¹ Gafo ɗagai nda gənyi arrajo na ndak aipapin jəgap da jəb ni iri Yeso a kərrəmta gəri. ² Parrisaucin na malamcin dumaya mak da jəb ngurrngurr i gatukshi, a ramau ma, "Warrangu men a mbasi ḍagayi na nda aipapin, harr ateḍgayi na akshi." ³ Se Yeso da dlamikshi rama i kun Gagənawa kasau, ⁴ "Warrau tawan da kunakun, aci na təmamkin danamak, se gayi da ḍayingara, aci aiva gumu kuḍkuvuda ayawau kuḍkuvudau bai i kun pata , dan dayi i maka gayi warra ḍayu se aci beu na atu nin? ⁵ Sartu aci bedu nin, aci da sənidu i aḍa gapta gəri da jəb pərrḍai. ⁶ Lakwtu mi aci deu i wənduwa nin, a ḍaurayi mangaucingəri na makapətaucingəri, da ramikshi ma, ''A dlamina pərrḍai na iyu, gaɗa na beu na tumakuga mi ḍayu gu.' ⁷ Na ramekun, harr kasən ke aye dlaɓa na pərɗai tlaparr i kunu dəsku, gaɗa baci aipu warra dlam tubi, rəma na ndak adalta gumu kuɗkuvda ayawau kuɗkuvda warra na fətkən tubi bai. ⁸ Ko amau tawan na ayawa rrəpila guma, se da buki na gayi da kun. , Ata ɓidla pətəle bai, da kashi wənduwa, da dlam maka bəlan, se atu ba gayi gu? ⁹ Sartu mi atu badu nin, a ɗaurayi muyayingara na makəpətatingara, da ramma, 'A dlamina pərrḍai na iyu, gaɗa na beu na ayawa rəpəlaga mi ḍayu gu.' Na ramekun, ¹⁰ harr kasən ke aye dlaɓa na pərɗai i ri maleikawucin Kakasəku, i gaɗa baci aipu gayi mi dlam tubi." ¹¹ Se yeso da ramma, "Warrau ɗagai na mamau gamsak shirin, ¹² gangam gu da rami afəkgəri, ma 'Baaba, a bardanai miya kurak ləman warra dlaɓəngarra kanai.' Se afku da ɓeri na karre gəri i gadavakshi. ¹³ Aku yiwan rrap, se wən gangamgu da cacpi karre mi kəri i ɗagayi, dan dampəna aɗagəri i larrdi ɗaga pəɗəm, da dləmci na dagwdagəri, a masa baya mi aci na go pətkəngu. da təkéna dagwda gəri i ăɗa mbasu vatku. ¹⁴ Aku acu təkuna tamke tənu, se maya gaɓshu da pakai i rawanke i kunu larrdu, se aci da ɓanji kəmu pətkən. ¹⁵ Se dayi da bari na aagri dagwanji i nen agi kə larrdu, da wanyi na aci i kun kamingəri da bari ta i aladadin. ¹⁶ Aci maku da niyi bazhigəri na bəji warra aladadingu a tau, gaɗa go nən mi barici bikta da ci. ¹⁷ Amman lakwtu mi mayimgu kateu i alkalgəri tənu, se da ramma, 'Gabayayin kə dagwanji afəkga, akshi nawan na abən warra da ɗəkza gara, so tai iyu naye mutunga da miya maya! ¹⁸ Na bəza na ritku, nayinga iri afəkga, na ramici ma, 'Baaba, na dlamna aipu i Səku na ci. ¹⁹ Na bata wam bai nda ɗaurayu wənci. a kaci na iyu ka gayi da kunu gabayi dagwanji ci.'' ²⁰ Se mafəndu, daivi na riwu, da ningəri damtu afku. Afku ikaci da pəɗəm tənu, se da kəmi na kanjino geri da jëb na aci. Afku darawi da jəbaci i adla gəri. ²¹ Wəngu da ramici ma, 'Baaba, na dlamna aipu i Səku na ci. Na bata wam bai nda ɗaurayu wənci.' ²² Afku da rami gabayayingəri ma, 'Kaɗe Kaɗe, anna nakacum mi bəlan, kwa ta'yici, zam kwaɗawici kuyu i aikwakgəri, na sono i zəgǝr gəri. ²³ Se kwa nina gawayak abuwan kwa zəji. Wa ci wa dlam ngəmurri. ²⁴ Atərro waci wənganai mutu, amman gusku na arro. Aci ɗayu, gusku nda bau na aci.' Se akshi da ɓanji ngəmurri. ²⁵ Lakwtu ke wǝngəri marəmgu ji kam a təka katayi, Aci zadeu damtu wənduwa tənu, se da kəmi nda ruwa na səwari. ²⁶ Aci da ɗaure gayi da kun gabayayin wənduwau, Da jayaci ma nda tawan wam? ²⁷ Gabayu da ramici ma, 'Gədənci katengəri wənduwa, afəkci da ziji gawayak abuwan, gaɗa katengəri kəlappiya. ²⁸ Wəngu gazgarau da shitinəngəri. da kuri na tife wənduwau. Se afku da vərai da barici miya. ²⁹ Amman gazgara wəngu da ngumi afku ma, 'Aiki! Amananin təku mak na dlameci guzapəna, ngaltena muwa ramaci bai, ko matkam aku ka bara bai, na dlami ngəmurri na mangaucinga, ³⁰ Amman wənci warra ju da təki na ləmanci mak na kəlakawaɗ, ka zəjici abuwa mi ramadi gawayak,' ³¹ Se afku da ramici ma, 'Wənganai, ci fatawanke kaa ɗagayi na iyu, tamke mi kanai ke kəci. ³² Amman ai dlaməngara kalkal i waa, wa dlam ngəmurri na pərrɗai, gaɗa atǝrro yaganaci təku mutəngəri, so gusku aci na arro; ke nda bau na aci.'"