¹ Yeso da ɗaure muwanaucingu da barikshi awayau na kərrmai kə di zada gaɓshu zuwawin tawawanke na ngata fərarin. ² Da wanyashi da dlam wazək garva Seku ke da ngaci nda fəra. ³ Aci da ramikshi ma, "Kwa ma bee waambai gaɗa buwa kungu. Kwa ma zawa bai, ko cizimi, ko burrodi, ko dagwda ko zanai dama wam. ⁴ Wənduwa tawanke kwa təfu nin, a mbasine riwu harr se nya kun deu. ⁵ Sartu tawanke mi nda gən kun binin, kwa bəza ɗagu nin , a saspina na bəbər ɗagu da zəgər kun, da dlaɓi shaida i aɗakshi." ⁶ Se akshi da tli da vaiki ɗa patatin larrdu, a kagala labarr herr na dlama ngata i rawanke. ⁷ Hirridus baci garva kəma labarr bee warra a wakata mark tənu, se ankal geri da tlingaratlapparr, gaɗa nda təka ramau ma Yahai baci batisma tlengəri da kun nda mutu, ⁸ ndau jəgab a ramau ma nabi Iliya ne pakeu, jəgab ke a ramau ma gayi da kun nabaucin waci ne tleu. ⁹ Se Hirridus da rmma, "Yahai rro na wudu na aɗau, amman sugu tai mi na kəmu bayangu game na aci. ¹⁰ Lakwtu mi muwanaucingu kateu tənu, se da rami betewanke warra akshi dlameu i Yeso. Se aci da ngwakshi dayi na akshi pəɗəm i ɗa ɗagai mu nda ɗaurau ma Baesaida. ¹¹ Amman algagingu kema kema kasən tin, se ɗəgi na aci. Aci da dlamikshik marraba da dlamikshi rama game na Garva Səku, zam da ngaci ndawa mi ancu ngata. ¹² Nawa gafo a damtu damangara tənu, se muwanaucingu da nai i ri Yeso da ramici ma, "A sllamaci na algu ba, gaɗaakshi dayi ka ɗa patatin baka təku da maki ri vəji naa masana, gaɗa wa ai mi go- nən. ¹³ Amman aci da ramikshi ma, "Kun a barinekshi bee da ci." Akshi da ramma, "Ja na bee warra ɗəka burrodi vaɗ na vənakau bai--se dai jayi ja masai masana i ndawa tətu." ¹⁴ (A riwu na gamsak dubu vaɗ). Yeso da raminpukurraucingəri ma, A ɗawakshi da mbashi kurak-kurak na dawa gumu vaɗ i kurak tawanke." ¹⁵ Se akshi da ɗawi ndau da mbashi kura-kurakgu. ¹⁶ Yeso da ngwi burrodi vaɗ na vənakau shiringu, da sukci aɗagəri dəsku, da sambarrci burodu na vənakaugu, da gəjaji gangamin da bari pukurraucingu da ɓəri algi ndawau. ¹⁷ Akshi mak da ci da wayi nakshi. Se pukuraucingu da capi bee warra gazau harr da niyi daɓərr guma ayawo shirin. ¹⁸ Na gafo ɗagai mi Yeso a magita na adagəri, pukauraucingu a rigeri, se aci da jayakshi ma, "Ndawa a ramau ma iyugu tai?" ¹⁹ Akshi da ngumi ma, "Yahai baci batisma, amman ndau jəgap ma ci Iliya, jəgap ke ma, gayi da kun nabaucin waci ne tleu da mutu." ²⁰ Se aci da ramikshi ma, "Amman kun wam, kwa ramau ma iyugu tai?" Bitrrus da ngumi ma, Masihu wen Səku." ²¹ Amman Yesogu da gabɗakshi na awayau ma akshi da rama su i nən wammbai, ²² acu da ramma, "Dolle Wengənən da shi bone bee gawa, ke ndawa gazgaraucin na pərissaucin na malamci dumaya da kur na aci, zam ndaye tək na aci,aku yiwan kwan nda tlatli na aci na arro." ²³ Se da rami gwiɗshi mi a riwu ma, "Tike anci ɗəga ga nin, dolle da kuri ɗəga ntu gəshi gəri, dolle ke fatawanke da jəb dlamanai nakwana ko i miya mutu. ²⁴ Tike mi aci ra arro geri a dəmu buka du, amman tike mi bukuna arro gəri gaɗa ga nin, a ra du. ²⁵ Paidon tam, nen da bi na duniya mak da buki ko da dlam na asarr arro gəri? ²⁶ Nən tawanke mi a kəmu zhiru ɗəga ga na təlalmingaga nin, kasen ke wəngənən aye kəmu zhiru warrau, lakwtu mi aci kete kun saksaktagəri, na saksakta afku, na kə maleikaucin mi go-aipu. ²⁷ Amman jirre na ramekun, jəgab da kuna kun mi darr'yi ritku a tamba mutu bai damba akshi daiki garva Səku." ²⁸ Aku Yeso ramu təlalmin təku na yiwan dandafuɗu, se da mi Bitrrus na Yahai na Yakubu, da gayi ɗa guguyak i magita. ²⁹ Sartu aca kun magita tənu, se gənawa jampelgəri da palcingara, kacungeri ke da dlamngara arawai sarral. ³⁰ Na tasəna bai, se so ndawa shirin a rama na aci; nabi Musa na Iliya, ³¹ mi pakau i kun saksakta na wiɗa saral. Akshi rama na Yeso