¹ Daku Bayangu, se Meəgənyi da cik'yi ndawa gumu gatkasa wam, da wanyakshi shirin-shrin i ɗa gawa na ri mi aci tuman nye riwu. ² Aci da ramikshi ma, "Tatamgu gawa,amman nda wanau rapɗagai. Gaɗa kasən a jayi Megənyi kamgu da wanyi ndak wana i kun kamgu' ³ Ada! Aikina na wanakun ka tumamkin i wita bədlamamin. ⁴ Amman kwa ma lalitarr bai, ko jaka buwa, ko sono, ke kwa rriɗe dlama ndəma bai i ɗak dəvu. ⁵ Wənduwa tawanke kwa təƒ‌u nin, sekurr a ramina ma, 'Salam Seku da dlaɓe ɗa wənduwa təku.' ⁶ Na baci salam i wənduwau nin, salam kun a fuwe ɗagəri, amman na baci salam binin, salam kun a katayingara i rikun. ⁷ A dlaɓine wənduwau, kwa ci kwa shi bee warra nda barikun, atərro dlaməngarra kalkal baci wana da bi akəri gəri. Kwa jəba yawo i wənduwa dama bai gaɗa ri vəji. ⁸ Ɗa warra kwa təfu tawanke, akshi gən na kun nin, a tina bee tawanke mi nda mpau i kəma kun, ⁹ kwa ngaci ndak fəra mi a riwu ke. Kwa ramikshi ma, Garva Səku dengara i damtu kun.' ¹⁰ Lakwtu tawanke mi kwa təfi ɗa, ndau da kuri na gənya kun nin, ada i aɗak tarbo ɗagu kwa ramma, ¹¹ 'kakə warra kwa kuru gənyaja, kasən ke ja kuru na kun, harr bərrbərr ɗakun mi jəbu zəgər ja ngum ja saspudu, gaɗa da dlaməngara saida i aɗakun. Amman a zəgəna sau:Garva Səku dengara damtau.' ¹² Naremekun, i gafa sharriya, Sodom a bi na 'yale da ɗəki na ɗa təku. ¹³ Wadarre kəm, Korrazin! Wadarre kəm, Batsaida! marəmamin wana mi nda dlami kuna kəm,da nda dlame kun Taya na Sidom nin, da tubatu nakshi tin kaɗe, dari ɗawa dina na mbasu i kun bəbət. ¹⁴ Amman aye ɗəkidu i 'yale, i Ttaaya na Sidom i gafa shariya i aɗa kəm. ¹⁵ Kem Kaparrnahum ke, ka tumangu ndaye saksaktakum i nye desku bi? O, o. Ndaye vərka na kəm fak i hadəs. ¹⁶ Nən warra kərəmtu na kun nin, kərəmtu na iyu. Nən mi kuru na kun nin kurna iyu, ke nən tawanke mi kurna iyu nin kurna baci wanayi ga." ¹⁷ Pukuraucin gumu gatkasau da katai na pərɗai a təka ramau ma, "Məgənyi, harr gaɓshu zuwawin ngum dlamija nakwana i kun dləgunci." ¹⁸ Yeso da ramikshi ma, "Naika ləsperr a vəgayi da dəsku kakə wiɗa. ¹⁹ Aikina, na baridikun kərrmai mi kwa dəmu na takaɗ mbəkɗaɗin, na wərrjajin, harr kwa ta na awayau makurakun mak, ke go bee mi dəmu laruta kun. ²⁰ Dək na kasənu, kwa dlama pərrɗai bai i ɗak sən, ma nénuwawin dlamikun nakwana, amman a dlama pérrɗai gaɗa nda tarrnu na dləgun kun i kun dəsku." ²¹ I kun lakwatu, Yeso dlam pərrɗai tlaparr i kun Nənwa Kakasəku, da ramma, "Na səkarrta ci, Baaba, Məgənyi kə dəsku na ɗa, gaɗa ka dəɓsu na bayangu da miya ndak asəm na zəgaya, ka tatkəna akshi i ndawa mi na gangam zəgaya ka mamau. Auwo, Baaba, Gaɗa sutku ne bee warra rəma dici