¹ Josiya kwakalire namwaka ntantatu apa tamekire kupangera, ghuye kwapangilire mwaka dimurongo ntatu na mwaka umwe mu Jerusalemu. ² Ghuye kwarughanine vya uhunga kumeho ya Hompa, ntani ayendi mundjira da Ndafita vanyakulyendi, ano kapi apirukire kukareshi kurulyo ndipo kurumontjo. ³ Mukwaka wa untantatu mulipangero lyendi, opo ghuye shimpe mumati ghona, ghuye atameke kupapa Karunga wa Ndafita, vanyakulyendi. Mumwaka wa murongo na mwaka mbiri, ghuye atameke kukenita muJuda na muJerusalemu kutunda kutunda kumavango gha varunde, ngundi da Ashera, na mafano gha kushonga ntani mafano gha kushepa gha kurughanita kuvikugho. ⁴ Vantu avabomaura vidjambero vya Bara kumeho yendi, ghuye atete vidjambero vya vidumba evi vyakaliro kuwiru. Ghuye atjora ngundi da Ashera na mafano gha kushonga, ntani mafano gha kushepa gha vikugho mwamudidi dogoro avikara mbundu. Ghuye amwayere mbundu pa mayendo ghovo kavavidjamberango. ⁵ Ghuye ashoro vifupa vya vapilisteli vavo pa vidjambero vyavo, ghuye akenita Juda na Jerusalemu. ⁶ Ghuye arughana vyakukufana munkurumbara ya Manase, Efurayimu, na Semiyoni, mundjira nadintje da kuyenda ku Nafutali, ntani mulidjonauko eli lyava kundurukidiro. ⁷ Ghuye abaumaura vidjambero, kutoghona ngundi da Ashera na mafano gha kushonga mu mbundu, ntani avi ndembaura vidjambero navintje vya vidumba mushirongo nashintje sha Israeli. Makura ghuye avyuka kuJerusalemu. ⁸ Mumwaka wendi wamurongo na mwaka ntano na mwaka ntatu da upangeli wendi, kuruku Jesiya amanine kukenita shirongo na ntembeli, ghuye atumu Shafani mona Asaliya, Mayaseya, ngughuru wa nkurumbara, na Joya mona Joyahasi kamutjangi, mukuwapeka ndjugho ya Hompa Karunga wendi. ⁹ Avayendi kwa Hilikiya, mupilisteli wa mukurona, ntani mukukara pa shirughana sha vimaliva evi vayitire mundjugho ya Karunga, ashi vaLevi, vakungi mavero, vapongokire vatunde kwa Manase na Efurayimu, kutunda ku vaIsraeli navantje vahupiropo, kutunda kuJuda nakuntje, ntani Benyameni, ntani kutunda kuvatungimo vamu Jerusalemu. ¹⁰ Vavo avatapa shirughana ku vakafumu ovo kavakengerango virughana pantembeli ya Hompa. Vakafumu vano vafutire varughani ava vawapukuliro na kudikurura ntembeli. ¹¹ Vafutire vashongi va vipirangi na vatungi vakaghure mawe gha kuteta na vitondo vya kukwatita, na kurughana vitondo vya kukwatera litundo evi vahompa vamwe vaJuda vashuvililire viwe. ¹² Vakafumu avarughana virughana na lihuguvaro lya kutikiliramo. Vakengeli vavo Johati na Oadiya, vaLevi, vana va vakafumu vaMerari, ntani Sakaliya na Meshurami, vakutunda kuvana va vaKohati. VaLevi vamwe, navantje ovo vakaliro vawalika muntjumo, kwalire pepi nalipititiro lya varughani va vakafumu. ¹³ VaLevi vano kwakalire mulipangero lyovo vashimbiro virughanito vya litungo ntani vakafumu vamwe navantje mundjira peke. Vakalire nka vaLevi vakaliro vakamutjangi, vanamberewa, ntani vakungi vakulivero. ¹⁴ Apa varupwitire maliva agha vatwalire mundjugho ya Hompa, Hilikiya mupilisteli a wana mbapira ya veta ya Hompa eyi atapire kupitira mwa Mosesa. ¹⁵ Hilikiya a ghamba kwa Shafuni akurongo, ''Ame nawana mapira ya dimuragho mundjugho ya Hompa.'' Hikiliya ayita mbapira kwa Shafani. ¹⁶ Shafani atwara mbapira kwa hompa, ntani nka atanta kwendi, nakughamba, ''Vakareli voye kuna kuruwana navintje evi watapa kwavo. ¹⁷ Vavo vamana vimaliva evi va wanine mundjugho ya Hompa, ntani ntani vavitapa mumaghoko gha vatakamiti na