¹ بما انه إنتوا كمتوا ويه المسيح، إسعوا للأمور اللي هيه بالعلا، وين ما المسيح كاعد عن يمين الله. ² حصروا إهتمامكم بالأمور إللي هيه بالعلا، مو بالأمور الأرضية. ³ لأن إنتوا متوا، و حياتكم مستورة ويه المسيح بالله. ⁴ لأنه من راح يظهر المسيح، وهو حياتنه، إهنا راح تظهرون انتوا همين وياه بالمجد. ⁵ هسة موتوا ميولكم الأرضية: الزنى، النكاسة، جموح العاطفة، الشهوة الردية، والاشتهاء فوك الطبيعي اللي هو عبادة أصنام. ⁶ لأنه بسبب هاي الخطايا ينزل غضب الله، ⁷ و بيها مشيتوا بالماضي، من جنتوا تعيشون بيها. ⁸ بس هسة، شيلوا منكم، انتوا همين، هاي الخطايا كلها: الغضب، الانتقام، الخبث، الكفر، الكلام القبيح الطالع من حلكم. ⁹ لا تجذبون واحد عل ثاني، لأنه نزعتوا الانسان العتيك و أعماله ¹⁰ و لبستوا الجديد اللي يتجدد حتى يوصل لكل المعرفة حسب صورة اللي خلقه، ¹¹ و بيه ماكو فرق بين يوناني و يهودي، أو مطهر لو مامطهر، أو متحضر لو غير متحضر، أو عبد و حر، لأن المسيح هو الكل و بالكل. ¹² باعتباركم جماعة مختارة من الله، قديسين محبوبين، دائما البسوا مشاعر الحنان واللطف و التواضع و الوداعة وطول البال، ¹³ متحملين واحدكم الثاني، و متسامحين بيناتكم. و إذا جان أكو شكوى واحدكم عل ثاني، مثل ما سامحكم الرب، انتوا همين سووا هيج. ¹⁴ و فوك هذا كله لبسوا المحبة، لأنه هيه رابطة الكمال. ¹⁵ و خلي يملك بقلوبكم سلام المسيح، اللي اندعيتوا إله بالجسد الواحد؛ وصيروا شاكرين! ¹⁶ خلي تسكن كلمة المسيح بداخلكم بغنه، بكل حكمة تعلموت و توعظون واحدكم الثاني، مرنمين بمزامير و تسابيح ز أناشيد روحية بقلوبكم لله، رافعين إله الحمد. ¹⁷ و مهما كان إللي تسووه، بالكول أو بالفعل، علمود يمشي كل شي بأسم الرب يسوع، رافعين بيه الشكر لله الآب. ¹⁸ يا زوجات إخضعن لازواجكم مثل ما يلوك ( بالعيشة ) بالرب. ¹⁹ يا أزواج، حبوا زوجاتكم، ولا تعاملوهن بقسوة. ²⁰ يا أولاد، طيعوا والديكم بكل أمر، لأن هذا مرضي يم الرب. ²¹ يا آباء لا تثيرون غضب أولادكم حتى ما يصيبهم الفشل . ²² يا عبيد، طيعو سادتكم البشريين بكل أمر، مو بس تشتغلون بجد من إتكون عيونهم عليكم، مثل إللي يحاول يرضي الناس، بقلب صادق خايفين الرب. ²³ و مهما سويتوا، اجتهدوا بيه من كل قلبكم، و كأنه للرب مو للناس، ²⁴ عارفين انه راح تاخذون المكافأة بالميراث من الرب. لأنه إنتوا عبيد تخدمون الرب المسيح ²⁵ بس إللي سوا شر راح ياخذ جزاء عمله الشرير، و بدون تحيز.