¹ Lakwtu mi Yeso dami dlamekshi rama tenu, se da rami pukurraucingeri ma, ² "Aterro kwa zega du, aku yiwan shirin ngumiri paska aye ni, ke ndaye bari na Wengenen nda dlegi na aci." ³ Se marəmamin pərris na ndawa gazgaraucin ke ndiwa, ⁴ da cacpai i ɗagayi i ngwapate kə marəm pərisaucin baci dləgun Kayapas. ⁵ Gaɗa da sapəɗrraci dəvu mi akshi a ɗəgau da jəb Yeso da təki na aci da dəɓsa. ⁶ Lakwtu mi Yeso a Baitanya i wənduwa wənduwa Saminu agurdadəmak, ⁷ kal lakwtulakwtu mi ndan mbasu i baka tebərr tak masana, se aama ɗagai da tlai na kwalɓa mərak mi na sada tlaparr, se da pi aɗa Yeso. ⁸ Amman pukurraucin gəri ika kasən tin, se da mi na gəshi, da ramma, "Nda dlama aasarr təku gaɗa gəmo?" ⁹ Ai, da nda ɗəɓdu mərak təku nda bi dagwda gawa nda ɓəri ndak tluwa. ¹⁰ Amman gaɗa Yesu zəga na gəshakshi tənu, se daramikshi ma, "Gaɗa gəmo kwa tlatli ankal amangu?" Gaɗa atu dlama be bəlan. ¹¹ Atərro fatawanke kun na ndak tluwau i wita kun, amman kwa bi ga fatawanke bai. ¹² Gaɗa lakwtu mi atuu pa mərak i təka ga tənu, atuu dlamu kasən gaɗa dabak ga. ¹³ Jirre na rame kun, ri tawanke mi nda dlam wazək labarr herr təku i duniya nin, bee warra aama təku dlamu gu nda dlam samanau, ke a dlaɓa bi taana gara. ¹⁴ Se gayi da kun guma ayawa shirin gu, baci dləgun Yahuza Iskarryoti, dayi ri marəmamin marəm pərrissaucin, da ram maya, "Kwaye bara tam, na bari kun aci?" Akshi da galci ci rrəpila gumu kwan. ¹⁶ Tin da lakwtu, se aci da jəb kurrarram dəvu lakwtu mi aci bari gəri akshi. ¹⁷ I gafa nawak səkur kə ngəmurri paska, pukurraucin da nai i ri Yeo da ramma, "Kanci jayi rawan, ja sapərraci ri tak masana paska?" ¹⁸ Aci da ramma, "A təfine kunuk marəm ɗa, kwa bi na warrau ɗagai, kwa rami ci maya, 'Maləm maya, "lakwtu ga dlaməngara damtau. Naye ta ngəmuri paska i wənduwa ci, na pukurraucin ganai."" ¹⁹ Pukurraucingu da dlami kakə mi Yeso ramikshi, se akshi sapərraci masana ngəmuri gu. ²⁰ Sartu aduwau dlamingara tin,se da mbashi gaɗa da ci na pukurraucin guma ayawo shiringu. ²¹ Lakwtu aksha kun ta masana tənu, aci da ramikshi ma, "Jire na ramekun ma gayi da kuna kun aye bari na iyu." ²² Gəshakshi da dlamingara aiwa, se akshi da jaya gəri gayi-gayi ma, "Nazgadu iyu biko, Məgənyi?" ²³ Se da wuri ma, "Nən mi a ɗawa amai i kun gadakuwa gayi na iyu a bari ga nin aci. ²⁴ Wəngənən ayan gəri, kakə mi nda tarnu i ɗa gəri. Amman wadarre gənən mi nda baraci da ri gəri. Ngalko daa nda 'yawa ci bai." ²⁵ Yahuda, mi aye bari gəru da ram maya, " Maləm, ko iyu bi?" Da wurici ma, "Ka ramdu na aɗa ci." ²⁶ Sartu mi akshi a takta tin, se Yeso da mi burrodi, da barkaci, da gəjaji, da bari pukurraucingu,da ramma, "A gənina, kwa ci, sutku təka ganai." ²⁷ Se da mi kop gu, da dlam sambarka, da barikshi da ramma, "Asina kun mak kun. ²⁸ Atərro sugu, dədəm ga kə alkawarr, mi nda pau gaɗa tupta aipapin. ²⁹ Amman na rame kun, na sa aam ɗi innabi tiku