¹ Atərro, garva dəsku a gənawa na baci kam ɗagai warra vəru pəɗək da maki nda dagwanji mi a dlameci wana i kam gəri. ² Daku akshi kasaktu nakshi i ɗa dagwda mi aci a barikshigu anini gayi i nawa gayi tawanke. Se da dabakshi i kamgəru da dlam wana. ³ Daku sartu kwan, aci da vəri wam, se daiki nda wam dar'yi a miya asək, na wana bai. ⁴ Se da ramikshi ma, 'Anna kwa dlam wana i kam ga, be jəbu dək nin na bari dikun. Se da yi na akshi da dlam wanu. ⁵ Se da vəri wam i sartu kə zədu, da vəri wam i sartu kə kuɗkuvda, mak da ngwai nda wana i kamgəru. ⁶ Da dlam kasen wam i sartu kə guma ayawo gayi, se daiki ndau jəgap wam, se da ramik shi ma, 'ɗawun tam kun darr'yi kwa dlama be wanbai, i nawa təku mak?' ⁷ Go nən warra ma ja i wana, bee ɗawu kenang. Se da ramikshi ma, 'Kun ke ade kamgu. ⁸ Aduwau dlaməngara tənu, se baci kamgu da rami baci aɗa wana kamagu ma, 'A ɗauren nda wana kangu ka ngumakshi, ⁹ amman a ɓanji da ɗa ndawa mi deu da kau, se kanai i ɗa ndawa mi deu səkurrgu. ¹⁰ Ndawa mi ɓandu wana səkurrgu deu tənu, a tumangu gu ma nda ngumakshi kalkal bai na kə ndak nawa, amman se nda ngumi tike kalkal, dinarr gayi gayi. ¹¹ Ndawa mi ɓandu wana tin pəɗək gu, gənu ttmanjakshi tənu,, da Jəb ngurrngurr i ɗa baci kamgu. Akshi da ramma, ndawa mi deu da kaugu dlam wanak awa gaitak dlama nan ka bari ja tumanja ja kakal na kakshi. Ja warra ja dlam wana i kun afa fau. ¹³ Amman baci kamgu da rammi gayi da kunakshi ma, 'Manga, go bee kalkal mi na dlamikun. Kwa arrdatu na kun bai i ɗak dənarr gayi ne tumanja kə nawa gayi? ¹⁴ A gənyina bee warra kukun, kwayi nakun. Sutku lawan ganai ne, na bari ndawa warra deu da kugu bee kalkal na kəkun. ¹⁵ Kane dlam kalkal bai na dlam bee warra gəshi ga ancu na dlami na bee kanai? Kwa guru bi na be bəlan mi na dlamu? ' ¹⁶ To, Kə akau a dlama nakshi kə səkurr, kə səkurr a dlama nakshi kə akau. (Nda ɗauru gawa amman rap ne nda cikɗau.) ¹⁷ Yeso aye Urrushalima tənu, se da ɓəri pukurraucin guma ayawo-shirin tin i baka, lakwtu mi aksha rakan, se da ramikshi ma, ¹⁸ "Aikina pa, wa təka nya nawa i Urrushalima, ndaye bari na Wəngənən i ami marəm pərisaucin na malamcin dumaya. Akshi da wuji dici shariya papiya kə mutu. ¹⁹ se da bari naci i ndawa mi na iman bai, da dlmici muwa, da dlami kupak da dləgi na aci. Amman i kun yuwan kə makwan nda tlatli na aci." ²⁰ Se mi kutli Zabadi danai i ri Yeso na kutli gara. D a pi kufu gara i kəma gəri a maka bana da ri gəri. ²¹ Yeso da jayatu ma, "Kancu na dlami kəm tam?" Se da ramici ma, "Nancu ka ɗawi ndabzhi kutli ga shirin təku, gayi nda mbashi i mataci gayi i madlawici i kun garva ci." ²² Amman Yeso da ngumitu, maya, "Kəm ka zəga be warra ka wilu bai. Ko kwa dəmu na sau da kun məɗənkuyi warra na ye sau?" Se akshi da ramici ma, "Ja dəmudu." ²³ Se da ramikshi ma,"Gaɗa məɗənkuyi warra na sau nin, dawanage kwa dəmudu, amman mbasu i mataga ko i madlawiga nin, a baru nin iyu bai. amman kə ndawa mi Afəkga sapəratu gaɗakshi." ²⁴ Lakwtu mi gagəzhin pukurraucin gumau kəma kasən tənu, se gəshakshi da dləmacin gara na yaganaucin shiringu. ²⁵ Amman Yeso da ɗaurakshi i rəgəri, da ramikshi ma, " Kwa zəgadu rro, dəgamcin ndiwa mi zəga Səku bai, a ɗawa ndak dəgashi i dolle da dlam be mi akshi ancu, ndak aɗak dəgancin ke a tatkekshi awayau. ²⁶ Amman da dlaɓa kasu bai i wita kun. Da miya kasən, nən tawanke ancu da dlaɓi nən gazgara nin, da kata na aɗa gəri gabayi i wita kun. ²⁷ Tike ke, ancu da dlaɓi marəm i wita kun nin, dolle da dlaɓi gabayakun. ²⁸ Kalkal kakə warra Wəngənən ke deu gaɗa nda dlamici guzapəna bai, amman da dlam guzapəna, da bari arro gəri sanam gaɗa ndawa gawa." ²⁹ Akshi vəre da kun Yariko tənu, marəm algi da ɗəgi na akshi. ³⁰ Akshi daiki dləguyayin shirin nda mbasu i baka dəvu. Dləguyayin gu kəma ma a nutan Yeso tənu, se da səkci wurakshi dəsku maya, "Məgənyi wən Dauda, a dlami ja kanjəno ba." ³¹ Amman ndiwa da gərrnyi aɗakshi, da ramikshi da bəzami nakshi. Dək na kasən, dəguyayin gu da jəb sukta wurakshi wam tlaparr ma, "Məgənyi wən Dauda, a dlami ja kanjəno." ³² Se Y eso da rrə'yingəri cik, da ɗawi nda ɗaure dləguyayingu, da ramikshi ma, "Kwanci na dlamikun tam?" ³³ Se akshi da ramikshi ma, "Məgənyi, jan cu ja bi na lawan." ³⁴ Se Yeso da kəmna mugurumshi i gəshi gəri, da lənci dakshu. Na tasəna bai, se akshi da bi na lawan. Akshi da ɗəgi na aci.