nanwe, ghuye ndje a kuyito kutunda kushirongo sha Egipite. ² Apa mu tika kuvita vya mangeneno gha mukamba, varuti vana kona kupukurura na kughamba kumbunga. ³ Ghuye ana hepa kughamba kukwavo, ' Tegherera, Israel, anwe kuna kuyenda kukamba mukudivyuka vana nkore venu. Mwasha renka dimushima denu didompe, mwasha tjira ndipo mukankame. Mqwasha vatjira. ⁴ Kovyo Hompa Karunga wenga ndje ana kuyendo nanwe a murwerepo kudivyuka vana nkore wenu nakumupopera.' ⁵ Vna mberegho vana hepa kughamba ku vantu nakuvatantera, mpwali mukafumu ogho a diro ndjugho yayipe ngoli a hana kuyipongora ndi? kumurenka a vyuke kundjugho yendi, mpo shi kapishi a fe muvita makura mukafumu peke aka yi pongore. ⁶ Mpwali ghumwe ogho a tapeko shipata sha mandjembere makura a pire kukuhafita kunyango yasho ndi? Mu vyutenu kumundi mposhi kapishi a fe mukamba makura murume peke ngaka kuhafite kunyango yasho. ⁷ Mpwali mukafumu ogho a vandekero mukamali munkwara ngoli kapi amu kwara ndi? Mu vyutenu kumundi mpo shi kapishi aka fere mukamaba makura mukafumu wapeke ngamu kware. ⁸ Vanamberegho vatwikire kughamba kuvantu nakuva tantera, ' Mpwali mukafumu ogho ana karo naghoma ndi po mushima wendi wadompa? Mu renkenu a yende nakuvyuka kundjugho yendi, mposhi dimushima davaghunyendi dasha kara yira wendi. ⁹ Nangeshi vana mberegho vana mana kughamba kuvantu, vana hepa kunegha vampititi vakavita vavapititire. ^{10 11} Apa mushangumuka kuhomona mbara, ruwanenenu vantu ovo ndjambo yampora. Nangeshi vanatambura ndjambo yenu makura vamugharwire mavero ghavo, vantu navantje ovo muwanamo vakare varuwani vakumutininika nakumu ruwanena. ¹² Nangeshi kapi vana kutambura ndjambo yenu ya mpora, mulivango lyalyo vahororwerapo vita mukudivyuka, opo yimbandukirenu, ¹³ ano ntjeneshi Karunga wenu amupalifundo na kuvatura kuntji yampangero yenu, anwe munahepa kudipaya kehe mukafumu mumbara oyo. ¹⁴ Ene ngoli vakadi na vasheshughona, vivunda, na navintjeya vya karo mumbara, na madjonaghuko ghavyo, anwe vighupenu kumukwato vikare vyenu. Anwe ngamughongere vyamukwato wava nkore yenu, ovyo Karunga wenu ngatapa kukwenu. ¹⁵ Muna kona kuruwana murupe ndoruno na kuyenda kughuto kumbara nadintjeya odo damukaro ure, mbara odo dakaroshi kapishi mbara dadimuhoko odo dinakukwamoko. ¹⁶ Mumbara da vantu ovo Hompa Karunga wenu anakumupa mukukara upingwa wenu, kwato shakuparuka osho ngamu kashuva na monyo. Mulivango lyavyo, ¹⁷ muna hepa kuvadjonaurapo navantjeya: Va Heti, nava Amorite, vakanani, va Peresi, vaHivite, nava Jebusi, yira momo Hompa Karunga wenu amurawira. ¹⁸ Viruwanenu vino mposhi ngavadire ku mushonga mukuruwana pankedi kehe yino ya ndjira dona davo, shika momo vaviruwananga na vaKarunga, ngamudjona kwa Hompa Karunga wenu. ¹⁹ Apa ngamukundurukida mbara pashiruwo shashire, mukutulitapo vita vya kushidjonaura, nakudjonaurashi vitondo vyasho paku vitetaghura mukulimbe navyo. Mposhi anwe ngamulyeko,mposhi kapishi kuvitetaura. Ngoli ne kapishi shitondo sha lifuva lya mukafumu ogho ngamukundurukida nani? ²⁰ Nkwandi vitondo ovyo mwayiva ashi kapishi vya ndya, ovyo mbyo ngamudjonaura na kuvitetaura; nakuvitenda vikare vikwata mukudishora mbara oyo ngayitumbo vita nanwe, dogoro nange yiweko.