wambai, se gafa mi naye sau karra na kun, i kun garva Afawa." ³⁰ Akshi dlam ruwa tənu, se dayi nakshi i ɗa guguyak Zaitun. ³¹ Se Yeso da ramikshi maya, "Bal kun kwa bəza na iyu dəviɗ təku, atərro da tarrna ma, 'Nak kəma makwatak gu, bərru da wayi nakshi,' ³² Amman aku nda tlatla na iyu nin, na wurma na kun,i nye Galili." ³³ Amman Bitrrus da rami maya, "Ko akshi gwiɗ a rwa nakshi da rici yaye, iyu tin go ri naya." ³⁴ Yeso da ramici ma, "Jirre na rameci, i kun dəviɗ təku, kabən gaskam da dlam kwakuryakok ngun, ka dlama na gamɗaya zəgi ga, harr zəgər kwan." ³⁵ Bitrrus da ramici ma , "ko na mutunga na ci yaye, na dlama gamɗaya zəgi ci bai." Se gagəzhin pukurraucingu mak, ke da ram kasənu. ³⁶ Se Yeso dayi na akshi i ri ɗagai, mi nda ɗaurau ma Getsamani, da rami pukurraucingəru ma , "A mbasi ne ritku, iyu na yaye kəma, na dlam magita. ³⁷ "Aci da mi BItrrus na kutli Zabadi shiringu i ɗa gayi na aci, se da jəb jəgyayi na ruwawaɗ. ³⁸ Se da ramikshi ma, "Arro ga a kun jiktu rankata, harr i nye mutu. A dlaɓine ri təku, kwa rrə'yi bəlan i ɗa gayi na iyu." ³⁹ Se aci da rakənyi kəm rap, da gutki da da dlam magita ma. "Baaba, a dlamangara nin, abzhi kop təku da nucingara da aɗa ga.Dək na kasən nda ɗəga ka bai, amman se kəci." ⁴⁰ Aci da kaci ri pukurraucingu, da tashakshi a yuwan, se da rami Bitrrus ma, "Ah, kwa dəmu dəri na iyu bai, kə awa gayi yaye? ⁴¹ A blamina sirita pa, kwa dlam magita, gaɗa kwa vəge kun jarrapta bai. Nənwa arro dlam na kəlele/kasaktingara, amman təka go- awayau/na awayu bai." ⁴² Se da yingəri ri magita gəri, zəgər kə mashirin, da dlam magita wam ma, "Afəkganai, kop təku a nuta da ɗaga bai se na sau nin, bee kancu da dlaɓa." ⁴³ Aci da nai wam, da tase akshi a yuwan, dakshi dlamingara dukshi. ⁴⁴ Se da yingəri wam , zəgər kə ma kwan. Aci da dlam magita wam, da səkunyi rama bee warra aci ramu sartu magita gacarregu. Se Yeso da katai i ri pukurraucingu, da ramikshi ma, "Gusku yaye kwa yuwan kwa di mafiya kun? Aikina, lakwtu dlamingara, nda baru na Wəngənən i ami ndak apapin. ⁴⁶ Atla, wa yi. Aiki, aci mi abari na iyu a damtau." ⁴⁷ Lakwtu mi gusku yaye aci akun rama, se Yahuda, gayi da kun guama ayawo shirin gu, da nai. Marəm algi da nai na aci da ri marəɗɓem perissaucin na ndawa gazgaraucin kə ndiwa. Akshi deu na kasakar nakunpul i amikshi. ⁴⁸ Atərro, nən mi aye bari na Yeso gu, nabi ramdikshi be aca dlamau da tatkikshi Yeso gu; ma, dək nən mi na ləntaci nin, a jəbina aci. ⁴⁹ Go tasəna, se da nai i ri Yeso, da ramici ma, "Maləm, use.!" Se da dlami ci səmɓa. ⁵⁰ Se Yeso da ramici ma, "Manga, a dlam bee mi ka deu i dlamau." Se akshi da nai, da mpi amai i təka Yeso da jəb na aci. ⁵¹ Lakwtu ke, gayi dakun ndiwa mi wara aɗa gayi na Yeso da bar ami gəri, da zǝmte kasakar gǝri, dai na karam i guzuɓ marǝm Prəs gu dauji na aguɗ gǝri gayi. ⁵² Se Yeso da rami ci, "A kaci na kasakar gu i kunu saka gara. gaɗa