¹ Se Yeso, ganiyak na nənwa Səku kateu da gadərak Urrdun, se Nənwa Səku dayi na aci kun fanfariya pata, ² i ri warra ləspərr jarraptaci kə yuwan gumu fuɗu, I lakwatu aci ta beaa bai, se maya da jeb na aci i kun daama yuwangu ³ Ləspərr da ramici ma, "Ci wən Səku nin, a ɗayi guguyak təku ba da məscingara i burrodi." ⁴ Se Yeso da wurici ma "Da tarrna, 'Nən a dlaɓu se na burrodu rrugara bai.'" ⁵ Se ləspərr da yi na aci i dəsku jigam ɗagai pəɗəm, da tatkici garvavin duniya mak i kun lakwtu rrap. ⁶ Ləspərrgu da ramici ma, ""Naa bardici kərrmaigu na mayaba na ləmangu gwiɗ, gaɗa cak-cakshi nda bardanai, iyu ke na dəmu du na bardi nəntawanke mi nancu. ⁷ To, ka gutka naci ka dlama nakwana nin, gwiɗ a dlaɓa nakshi kəci." ⁸ Amman Yeso da ngumi da ramici ma, "Da tarrna, 'Ka dlama nakwana se Məgənyi Kakasəku rrugəri, ke ka dlama guzapəna i aci rrugəri.'" ⁹ Se ləsperrgu da yi na Yesogu i Urrushalima, da rri'yi na aci iri mi rəmadi pəɗəm, i dəsku ləma Wənduwa Kakasəku, da ramici ma, "CI Wən Səku nin, a katərri da sau ka vəgi ɗa, ¹⁰ gaɗa da tarrna ma, 'Aci a ɗawa na maleikaucingəri gaɗaci da cərəptici,' ¹¹ ke, 'Akshi a sukta naci dəsku i amikshi, gaɗa kakkəmazəgərci bai i guguyak.'" ¹² Yeso da ngumici, "Da tarrna, 'Ka ɗawa Məgənyi Kakasəkwaci i jarrabta bai.'" ¹³ Ləspərr damu na jarrapta Yeso tənu, se da yingəri daivi na aci lakwtu dama. ¹⁴ Se Yeso da kalakcingəri Galili i kun kərrmi Nənwa Səku, labarrgəri da vaikəngara i rawanke i kun larrdu. ¹⁵ Acu ke da jəb gugza i kun ləmamin ri cacpa yahudaucin, ndiwa mak da sakərrta ci. ¹⁶ Aci da nai i Nazarrat, ɗa warra nda tliɗaci, ke kakə mi aci kawau gafa putu yahudaucin tawanke.Se da təfi kun ləma ri caapau gafa putugu, kakə mi dlamungara aada, aci da tli darr'yi gaɗa da dlam kərratu. ¹⁷ Se nda ɗivareci kakkadi nabi Ishaya. Aci da pərrci kakkadu da bi riwarra nda tarrnu ma, ¹⁸ "Nənwa Məgənyi a ɗaganai, gaɗa aci baranai kərrmai na bari labarr herr i ndak tluwa. Aci wane iyu na dlam kagala bi-aɗa ndiwa mi a dəlo, na rəpci daa dluguyayin, na ta'yi ndiwa warra a guzapəna, ¹⁹ zam na dlam kagala kə zadayi aaman warra Məgənyi aye tatka kunu gayi geri." ²⁰ Se Yeso da yaiɗi na kakkadu, da bardi baci mpiwu da mbashingəri. Nda kun ləma ri cacpa yahudaucingu mak da pədici daa i ɗagəri. ²¹ Se aci da ɓanji dlamekshi rama ma, "Gusku, rama kakkadi Səku təku, wakatəngara da miya ga, na kərrəmtakun." ²² Tike i riwu da dlaɓəngəri saida bee warra aci ramu, se makshi damagarrci aci, a japta zada rama herr warra vərayi da miya gəri. Akshi da jəb jayau ma, "Sutku wən Isubu, ko kasən bai?" ²³ Aci da ramikshi ma, "Katanas, kwa rama da gamzazəgai təku; 'Lakita, a ngaci aɗaci. Bee mak warra ja kəmau ma ka dlamu i Kaparrnahum, a dlam kasən cam i ɗakun