¹ بخصوص رجوع ربنا يسوع المسيح و جمعتنه وياه سوية، نطلب منكم يا إخوة ² إنه ما تنزعج افكاركم بسرعة و لا تقلقون، لا من تلميح و لا من خبر و لا من رسالة منسوبة إلنه بالزور، يفترض بيهه انه يوم الرب إجه فعلا. ³ لا تخلون أي واحد يخدعكم بأي طريقة! لأنه ذاك اليوم ما يجي الإ يسبقه انتشار الارتداد و ظهور الانسان العاصي، ابن الهلاك، ⁴ إللي يتحدى كل إله أو معبود، و يعاديه متكبر عليه. و همين يتخذ من هيكل الله مكان إله، حتى يحاول يبرهن إنه هو إله. ⁵ شنو ما تتذكرون انه آني كلت إلكم هذا الشي من كنت يمكم؟ ⁶ و إنتوا هسة تعرفون شنو اللي حابسه حتى ما يطلع إلا بالوكت المحدد إله. ⁷ لأن العصيان هسة دا يشتغل بالخفية كأنه سر. بس إلى أن ينرفع من الوسط ذاك اللي حابس المتمرد. ⁸ إهنا راح يبين الانسان العاصي بشكل واضح حتى يمحيه الرب يسوع بنفخة حلكه و يتلاشى ببهاء ظهوره من يرجع. ⁹ بس بروز العاصي، راح يكون بكد طاقة الشيطان عل معجزات والعلامات و العجايب المزيفة كلهه، ¹⁰ و على كل أنواع التضليل اللي يجرف الهالكين للعصيان، لأن همه ما قبلوا محبة الحق حتى يخلصون. ¹¹ و علمود هذا السبب، الله راح يدز إلهم طاقة الضلال حتى يصدكون إللي هو دجل، ¹² و توكع الدينونة على كل إللي ما أمنوا بالحق بس فرحوا بألاثم. ¹³ بس إحنه من واجبنه أنه نشكر الله دائما علمودكم، إنتوا الأخوة إللي يحبهم الرب، لأن الله إختاركم من البداية للخلاص، بتقديس الروح إلكم وإيمانكم بالحق. ¹⁴ لأنه علمود هذا الأمر دعاكم بتبشيرنا إلكم، حتى تنالون مجد ربنا يسوع المسيح. ¹⁵ إثبتوا، يا إخوة، و التزموا بالتعاليم إللي اخذتوها من عدنه، سواء بالكلام أو برسالتنه. ¹⁶ و ياريت ربنا يسوع المسيح نفسه، والله أبونا، إللي حبنه و أنطانه بنعمته راحة أبدية و رجاء صالح، ¹⁷ يشجع قلوبكم و يثبتكم بكل عمل صالح و كول زين!