guid nən wara ma kasakar nən, nda tək gǝri na kasakar. ⁵³ Ko kwa tuman gu na dǝmu ɗaura Afǝk ga bai da wane Askarabu Malekawaɗ wara ɗǝka na guma ayawo shirin? ⁵⁴ Amman nda dlən nana nda nǝyi be wara kakkadadin ramu, ma se sutku wakatu? ⁵⁵ I lakwtu se Yeso da rami algi gu, "Kwade na kasakar na kumpul, kwa giba ga kakǝ baci kapaɗ ndawa bi? I dambasu fatawanke i kun sǝsu magita na dlǝm gubza, amman kwa jiba yu bai. ⁵⁶ Amman su mak wakatu gaɗa nda niyi be wara Nabaucin tarnu" Aku kasǝn se cakcak Pukuraucin gu dabzhi na aci da rawu nakshi. ⁵⁷ Ndawa mi wara gib Yeaso, da yi na aci iri Kayapa marǝm Prǝs, ri wara ndak taran na gasgaraucin cacpu i ɗa gayi. ⁵⁸ Amman Bitrus a ɗǝga gəri da pǝɗǝm har i nye ngwapate marǝm Prǝs gu. Da tǝfǝn gəri damashin gǝri na Askarabaucin gaɗa dai ki be wara a wakata. ⁵⁹ I lakwtu marmamin Prəstaucin na ndak majalisa mak da jib maka aibu gǝri.gaɗa akshi da tǝkǝna aci. ⁶⁰ Amman akshi ba aibu gǝri bai ko gayi, amman na nda wuda papəya i ɗa gǝri gawa a riwu, da kugu se ndawa ɗagai shiri da vəre i kǝma. ⁶¹ Da ram maya, "Nǝnangu maya na dǝmu na rəɓga na ri magita Kakasku, zam na rəmə du wam i kun yuwan kwan." ⁶² Marəm Prəs gu da tli dar'i da ram maya, "Chi na rama bai, jiri shaidau tawan nda dlami i aɗa ci?" ⁶³ Amman Yeso kata na miya gǝri bai. Marəm Prǝs da rami ci maya, "Na nǝpkǝ na ci na dlǝgun Seku baci aro, arami ja Masipun ci bi Wun Kakasku?" ⁶⁴ Yeso da wuri ci maya, "Ka ram du na miya ci. Amman na rame ci, da gususku ka lawan Wun gǝnǝn dambasu a ami mata kǝ kǝrmai, ani i aɗa kǝraɓak kǝ dǝsku." ⁶⁵ Se marǝm Prǝs gu da tlǝmpapiyi na zani gǝri, aramo maya, "Nangǝna Seku! Kwa maka shaida dama wan gaɗa gǝmo? Aikina,gususku tən ai kwa kəma na saɓo gu. ⁶⁶ Kwaika nana? Akshi da wuri ci maya, "Dlamən gara bəlan nda təkəna aci." ⁶⁷ Se akshi da təpki ci nawuk i da gəri, akshi da dlami ci lakodi, akshi da maskalata ci, ⁶⁸ Da ramma, "A rami ja be wara aye wakata i kəma, Ci Masipu nən, kəmə cin tai? A rami ja." ⁶⁹ Bitrus kuwa dambasu a ngwapate sharriyaram, se gabayi wunya ɗagai, da nai iri gəri da ram ma, "Ciye ka ɗa gayi na Yeso kə Galili." ⁷⁰ Amman da dlam na gamɗaya i kəmakshi, da ramma "Nazga be wara ka ram i aɗo bai." ⁷¹ Aci vəri miya mavgi tənu, riwu na gabayi wunya ɗagi wam, daika ci da rami ndawa wara a riwu maya, "Nənan gu ye aɗa gayi na Yeso kə Nazarat." ⁷² Se aci da dlam na gamɗaya wam har da ci yinɗa, da ramma, "Nazga warau bai." ⁷³ Aku lakwtu rap, se ndawa wara dar'i a riwu, da nai da rami Bitrus maya, "Jire, cike gayi ta kunakshi, atu ro marnya ci bazartu na ci." ⁷⁴ Se aci da jib ta yinɗa jiri kə tlarya gənən, aramo ma, "Ngalte nazga nənangu bai," na səkwakuya bai se gazkam da dlam kwakuryakok. ⁷⁵ Bitrus da tanyi na rama wara Yeso rami ci ma "Damba gaskam da dlam kwaryak nən ka dlama na gamɗaya zəgi ga har zəgər kwan." Se aci da vərən gəri i vuda da dlam aɗan tlapar.