¹ Yesu da vərin gəri da kun wənduwa Səku gu, da yingəri. Pukurraucingəri da nai i ri gəri, da tatki ci ləmamami Wənduwa Səku gu. ² Amman Yeso da ngumi da ramikshi ma, "Kwa lawan bayangu mak bi? Katanas na rame kun, go guguyak mi nda buzau ko gayi i ɗa kamancu, mi nda dabu bai i ɗa." ³ Aci dan mbasu i ɗa guguyak Zaitun tənu, se pukurraucingəri da nai rrukshi da ramma, "A rami ja, bayangu a wakata fatawan? Tam gənawa katayaci na gənawa damak duniya?" ⁴ Yesu da ngumi da ramikshi ma, "A dlamina ankal, gaɗa go nən da gwapa kun da dəvu. ⁵ Gaɗa gawa aye ni i kun dləgun ganai. Akshi aye ramau ma, 'Iyu ne masihu gu,' ke da dlagda na ndiwa da ɗak dəvu . ⁶ Kwaye kəmu koko zha na labar zhazhin. Kwa bəza bayangu da ɗawa kun i ruwawaɗ bai, gaɗa dolle bayangu da wakaci; amman dadəgəru dəgo. ⁷ Atərro lardi aye vəgi ɗak lardi,garva ke a dlam gaba na garva. Ndaye dlama maya na rəɓək gagai i ri dama-dama gawa. ⁸ Amman bayangu mak kə banda bone na ravan gawa. ⁹ Aku kasən, ndaye ɗawa nakun i darari nda təki na kun. Ndawa mi zəga Səku bai i rawanke aye ngupta kun. ¹⁰ Ndawa gawa ke aye dagamu, da dlagji nakshi da ɗak dəvu da ci na aaman kamancawaɗ shi, da jəb nguptakshi. ¹¹ papiya gawa aye ni da ɗawi jəb da dlagji nakshi. ¹² Gaɗa kəmangar a səkunangara gawa, ntau i wita ndawa a pulutangara. ¹³ Amma nən tawanke warra rrəɗingəri tərr iɗak dəvu Seku, harr dadəgiri nin, a bi na ra. ¹⁴ Labar herr kə garva dəsku təku, nda dlam wazik gara i duniya mak, gaɗa da dlaɓ shaida i duniyabu mak. ¹⁵ Gaɗa kasən, kwaika bi nyannya warra a dləmit, warra nabi Daniyel dlam rame ɗau, rrəɗi kun cube nakwana (ar'yi baci kərratu da dlaɓ parrak). ¹⁶ Ndiwa mi a yahudiya da rawa nakshi i ɗa guguyayin. ¹⁷ Nən warra a dəsku səsau nin, da fuwina bai gaɗa mayi tanke mi a kun səsu gəru, ¹⁸ nən warra a pata ke da katine wənduwa bai gaɗa ma kacum gəri ¹⁹ Amman wadarre ndiwa mi na matkam, na warra a bari anyi kulaɓaɓin i sarrtu! ²⁰ A dlamina magita gaɗa rawa kun da da dlaɓa lakwtu wuzinak bai, ko gafa subduwa. ²¹ ndaye dlama kabine tlaparr warra ngalte da dlamu jiri gu bai, tən dlamak duniya harr ini gusku, O, o, fak nda dlama jiri gu wambai. ²² In gaɗa nda pulutu na yiwan gu binin, da go-nən mi abi ra. Aman i barka ndiwa mi nda cikɗu, nda puluta na dati yiwangu. ²³ inde nən rami kun ma, "So Masihu a ritku nin!," ko "Si Masihu a ri tiu nin," kwa bara jirrewa bai. ²⁴ Atərro ngapapiyak Masihu na nabaucin papiya aye ni da jəbi tatka gənaw na bik ajap, gaɗa nda ləvaci ndawa gawa i nye ɗayu, nda dlam ankal bin harr ngum na ndak iman i Səku. ²⁵ Aiki, na ramdi ci tin kabən lakwtu ²⁶ Gaɗa kasən inde akshi rami kun ma, "Aikina, sitai Masihugu pata tiu nin," Kwa da i patau bai, ²⁷ Kakə mi