¹ من بولس و هو رسول للمسيح يسوع بمشيئة الله، و من الأخ تيموثاوس، ² للأخوة القديسين و الأمناء بالمسيح، الموجودين بمدينة كولوسي. إلكم النعمة والسلام من الله أبونا و الرب يسوع المسيح. شكر و صلاة ³ إنه احنة دائما نرفع الشكر لله، أبو ربنا يسوع المسيح باللي دا نصلي بيه علمودكم . ⁴ لأنه وصلنا خبر ايمانكم بالمسيح يسوع والمحبة اللي عدكم تجاه كل القديسين، ⁵ علمود الرجاء المحفوظ إلكم بالسماوات، الرجاء اللي سمعتوا بيه من قبل بكلمة الحق اللي بالانجيل ⁶ واللي وصلت الكم و دا تنتشر هسة بالعالم كله، و بيهه ثمر و دا تنمو، مثل ما دا يصير وياكم انتوا من سمعتوا بنعمة الله و أختبرتوها بالحق، ⁷ و مثل ما إتعلمتوا من أبفراس شريكنا العبد المحبوب، و الخادم الأمين للمسيح يمكم ⁸ و هو نفسه اللي بلغنه باللي عدكم من المحبة بالروح. ⁹ علمود هذا إحنه همين، من اليوم اللي سمعنه بيه أخباركم، بعدنه دا نصلي و نتضرع علمودكم، حتى تمتلئون من تمام معرفة مشيئة الله بكل حكمة و إدراك روحي، ¹⁰ حتى تسلكون سلوك لائق و مرضي بكل شي، و تجيبون ثمر بكل عمل صالح و يصير عدكم نمو بمعرفة الله للتمام، ¹¹ متشددين بكل قوة توافق قدرة مجده، حتى تكدرون بالتمام على التحمل و طول البال، ¹² رافعين الشكر بفرح للآب اللي خلاكم تصيرون مؤهلين حتى تشتركون بميراث القديسين بالنور، ¹³ هو اللي خلصنه من سلطة الظلمة و نقلنه الى ملكوت إبن محبته ¹⁴ اللي بيه إلنا الفداء، غفران الخطايا. مجد المسيح ¹⁵ هو صورة الله اللي ما ينشاف، والبكر على كل اللي انخلق، ¹⁶ لأنه بيه انخلقت كل الأشياء: اللي بالسماوات و اللي على الأرض، اللي ينشاف و اللي ما ينشاف، إذا كانت عروش أو سيادات أو رياسات أو سلطات. كل اللي بالكون انخلق بيه وعلموده. ¹⁷ لأن هو كائن قبل كل شي، و بيه يدوم كل شي. ¹⁸ وهو راس الجسد، الكنيسة، هو البداية و بكر الكايمين من بين الأموات، حتى يكون إله المقام الأول بكل شي. ¹⁹ بيه سر الله أن يحل بكل ملئه، وحتى يصالح بيه كل شي وية نفسه، لأنه سوه السلام بدمه عل صليب، ²⁰ لأنه بيه يتصالح كل شي، سواء اللي عل أرض أو اللي بالسماوات. ²¹ وإنتوا، اللي كنتوا قبل غرباء و أعداء بالفكر، بأفعالكم الشريرة، ²² صالحكم هسة بجسد بشرية ( ابنه ) بالموت. حتى يجيبكم و تصيرون كدامه و انتوا قديسين بلا ذنب و لا لوم. ²³ بس لازم تثبتون فعلا بالايمان، متأسسين و راسخين و غير متحولين عن رجاء الأنجيل اللي سمعتوه، اللي إتبشر بيه للخليقة كلها جوه السما، و آني بولس صرت خادم إله. ²⁴ و هسة آني أفرح بالالام إللي دا أعاني منها علمودكم، و أكمل بجسدي إللي نقص من ضيقات المسيح علمود جسده إللي هو الكنيسة، ²⁵ و علمودها آني صرت خادم بموجب تدبير الله اللي إنطاني ياه علمودكم، و هو أن أتمم كلمة الله، بأعلان ²⁶ السر اللي كان مكتوم طول العصور و الأجيال، و هسة إنكشف لقديسيه، ²⁷ لأنه الله راد يعلن إلهم شكد هو غني مجد هذا السر بين الأمم: إنه المسيح بيكم، هو رجاء المجد؛ ²⁸ هذا السر احنه نكوله، واعظين كل إنسان، و معلمين كل إنسان، بكل حكمة ، حتى نجيب كل إنسان كامل بالمسيح. ²⁹ وعلمود هذا آني همين أتعب واجاهد، بفضل قدرته اللي تشتغل بيه بقوة.