¹ Makura Salomon atameke kudika ngereka ya Hompa Karunga mu Jerusalema pandundu ya moliya, apa Hompa Karunga aka monikilire vashe Ndafita. ghuye a wapayiki livango apa Ndafita ayi ghayalilire, parupare apa kashwayeranga Arauna wamu Jebusi. ² Ghuye atameke kudika muliyuva lyauviri mumwedi wauviri, mumwaka waune walipangero lyendi. ³ Edi ndo mita atimine mulivhu dalitateko eli Salomon atulire kungereka ya Karunga. mukurughanita ndjenditito yakare muune, muure kwakalire mita ntayimwe, ntani mumpati mita dimurongo mbiri. ⁴ Ghuye wandjugho yakungenena kumeho ya ngereka, kwakufanine na mumpati. Muure kwakalire mita dimurongo mbiri, ntani Salomon munda yayo kwa ramayikiremo na ngorodo yene-yene. ⁵ Ghuye kwa yiwapayikire namusedeli, omo ayi fikire na ngorodo yene-yene, evi ashongire navitondo vyaundunga ntani namalyenge. ⁶ Ghuye awapeke ngereka namawe amawa, nangorodo eyi yatundiro kungorodo ya paravayimu. ⁷ Ghuye nka vandayikire mo makeshe, likuma, ntani mavero ngorodo; ghuye atjokwere vinamwenyo vyamavava kulikuma. ⁸ Ghuye kwatungire livango lyakupongoka. Muure wayo kwakushetakanine naunene wa ngereka, mita dimurongo mbiri, ntani muure kwa kalire nka mita dimurongo mbiri. Ghuye avandayikeko na ngorodo yene-yene, yayo kwakoshire mafere matano nalimwe. ⁹ Mukosho wamboha edi varughanitire dimurongo ntano damuwaya-waya. Ghuye kwa vandayikire livango lyakuwiru nangorodo. ¹⁰ Ghuye arughana mafano maviri gha kerubimu ghakuvango lyakupongoka lyakuwiru; vakafumu vakurughana vitondo ava vi vandayiki nangorodo. ¹¹ Mavava ava Kerubim kwakalire namita dakutika kudimurongo mbiri muure kumwe; livava lya kerubimu umwe kwakalire mita ntano, nakukatika kulikuma lya ndjugho, ntani livava limwe kwakalire namita ntano, kukatika kulivava lyakerubimu unyalyo. ¹² Livava lyamukerubim umwe kwakalire nka mita ntano, nakutika kulikuma lyandjugho; nalivava lyamukerubim wakuhova. ¹³ Mavava avano va kerubim kwakalire namita dakutika kudimurongo mbiri. Vakerubim kwayimanine na maghuru ghavo, navipara vyavo vana pirukiri mundjugho yayinene. ¹⁴ Ghuye arughana likeshe lya shinaliwiru, nali lya shina mahako, nali lyamapurapura ntani nali lyakuhondjerapo vakerubim. ¹⁵ Salomon nka kwa rughanine ngudi mbiri, kehe yino mita ntatu naharufa muure, kwaditulire kumeho ya ngereka; kumutwe wa kehe ngundi kwakalire na mita ntano muure. ¹⁶ Ghuye arughana malyenge a ngundi nakugha tura kuwiru yado; ghuye arughana nka lifere limwe pamagaranata nakudi wederere nado kumalyenge. ¹⁷ Ghuye atura ngundi odo kumeho yangereka, yimwe kulighoko lyarulyo, ntani yimwe kulighoko lyarumontjo; ngundi yakurulyo ayi ti lidina Jakimi, ntani ya kaliro kurumontjo ayi ti Bowasi.