ba. ²⁴ "Se da ramikshi wam ma, "Katanas na ramekun, galte go-nabi mi nda gənyi gəri, i kun ɗa warra aci tlau. ²⁵ Amman jirre na ramekun, na gudugwamcin gawa i kun larrdi Isrraila i zaman nabi Iliya, lakwtu mi go-aam harr kə aman kwan na tərra zedu, gaɓshu maya da vəgai i rawanke tənu, ²⁶ Amman nda wana nabi Iliya i ɗa ko gayi da kunakshi bai, amman se i Zarrafat kə Larrdi Sidom rrugara, iri gudugum warra da mbasu a riwu. ²⁷ Zam na agurrdadumamin gawa i kun Isrraila, i zaman nabi Ilisha, amman ko gayi nda ngatu bai, se Na'aman, nən Sirriya rrugəri." ²⁸ Ndawa mi a kun ləma ri cacpa yahudaucin gu kəma bayangu tənu, se makshi da shitənyi nakshi. ²⁹ Akshi da tli , da ji na Yeso i dolle da ɗagu, da yi na aci ɗa miya zəgau warra nda ləmu ɗagu, da maki jəmbula gəri gorrorro. ³⁰ Amman da rakənyingəri da witakshi, da yingəri ri dama. ³¹ Se da yingəri Kaparrnahum, marəm ɗa ɗagai i lardi Galili, da ɓanji gugzekshi i gafa putu yahudaucin. ³² Akshi da jəb ajap i ɗa gugza gəru, gaɗa aca ramau na kərrmai. ³³ I kun ləma ri cacpa yahudaucingu, na nən ɗagai warra na zəwak ləspərr a ravangəri, se da dlam kurwa na wura marəm ma, ³⁴ "Kai! Lambe jan tam na ci, Yeso kə Nazarrat? Kade kambetaja bi? Na zəga na ci--nən Səku mi go-aipu!" ³⁵ Yeso da gərrnyi ɗa zəwakgu, a ramau ma, "A cim miyaci ka vərai naci da kunugəri!" Ləspərrgu karɓuna warrau i gadava ndawa tənu, se da vərai da kunu warrau, ke kimeci təta bai ko rrap. ³⁶ Ndau mak a japtau tlaparr, da jəb rama i ɗau i gatukshi. Aramau ma, "Zada təlalmin tawan kasau? Aci da ɗawi gaɓshu zuwawingu na kərrmai na awayau da vərai nakshi." ³⁷ Se labarrgəri da vaikəngara i rawanke, na bakakin larrdu' ³⁸ Se Yeso daive na kun ləma ri cacpa yahudaucingu da təfingəri kun wənduwa Simon. i lakwtu, saurak Simon gama a sa bone da fəra guvu, akshi da wili Yeso da ngacatu. ³⁹ Se aci darr'yi, da gutki i ɗagara, da ɗawi guvu da ta'yi na atu. Na sukwakuya bai se atu da tli, da ɓanji dlamekshi guzapəna. ⁴⁰ Gərre vəgi afa tənu, se ndawa da jəb ni na tike mi a dagas na zada fəra dama-dama gawa i Yeso. Aci da mpi amigəri i ɗa tawanke, da ngaji na akshi. ⁴¹ Gaɓshu zuwawin ke da vəre da təka ndawa gawa, a ɗanau a ramau ma, "Ci ne Wən Kakasəku!" Yeso da jəb gərrne ɗa gaɓshu zuwawingu da dapci na akshi dlama rama, gaɗa akshu zəgadu ma aci ne Masihu. ⁴² Da tlanungəra tənu, aci da vəri da yinngəri i ri mi go-nen, Ndawa gawa da jeb maka gəri, se da zadai iri mi aca kunu. Akshi da raimici da marci da bəza ɗakshuu bai. ⁴³ Amman se aci da ramikshi ma, "Dolle cam na dlam wazək labarr herr game na garva Səku i ɗa marəmamin jəgap ke, gaɗa sau ne dalil mi Səku wane iyu i ritku." ⁴⁴ Se aci da ci kəma a wazək i kun ləmamin ri cacpa yahudaucin i rawanke i lardi Yahudiya.