karak. ²² Afəkga ɗawu daa bee tawanke i aikwaga, go-nən mi zəga Wəngu se Afəkgu, ke go-nən mi zəga Afəkgu se Wəngu, na ndaw warra Wəngu cikɗu da tatki Afəkgu i akshi." ²³ Se da məsci ri pukurraucingu da ramikshi rukshi ma, "Barrka i ndawa mi a lawan bee warra kwa lawangu. ²⁴ Na ramekun, nabaucin gawa na dəgamcin gawa maku daiki bayangu mi warra kwa lawangu, amman akshi ba lawangu bai, da əmi bayangu mi kwa kərrəmtau amman ba kərrəmtau bai." ²⁵ Se so maləm dumaya yahudaucin ɗagai da tli darr'yi gaɗa da kaktli Yeso, se da ramma, "Maləm, tam na dlamau gaɗa na bi gado arro mi go dadəgəri?" ²⁶ Se Yeso da ramici ma, Tam nda tarrnu i kun dumaya? Ka kərratu nana? ²⁷ Se warrau da wuri ma, "A ntuci Məgənyaci na gəshaci cakcak, na arroci, zam a ntuci makəpətci ka aɗaci." ²⁸ Yeso da ramici ma, Ka ramu du kalkal. A dlam kasəgu, ka kaci." ²⁹ Amman maləm dumayau ancu gən na aɗagəri tin se da ramma, "Makapət ga nin tai?" ³⁰ Yeso da wurici na rama ma, "Na warrau ɗagai a ye Yariko da Urrushalima. Se da vəgi ami ndak bəmbəɗa, da gubi na bigəri mak, da dadgaji, daivi naci miya mutu. ³¹ Se so pərris ɗagai ɗəge da dəvu warra nda dlam bəmbəɗa i warrau, aci duguru aci tin, se da gwapəngəri, da nucingəri da baka damaa. ³² Kasən ke Lawi ɗagai de riwu ika warrau tənu, se da bəncingəri da baka dama. ³³ Amman nən Samarriya ɗagai, aye buwa, da zade ri mi warrau a kunu. Aci ika ci tənu, mugurum da jəb na aci. ³⁴ Da nai i ri warrau, se da pi mərak na am inabi i miya matlau da yayiɗidu na bakta. Da mi warau i aɗa dabbagəri dayi na aci ri zədapu magərafcin, da ankaca ci. ³⁵ Ɗatlanu tin, se da mi dagda mi a baci na ankaltagəri kə yiwan shirin, da bari baci wənduwa zədapu magərafcingu, da ramma, 'Ankaltanai aci, na kate nin , na kaci dici miya dagda warra ka səkunu i ɗa warra na barici gu.' ³⁶ Tawan da kun ndawa kwan təku, ka tumangu, aci ne makapət i nən mi vəgi ami nda bəmbəɗa gu? ³⁷ Maləm gu da ramma, "Warrau mi tatkici mugurumgu." Yeso da ramici ma, "Aji ka dlami kasənu." ³⁸ Yeso a kun rakan na pukurraucingeri tənu, se da təfi kun ɗa pata ɗagai. Ama ɗagi mi dləgun Marrta da gənyaci i wənduwa gara. ³⁹ Atuu na yagana midləgun Maryamu, warra mbasi damtu Məgənyi a kərrəmta təlam gəri. ⁴⁰ Amman atu Marrta jəkcingara na wana dlama masana. Atuu da nai i ri Yeso da ramma, "Məgənyi, ka saltu bai yagana bəzu na iyu na təka ɗauzata rruga? Aramitu baa da nai da tambayu." ⁴¹ Amman Məgənyi da ngumi, da ramitu ma, "Marrta, Marrta, ka jəktu nakəm i aɗa bee gawaa, ⁴² amman na be gaitak mi ɗəkadii paida. Marryamu nabai zaɓetu na be mi rəmadii bəlan. warra go-nən mi a dəmu gumbau da rigara."