¹ Vapristeli, vava Levi, ntani varuvharo naruntje rwaLevi, kapi ngava kara nalivango ndi upingwa kumwe navaIsreal; vavo vana hepa kulya ndjambo yaHompa edi vana varughana pamundiro yira upingwa wavo. ² Vavo vana hepa kukara kwato upingwa mukatji kavaghuni vavo; yira momu avi ghamba kukwenu. ³ Lino likutapero kwalitapa kuvapristeli, kwalitapire kukwavo kutundilira kuvantu vakutapandjambo, yi kare shi yahove ndi ya ndjwi : Mapepe. ⁴ Kumbuto denu dakuhova, kuvinyu dadipe , ntani maghadi ghenu, ntani huki dakuhova kundjwi, muna hepa kuvapa. ⁵ Mukonda shi Hompa Karunga wenu a mu horoghoro kutunda mumarudi naghantje mukuyima nakurughanena mulidina lyaHompa, naye ntani vana vendi vavakafumu navantje. ⁶ Ntjene muLevi aya wa kutundilira kudoropa kehe yino yamuIsrael nayintje kutunda oko a tunga, ntani ana kare nashihoro shakutunda kumonyo wendi aye kulivango lyaHompa a horoghora, ⁷ makura a karere Hompa Karunga wendi yira vakuru vendi navantje vavaLevi, ⁸ vana hepa kukara nalivango lyakukufana navakafumu mukulya, uye a pungure evi vina kutundo kughupingwa walikoro lyendi. ⁹ Apa ngamu ka tika mushirongo eshi Hompa Karunga wenu ngamu pa, kapishi ngamu ngamukakuronge mukurughana virughana vyavo vyavidona vya dimuhoko odo. ¹⁰ Omunya kapi tuna horo kukawana mo mukatjikenu nampiri ghumwe ana kutapo ndjambo mukudjamba monendi wamukafumu ndi wamukamali pamundiro, kehe ghuno wakuvirughanita vyakuhamena vyavirohita ndi kutanta vyakuhamena maghunganga, ndi vyakuvarura viyivito vyakuwana kunkinda, ndi mughurodi, vya kuhamena kumaghupure, kehe ghuno wakurughana vyamafeno nampepo dadidona, ¹¹ ndi kehe ghuno wakurughana vyakuhamena vyamafeno a pukite vaghunyendi, ndi oghu a ghambaghurango kumwe nampepo davafe. ¹² Kehe ghuno wakurughana vino vyavidona kwaHompa Karunga kwavanyenga; Mukonda ya virughanadona vino Hompa Karunga wenu kapi mbyo ana kuva tjidiramokumeho yenu. ¹³ Anwe muna hepa kukara vakupira mapuko kumeho yaHompa Karunga wenu. ¹⁴ Dimuhoko dino ngamu kaditjidamo kapishi ngamu ka tegherere kovo varughanango vininke vyavirohita ntani vyaghunganga; ene ngoli anwe ko kukwenu, Hompa Karunga wenu kapi ngamu pulitira mu vi rughane. ¹⁵ Hompa Karunga wenu namu tumina vaporofete va kutunda mukatji kenu, ghumwe wavaghuni venu, yira ame. Anwe muna hepa kutegherera kukwendi. ¹⁶ Vino mbyo mwa pulire Hopma Karunga wenu paHorebu muliyuva lyashigongi, kuna kughamba, 'Renkenu kapishi tu yuvange nka liywi lyaHompa Karunga wenu, ndi kukenga mundiro wendi waghunene nka, ndi nga fu. ¹⁷ Hompa a ghamba kukwande, ' Evi vana ghamba viwa. ¹⁸ Ame ngani tuma muporofete kukwavo kutunda mukatji kavaghuni vavo, yira ove. Ame ngani tura nkango dande mukanwa kendi, ntani ghuye nga ghamba kukwavo navintje evi ngani murawira. ¹⁹ A vyo ngavi kara ashi kehe ghunontjene kapi ana kutegherera kunkango dande edi nga ghamba mulidina lyande, ame ngani va tengeka. ²⁰ Ene ngol intjene muporofete nga kutumba mulidina lyande, kunkango edi na diri kumurawira adi ghambe, ndi oghu wakughamba mulidina lyavakarunga navo peke, ogho muporofete nga fa mpopo.' ²¹ Vino mbyo muna hepa kughamba mulidimushima denu: ' Weni omo tu dimburura ashi mbudi eyi ana diri kughamba Hompa? ²² Anwe ngamu dimburura mbudi eyi ana ghamba Hompa apa muporofete nga ghamba mulidina lyaHompa. Ntjene ovyo vininke kapi ngavi kara ndi vi shoroke, ovyo mbyo vininke a dira kughamba Hompa ntani ovyo a ghambire muporofete mulikutumbo tupu, ntani anwe kapi muna hepa kumu tjira.