¹ Umbangi wakuhova ogho vatjanga, Theophilus, kwavatatilire navantje ovyo atamikire kuruwana Jesus nakuronga. ² Dogoro liyuva eli vamushimbire, muruku opo atapire mpangera kupitira mumpepo yakupongaka kuva apostles ovo ahorolire. ³ Muruku rwarunyando rwendi, kamonekenga kukwavo ashi shimpe muyumi omo vavhura kumudimburura. muma yuva dimurongone akushorolire kukwavo, ntani aghambire vyakuhamena ghuntungi wa Karunga. ⁴ Opo akugwanikire kumwe navo, ava rawiri kapishi vatundemo mu Jerusalem, ano ngoli kutaterera litwenyidiro lya vashe, kwavyo aghambire ,'' mwayuva kwande ⁵ Ashi John vyaghushiri kwayoyire namema, ano ngoli nwe ngava muyoya mumpepo yakupongoka pamayuva ghama sheshu.'' ⁶ Opo vapongire kumwe ava mupura,'' Hompa, oru ndoruvede ngaghu vyuta ghuhompa kuva Israel ndi?'' ⁷ Ava tantere ashi, ''ovyo kapishi vyakuyiva anwe ruvede na virugho ovo vyakuyiva vavava kutwara mumpangera yendi. ⁸ Ano ngoli ngamutambura nkondo opo ngayiya mpepo yakupongoka papenu, ntani ngamu kara vangambi vande namuvantje mu Jerusalem namu Judea nayintje na Samaria, ntani naku ghuhura waghudjuni.'' ⁹ Opo aghambire Hompa Jesus vininke vino, hava hokwera kukenga kuwiru, ava mudamuna, ntani liremo alimufiki kumantjo ghavo. ¹⁰ Ndava hokwera kunwika vankenge kuliwiru omo ana kuyenda, mpopo, varume vaviri vavo vanayimana kuntere yavo muvyuma vyavikenu. ¹¹ Ava ghamba ashi,'' anwe vakafumu vamu Galilee, nke muna yimanene pano nakukengaghura kuliwiru? oghu Jesus vana ghupu mukatji ketu vana mutwara kuwiru, ngaka vyuka waro yira moomo muna mumono kuna kayenda muliwiru.'' ¹² Opo vakavyukire ku Jerusalem vatunde kundundu oyo vatwenyanga shi Olives, oyo yakaro pepi na Jerusalem, mushiyenda shaliyuva lya Sabbath. ¹³ Opo vakatikire mpo varondire mundjugho yakuwiru, oko vakakalire. Vavo mbo Peter, John, James, Andrew, Philip, Thomas, Bartholomew, Metthew, James mona Alphaeus,Simon wamupampi na Judas mona James. ¹⁴ Navantje vakutuliremo nashitambo shimwe mundapero. Kumwe nava kamali ntani Maria vawina va Jesus ntani vaghuni vendi vava kafumu. ¹⁵ Muma yuva ngogho Peter mpo ashapukire mukatji kava kafumu vaghunyendi, kungungunikira kumadina lifere limwe nadi murongo mbiri, nakughamba shi, '' ¹⁶ vaghunyande, vyakalire heperoshi matjangwa anakona kutikamo, mpepo yaghambire kumeho mukanwa ka David kuhamena Judas, ogho apititiro ovo vaka kwatire Jesus. ¹⁷ Ghuye ghumwe wetu akaliro ntani atambulire ushwi mumbunga yino.'' ¹⁸ ( ngoli oghu mukafumu anaghuru lifuva naviyeramo ovyo ana wana mughudini mpo awire kuhova mutwe, ntani ruturwendi, arutaghuka, ntani namaghuru ghendi aghatjapurukamo. ¹⁹ Navintje vatungiro mu Jerusalem opo vaviyuvhire vyakufana ngoli, makura mpo valirukire olyo lifuva muliraka lyavo ''Akeldama,'' kutantashi, lifuva lya mponde.) ²⁰ '' Kwavitjanga mumbapira yama Psalms,' renkenu lifuva lyendi likare lirunda , ntani mwasha pulitira keheghuno aka tungemo'; renkenunka ghumwe wakukukarera aghupe livango lyendi lyaghu mpititi,' ²¹ Vinakara hepero, mpongolishi, ghunya ghumwe wavakafumu ogho katutatangoko ruvende naruntje Hompa Jesus kayangamo na kurupukamo mukatji ketu, ²² Kutamekera kuliyoyero lya John dogoro kuliyuva olyo vamuhupire papetu atunde mukatji ketu, ayire akare ngambi kumwe natwe mulivumbuko lyendi.'' ²³ Avatura vakafumu vaviri kumeho, Joseph oghu kavatwenyangashi Barsabbas, ogho varundumwine nka Justus, na Matthias. ²⁴ Mpo va rapilire nakughamba, '' Ove, Hompa, wayiva dimutjima nadintje davantu, shorora ngoli pavano vaviri oghu ghuna tuhororampo ²⁵ Aghupe livango muviruwana evi ntani ghu Apostle omo atudire Judas apiruke akayende kulivango lya mwene.'' ²⁶ Ava vavhukuminipo vihorolita, ntani shihorolito ashi kawera kwa Matthias, ava muwederere nava Apostles murongo naghumwe.