varughani.'' ¹⁸ Shafani munalirago atantere hompa, ''Hilikiya mupilisteli ana mpo mbapira.'' Makura Shafani ayi varwiri hompa. ¹⁹ Ene ngoli apa hompa ayuvhire nkango da dimuragho, ghuye ataghura vikorevero vyendi. ²⁰ Hompa arawire Hilikiya, Ahikamu mona Shafani, Abidoni mona Mika, Shafani mulirongi, ntani Asaya, mukareli unyendi, nakughamba, ²¹ ''Yenda na kukampulirapo litokoro lya Hompa, ntani ovo vana huparomo muIsraeli na muJuda, mukonda ya nkango da mumbapira edi vanawana. Mbyevishi unene, ugara wa Hompa oghu vatetera pa petu. Mbyevishi vinene, mukonda ya vanyakulyetu kapi vateghelire ku nkango da mumbapira yino mposhi valimburukwe kunavintje vatjanga mo.'' ²² Makura Hilikiya, novo arawilire vahompa, avayendi kwa muporofete Hulida, mukamali wa Sharumu mona Tokati mona Hasira, mupunguli wa marwakani (ghuye kwatungire muJerusalemu muruha mukunda rwa uviri), ntani vavo avaghamba naye mundjira yino. ²³ Ghuye aghamba kukwavo, ''Vino mbyo Hompa, Karunga wa Israeli ,ana ghamba: Tanterenu mukafumu ogho ana mutumo kwande, ²⁴ 'Vino mbyo Hompa naghamba: Kenga, ame ntantani tupu niyite mahudi pa livango lino ntani na vatungimo, mafingo naghantje agha tjanga mumbapira eyi vana kavarura kumeho ya hompa wa Juda. ²⁵ Evi ngavishoroka mukonda vavo vantjuvire me ntani vavo kavashoranga vidumba ku vakarunga navo peke, ntani vavo kava sharauranga me Karunga wa vininke navintje evi maghoko ghavo arughanine, makura, ugara wande nganighutetera palivango lino, ntani kapi ngaushayeka.' ²⁶ Ene ngoli Hompa wa Juda, oghu ana mutumo muyapure Hompa ashi ghuye vinke a vhura kurughana, vino mbyo mukaghamba kukwendi, 'Hompa, Karunga wa Israeli ana ghambo vino: Kuhamena kunkango edi una yuvhu, ²⁷ mukonda mutjima ghoye wa ghomoka, ntani ove una kudidipita naumoye kuuto wa Karunga apa una yuvhu nkango dendi da kuvyuka livango lino na vatungimo, ntani mukonda una kudidipita kumeho yande ntani una tura vikoverero vyoye ntani mbyo una liliri kumeho yande, ano nka name mbyo nakutegherere- uno ngo mughano wa Hompa- ²⁸ kenga, ame ngani kutwara kuvanyakulyoye. Ove ngoyenda mumbira yoye mumbili, ntani ntani mantjo ghoye kapi ngagha kenga ghano mahudi ngani yita pano palivango na vatungimo.'' Vakafumu avadamuna mbudi vavyuke kwa hompa. ²⁹ Makura hompa atumu ntumi nakupongeka vakurona navantje vamu Juda na Jerusalemu. ³⁰ Makura hompa akanduka ayende kundjugho ya Hompa, ntani vakafumu navantje vamu Juda ntani vatungimo vamu Jerusalemu, na vapilisteli, vaLevi, ntani vantu navantje, kutwara mumakuto ghavo. Makura avarura vavo kuna kutegherera nkango nadintje da mumbapira ya makukwatakano oyo vawanine mundjugho ya Hompa. ³¹ Ano hompa ashapuka mulivango lyendi kumwe nakutura likukwatakano kumeho ya Hompa, mukukwama Hompa, nakukwata dimuragho dendi, marondoro ghendi, na uhameni weni, na mutjima wendi nauntje na monyo wendi nauntje, mukulimburukwa kungango dalikukwatakano edi vatjanga mumbapira yino. ³² Ghuye arenkita navantje ava awanine muJerusalemu na Benyameni vayimane mulikukwatakano. Vatungimo vamu Jerusalemu ava moneke kuulimburukwi kulikukwatakano lya Karunga, Karunga wa vanyakulyovo. ³³ Josiya aghupumo vininke navintje vya vidona vitundemo mushirongo eshi shahamenino ku vantu va Israeli. Ghuye arenkita kehe uno mu Israeli karere Hompa, Karunga wavo. Mayuva naghantje ghano, vavo kapi vapirukire vadire kukwama Hompa, Karunga wa vanyakulyavo.