a ɗa mutu gəri mi acaye dlamau i kun Urrushalima. ³² Bitrrus na kamancawaɗgeru akun dukshi yiwan, amman aku akshi gərradunakshi tənu, se akshi daiki saksakta Yeso na ndawa mi darr'yi na acu. ³³ Nabi musau na iliyau aye nyanakshi da riwu tenu, se Bitrrus da rami Yeso ma, "Məgenyi, ai dlaməngara bəlan ja riwu. Aivi ja, ja ɗalmi cubebin kwan. Gayi kəci, gayi kə nabi Musa, gayi ke kə Iliya." (acu rro zəga bee aca ramau bai). ³⁴ Bitrrus a ku rama tnu, se kəraɓak da fuwai da cimna akshi, kalau da jəbna akshi, sartu kəraɓakgu fuwayi tənu. ³⁵ Se nda kəmi wura da kun kəraɓakgu, a ramau ma, "Sutku Wenga warra na cikɗu; a kəminaci." ³⁶ Sartu wurau damu na rama tənu, se akshi daiki Yeso rrugəri. Pukurraucingu da mpi na biwu i gəshakshi, akshi ramu bee akshi ikagu i nənwaammbai. ³⁷ Sartu akshi kateu da ɗa guguyak gu ɗatlanu tənu, algi gawa da ni i ri Yeso. ³⁸ Se nən ɗagai da dlam ɗaura da kun algu ma, "Malum, na wilaci kaiki wənganai, atərro aci wnga gaitakgəri. ³⁹ Sotai gaɓshu zuwak a ravangri, a ɗawagəri kurwa go-dalasa, zam a vərkagəri matiɗək harr miyau a kumpa. Abzagəri bai se kəmeci təta tlaparr damba daivaci. ⁴⁰ Na wilu pukurraucin ci daa jidu, amman akshu dəma bai." ⁴¹ Se Yeso da wuri da ramma, "Kun gaɗibadlak zaman mi go iman, harr fatawan na dlaɓa ɗagayi na kun, gusku yaye kwa baru jirrewa bai? Ayen na wəncu i ritku." ⁴² Nda kun nina mayingu tənu, gaɓshu zuwakgu da sukcaci dəsku da karɓaci ɗa, da jijgaci na matiɗək tlaparr. Amman Yeso da gərrnyi ɗa gaɓshu zuwakgu, mayingu da bi na ngata, da barnaci afku. ⁴³ Se ndau mak da japci marəmkwina Kakasəku.Aksha kun japta bee tawanke mi aca dlamau tin, se aci da rami pukurraucingu ma, ⁴⁴ "Akərrəmtina bəlan bee mi naye ramekun: "Na sukwakuya bai ndaye bari na Wəngənən i ami ndawa." ⁴⁵ Amman pukurraucingu sanutu bee aca ramau bai. Gaɗa nda dəɓsu dikshi sanuta bee warra aci ramu. Ke akshi a kalu jayagəri i ɗa ramau. ⁴⁶ Se gamɗaya da tli i wita pukurraucingu, i ɗak tai da kunakshi ɗəkadi marəm. ⁴⁷ Amman Yeso zəga na na kurrarram gəshakshi tin, se da mi mayim gangam, da mpidi baka gri, ⁴⁸ da ramikshi ma, "Nən tawanke mi gənu mayim gangam kasau gaɗa ganai nin, dlaməngara ka marrabtu na iyu. Nen mi gən na iyu ke, gən na aci warra wane iyu. Gaɗa tke mi dlaməngəri gangam i witakun mak nin, acine ɗékadi marém. ⁴⁹ Yahai da ngumi da ramma, "Baci wənduwaga, Jaika agai a di gashu zuwak i kun dlugunci se ja dapci na aci na dlamau, gaɗa aca ɗagayi na ja bai" ⁵⁰ Yeso da ramikshi ma "Kwa daptaci bai, gaɗa tike mi a gaba na kun binin, ai kukun." ^{51 53} Yuwan ma Yeso i nye dəsku dengata damtau tin, se acu da ɗawi nye Urrushalima nakat-nakat i gəshigəri. ⁵² Se da wanyi ndawa ɗagai da bənci kəma, dayi ɗa pata larrdi samariya da sapərraci tamke damba akshi da zadai. Amman Yeso zade tənu, ndak ɗagu gənaci bai, gaɗa gəshigəri mana nye Urrushalima. ⁵⁴ Pukurraucingu,Yakubu na Yahai ika kasən tənu, se da jayaci ma, "Məgənyi, kanci ja ɗawe aka da dəsku da kambeci na akshi bi? ⁵⁵ Amman Yeso da məstai da gərnyi aɗakshi, ⁵⁶ da bəncinakshi ɗa pata dama i larrdu. ⁵⁷ Aksha kun rakan i ɗak dəvu tənu, se nən ɗagai da rami Yeso ma, "Na ɗega naci rawanke mi kaya. ⁵⁸ Yeso da ramici ma, Adayau na vək mi kakshi, ɗutatin kun dəsku ke na sakakinshi, amman Wəngənən go-ri səna aɗagəri ngum. ⁵⁹ Se Yes da rami nən ɗagai damaa, ma, "A ɗəgayu." Amman warrau da ramma, "Məgənyi, aivayu dəgo na yi na dabge na afəkga." ⁶⁰ Amman Yeso da ramici ma, "Aivi ndawa mi gamtak da dabgi ndakshi warra mutu. Amman i ci, aji pəɗəm na ri gawa ka dlam wagərrma garva Kakasəku." ⁶¹ Se nən ɗagai wam da ramma, "Naɗəga naci, amman səkur dəgo arr'yi na dlame anya i wənduwa ganai." ⁶² Se Yeso da wurici ma, "Go-nən mi a puɗa zam a pima, dlam kalkal na tife garva Kakasəku."