wiɗa a vəryi da caɗ da bidli harr nye dəkəma, kasen ne nii Wəngənən a daɓa. ²⁸ Dek ri mi na guvu dabba nin, angululalin a cacpe riwu. ²⁹ Amman go sukwakuya aku ruwawaɗ gu, afa a cimangara, tərra ke a bari ɓidla gara bai, gəshau ke a payi naksh da dəsku, kərrmai dəsku aye dlama rəɓ. ³⁰ I lakwtu, gənawa Wəngənən a pakayi i patata dəsku, Zadak ndawa kun duniya mak aye aiwa gəshi gaɗa kalau. Aye lawan Wəngənən ani i aɗa kəraɓak da dəsku na kərrmai na saksakta tlaparr. ³¹ Aye wanayi maleikaucin gəri na marəm adərr gazhi, da cacpi na ndak iman na Yeso da palla tawanke kə duniya. ³² A gugzina bee da waka ayawu. Sartu mi gaptatingu jəb na ɗuwayu nin, a zəgina du ma wuzinak den gara damtau. ³³ Kasən ke, kwaika zada bayangu mak nin, ngalko a zəgi na du ma Yeso dlamen gəri damta, harr damtu miya mavgagin. ³⁴ Jirre na ramekun, zaman tuku a nuta bai, se Kakasku ɗawu bayangu da wakaci ³⁵ Dəsku na duniya a ɗayu nakshi, amman təlalmin ganai a nuta waambai. ³⁶ Amma game na gafogu na sartuu, go nin mi zəgau, ko maleikaucin dəsku ngum, ko Wəngu , se Afəkgu rrugəri. ³⁷ Gafa wara Wəngənən aye ni wam, a dlaɓa kakə lakwtu mi yiwan nabi Nuhu dlaɓu, gaɗa go nen a zəgi bee gaɓshu mi aye wakata. ³⁸ Atərro, kakə sartu damba ganjau Tsufana da wakaci, aksha kun ta na sa, na ngumurarin zəbabin so yiwan mi nu tufu i kun Suwa aamgu, ³⁹ ashi zəga gai se so ganjau gu danai da ngwi na akshi mak-kasən ke a dlaɓa, lakwtu ni Wəngənən ⁴⁰ I lakwtu ndawa shiri a dlaɓa kam, nda ma na gayi, ndabzhi na gayi. ⁴¹ Amatin shirin a dlaɓe ri naya, nd mana gayi ndbzhi na gayi. ⁴² Gaɗa kasən, a dlamina mbasik dərri fatawanke, gaɗa kwa zəga gafa wara Məgənyi aye ni bai. ⁴³ Amman a zəgina na sau, daa baci wənduwa a zəgi na lakwtu mi akərak aye nii nin, daa a mbasən gəri da dlam ɗəmai, daa abzau nda kətli wəduwa gəri nda dlamici kəra bai. ⁴⁴ Gaɗa kasən kun cam a dlamina ɗəmai, gaɗa wənəgən aye ni i kun lakwtu mi kwa tumantau bai. ⁴⁵ To warrau tawan baci aaman, gabayi baci gərayu, mi baci wənduwa gəri ɗawaci kun yaal gəri gaɗa da barikshi bik ta i ɗa lakwtu gara kalkal? ⁴⁶ Baci barka ne gabayi tənu, warra baci wənduwa gəru a tasayi gəri aɗak wana gəri lakwtu mi baci wənduwau a kateyi. ⁴⁷ Katanas na ramekun, baci wənduwa gəru aammpi na aci i ɗak bee tawanke mi aci na atu. ⁴⁸ Amman ən kəlaɗo/mənfək gabayi rami gəshi gəri ma, 'Baci wənduwa ga gu dləm tu', ⁴⁹ da jəb gubəɓ kamancawaɗ gəri gabayayin, a tau na sau na nda kuyo sa səma nin, ⁵⁰ baci wənduwa gabayi gu a dəmu na nii go-tasana, i kun awa warra aca zəgiwu bai. ⁵¹ Baci wənduwa gəru a karma na aci i kurak shirin, miya damak yiwan gəri a dlaɓan gara kalkal na kə mənafəkaucin, nda ɗawa na aci i ri mi a jəba ɗaanau na gada yaanau.