¹ بالبداية كان الكلمة، والكلمة كان يم الله. وكان الكلمة الله. ² هذا كان بالبداية يم الله. ³ و بيه إتكون كل شي، و بغيره ما صار أي شي من إللي إتكون. ⁴ بيه كانت الحياة. والحياة كانت نور الناس. ⁵ والنور يضوي بالظلام، والظلام ما كدر يوصل للنور. ⁶ إجه إنسان دزه الله، اسمه يوحنا، ⁷ إجه يشهد للنور، علمود الكل يؤمن من خلاله. ⁸ مو هو النور، بس كان شاهد للنور، ⁹ فالنور الحق إللي ينور كل انسان كان جاي للعالم. ¹⁰ كان بالعالم، وبيه إتكون العالم، والعالم ما عرفه. ¹¹ وهو إجه للي يخصوه، بس هذولة ما قبلوه. ¹² بس إللي قبلوه، إللي همه آمنوا بأسمه، إنطاهم الحق أن يصيرون أولاد الله، ¹³ وهمه إللي انولدوا مو من دم، ولا من رغبة جسد، ولا من رغبة بشر، من الله. ¹⁴ و الكلمة صار بشر، موجود ويانه، وإحنة شفنه مجده، مجد إبن وحيد يم الآب، وهو مليان بالنعمة والحق. ¹⁵ شهد إله يوحنا هتف وكال:<< هذا هو إللي كلت عنه: إللي يجي بعدي هو متقدم عليه، لأنه كان موجود قبل أن آني انولد>>. ¹⁶ لأنه من امتلائه اخذنه كلنه وحصلنه نعمة على نعمة، ¹⁷ لأن الشريعة إنطت على إيد موسى، بس النعمة والحق انوجدوا بيسوع المسيح. ¹⁸ ماكو واحد شاف الله ابدا. بس الأبن الوحيد، اللي بحضن الآب، هو اللي كال عنه. ¹⁹ وهاي شهادة يوحنا من دز اليهود من أورشليم قسم من الكهنة واللاويين علمود يسألوه:<< منو إنته؟>> ²⁰ هو إعترف وما نكر، وأكد وكال:<< مو آني المسيح>>. ²¹ سألوه:<<لعد شنو؟ إنته هو ايليا؟>> كال:<< مو آني!>>.<<لو إنت النبي؟>> جاوب و كال:<<لا!>> ²² كالوا:<< منو انت، حتى نودي جواب للي دزونه؟ شدكول عن نفسك؟>> ²³ كال <<آني صوت أنادي بالبرية: سووا الطريق عدلة كدام الرب، مثل ما كال النبي إشعياء>>. ²⁴ وهذولة كانوا مرسلين من الفريسيين، ²⁵ رجعوا يسألوه:<< اذا انت مو المسيح، ولا ايليا، ولا النبي، لعد ليش دا تعمد؟>> ²⁶ كال:<< آني أعمد بالماي! بس بينكم إللي ما تعرفوه، ²⁷ وهو يجي وراية، وأني ما أستاهل أن افك رباط حذائه>>. ²⁸ هذا صار إبيت عنيا، عبر الأردن، وين ماكان يوحنا يعمد. ²⁹ وباليوم اللي بعده يوحنا شاف يسوع جاي عليه، ففرح وكال:<< هذا هو خروف الله إللي يشيل خطية العالم. ³⁰ هذا هو إللي كلت عنه انه الرجل إللي يجي وراية هو متقدم عليه لأنه كان موجود قبل أن انولد. ³¹ وما كنت أعرفه بس آني إجيت أعمد بالماي حتى يظهر لإسرائيل>>. ³² بعدين شهد يوحنا وكال:<< شفت الروح ينزل من السما بهيئة حمامة ويستقر عليه. ³³ وما كنت أعرفه، بس إللي دزني حتى أعمد بالماي هو كالي: إللي تشوف الروح ينزل ويستقر عليه هو إللي راح يعمد بالروح القدس. ³⁴ ومن شفت هذا، أشهد أنه هو ابن الله>>. ³⁵ وباليوم إللي بعده كان يوحنا واكف هناك ووياه اثنين من تلاميذه، ³⁶ فشاف يسوع وهو يمشي وكال:<< هذا هو حمل الله>>. ³⁷ من سمع التلميذين كلامه تبعوا يسوع. ³⁸ والتفت يسوع فشافهم يمشون وراه، وسألهم:<< شتريدون؟>> كالوله:<<رابي، يعني يا معلم، وين ساكن؟>> ³⁹ جاوبهم:<< تعالوا وشوفوا>>. راحوا وياه وشافوا هو وين ساكن، وبقوا يمه بذاك اليوم؛ وكانت الساعة أربعة بعد الظهر. ⁴⁰ وكان اندراوس أخو سمعان بطرس واحد من هذولة إلاثنين إللي مشوا ورا يسوع، بعد ما سمعوا كلام يوحنا، ⁴¹ بس لكه أخوه سمعان، كال لسمعان:<< لكينه المسيا>> يعني المسيح. ⁴² وجابه يم يسوع. فباوع يسوع على سمعان بتمعن وكال:<< إنته سمعان بن يونا، بس آني راح اسميك:صفا>> يعني صخر. ⁴³ وباليوم اللي بعده راد يسوع يروح لمنطقة الجليل، لكه فيلبس، كاله:<< تعال وياية!>> ⁴⁴ وكان فيلبس من بيت صيدا، مدينة اندراوس وبطرس. ⁴⁵ وبعدين فيلبس لكه نثنائيل، كاله:<< لكينه إللي كتب عنه موسى بالشريعة، والأنبياء بكتبهم وهو يسوع ابن يوسف من الناصرة>>. ⁴⁶ كاله نثنائيل:<< قابل يطلع من الناصرة شي صالح؟>> جاوبه فيلبس:<< تعال وشوف!>> ⁴⁷ وشاف يسوع نثنائيل جاي عليه فكال عنه:<< هذا اسرائيلي أصيل ما بيه شك!>> ⁴⁸ سأله نثنائيل:<< انت منين تعرفني؟>> جاوبه يسوع:<< شفتك جوه التينة قبل ما يجيبك فيلبس>>. ⁴⁹ صاح نثنائيل وكال:<< يا معلم، أنت ابن الله! إنت ملك إسرائيل!>> ⁵⁰ كاله يسوع:<<إنت آمنت لأن كلت لك آني شفتك جوه التينة؟ راح تشوف أعظم من هذا!>> ⁵¹ بعدين كاله:<< الحق الحق أكوللكم: انتوا راح تشوفون السماء مفتوحة، وملائكة الله يصعدون وينزلون على ابن الأنسان!>>