¹ Salomon mona Ndafita kwa kalire muupangeli wendi, ntani kumwe akalire na Hompa Karunga wendi ntani a renkire akare nankondo unene. ² Salomon aghambire kuva Israel navantje, kuva kavita mayovi na mafere, ntani vatokoli navantje vamu Israel, nakumatimbi ghamulipata lyavashe. ³ Makura Salamon ntani kumwe na mbunga nayintje ava yendi kulivango lyakuwiru olyo lya kaliro ashi Gibiyoni, kunya nko kwa kaliro tende yaligwanekero na Karunga, eyi Moses mukareli wa Karunga, a rughanine mumburundu. ⁴ Ano Ndafita akayitire shikesha shaligwanekero sha Karunga kutunda kukiliyata Jeyalimu nakushitwara kulivango eli a shi wapayikilire, a tomeke tende yasho mu Jerusalema. ⁵ Mukuwedererako, shidjambero shangoporo a rughanine Besareli mona Uli wamukafumu waHuru kwakalire kumeho ya tende yaligwanekero lya Hompa Karunga; Salomon nambunga nayintje nko vayendire. ⁶ Salomon akanduka ayende kunya kushidjambero shangoporo kumeho ya Hompa Karunga, eshi shakaliro patende yaligwanekero, na kutapa ndjambo dakushwakerera liyovi limwe pashidjambero opo. ⁷ Karunga amonekere Salomon mumatiku ngogho nakughamba kukwendi, ''Pura! Vinke evi nikupa?'' ⁸ Salomon aghamba kwa Karunga, '' Ove wa negheda ligwanekero lyalinene nalipuro lyakutikiriramo kuvavava Ndafita ntani mbyo una ntura ame muuHompa mulivango lyendi. ⁹ Weno, Hompa Karunga, renka matwenyidiro ghoye kuvavava Ndafita atikemo, ove ghuna ntura ame nikare Hompa kuvantu vavangi vakudira kuvhura kuvara yira mbundu ya livhu. ¹⁰ Weno ame mpe ghukonentu nauyivi, mposhi ni vhure kupititira vano vantu, are wakuvhura kupangura vantu voye, ava vavayingi weno?'' ¹¹ Karunga aghamba kwa Salomon ashi, ''Mukondashi vino kwakalire mumutjima ghoye, ntani mukonda ove kapi ghuna rombo ungawo ndi limona, ndi lifumano, ndi monyo davankore voye, liparu lyalire, ano ngoli mbyo una rombo ukonentu nauyivi wanaumoye, mukondashi ngauvure kupangera vantu, ava nakurenkere ukare Hompa, evino mbyo ngoli ngani rughana. ¹² Ame ngani kupa ukonentu nauyivi. Ame ngani kupa nka ugawo nalimona ntani lifumano, kwato Hompa akaliro kuuto ghoye, ntani kwato ogho ngayo kunyima yoye ogho nga karo nagho.'' ¹³ Makura Salomon avyuka ku Jerusalem atunde kulivango lya Gibiyoni, kutunda kumeho yatende yaligwanekero; oko nko aka pangilire Israel. ¹⁴ Salomon apongayike tukarukara navarondi tukambe, ntani uye kwalire natukarukara twakutika ku 1400 ntani mayovi murongo nambiri ghavarondi tukambe evi a tulire mukarukara damunkurumbara, ntani kwa mwene uye , Hompa mu Jerusalem. ¹⁵ Hompa arughana siliveri nangorodo ayi yura Jerusalem yira mawe, ntani a rughana vitondo vyamusedeli viyure yira maukuyu muliyana. ¹⁶ Vyakalire namulyo kutukambe twakutunda ku Egipite na kuye kwa Salomon, vauliti vendi mbo yitango ndando ya mukosho. ¹⁷ Kava ulitanga tukarukara twavita twakutunda ku Egipite mafere matano nalimwe ghadimuwaya-waya dasiliveli, ntani tukakambe dimuwaya-waya dakutika ku 150. Vavo nava nkakavaurango kuva Hompa vava Haititi ntani kuva arameyani.