Suřa 1

1 Ndiwa gawa maku i gəshskshi da tarrnyi bayangu mi wakatu katanas i witaja, 2 kakə mi nda rami ja da miya ndawa mi biwu wakati daakshi, wato muwanaucin sakwtu gu. 3 Iyu ke naika dlamingara bəlan, na tarrnyici bee tawanke kurak-kurak, gaɗa tin səkurr na ɗəgena dalasa bayangu cak-cak, alanguprro baci martapa Tiyopulus. 4 Sutku kasən gaɗa kaa zəgi jirrewa i ɗa tamke warra nda ramici. 5 I zaman Hirridus dəgəm Yahudiya, nda dlam pərris ɗagai , baci dləgun Zakarriya, warra vəre da kun auɗu Pẹrris Abija. Aci zəbe ama da kun auɗu Harruna gamaɗ, mi dləgun Alisabatu. 6 Akshi shirin cam ndak adalta i ri Kakasəku, gaɗa akshi a ɗəga dumaya mak na be tawanke mi Məgənyi ancu, na gəshi gayi. 7 Amman akshi na matkam bai, gaɗa Alisabatu gu duguru,, so akshi ke garunakshi tlapar i lakwtu. 8 Sartu ɗagai, Zakarriya a kəma Səku, a miya wana gəri kə pərris, gaɗa gafo ke, miya wanau vaikengara kə pallakshi. 9 Kakə mi nda kawa cikɗa pərris warra aye dlama wana, se nda cikɗe aci da kun palla pərrisaucin mi aca kunu gaɗa da təfi wənduwa Məgənyi da baki atərrshan. 10 Algi ndawa mak a magita a vəda i lakwtu mi aca baka atərrshan gu. 11 Se maleika Səku da pakai da rrə'yi da baaka bagadi baka atẹrrshangu. 12 Lakwtu mi Zakarriya i ka ci tənu, se da gəraɓi, kalau da jəb na aci. 13 Amman maleikau da ramici ma, "Zakarriya, ka kalwa bai, gaɗa Kakasẹku wuru na magita ci. Amaci Alisabatu aye ɗi ci mayim. Ka ɗaura dləgun gəri Yahai. 14 Ka ye dlama kuno na pərrɗai tlaparr, zam ndawa gawa aye kuno ɗi gəri. 15 Gaɗa aci aye dlaɓa marəm gənən i kəma Məgẹnyi. Aca dlaɓa baci sak səma bai, ko baci sa bee mi a ɗawa kuyo. Nda niya na aci na Nẹnwa Səku tin da kun madu miwu, 16 a katayi na ndak Isrraila gwa i ɗak dəvu Məgənyi Kakasəkwakshi. 17 Aci aye dlama rakan i kəma Məngənyi i kun nənwa na kərrmai Nabi Iliya. Aye dlama kasau gaɗa da məsci gəshi afafkin i gərre kutlatlkinshi, gaɗa nda gauɗak gaɗa da ɗigi dəvu adalta. Da sərmi ndawa mi nda sapərratu gaɗa Məgənyi." 18 Se Zakarriya da rami maleikau ma, "Na zəgi kasu nana? So na garənga, amaga ke garəngara." 19 Maleikau nda ngumici da ramma, "Iyu Jibrrilu, baci rrə'yi kəma Kakasəku. Nda wane iyu na ramici, nandici labarr herr təku. 20 Aiki, ka kaci na ci dakuya, ka dəmu rama bai, se gafa warra bayangu wakatu. A dlaɓa kasau gaɗa ka bar jirrewa na rama warra na rami ci bai, mi aye wakata i kal-kal lakwtu gara. 21 Sarrtu ndawa a dərri Zakarriya tənu, se da jəb ajab gaɗa gawa sukwakuya gəri, i kun Wənduwa Səku gu. 22 Aci vəre tənu, a dəmu dlamekshi rama bai. Akshi da sanucidu ma, acu dlame na lawan i kun Wənduwa Səku. Se aci da jəb dlamekshi rama na aikwak, a dəmu rama na miya bai. 23 Sarrtu warra miya yiwan wana gəri kə lakwtu damungara tənu, se da kacingeri wenduwa geri 24 Da ku yiwan təku, se amagəri Alisabatu da mi na madau, da deɓshi na aɗagara harr tərra vaɗ, da ramma, 25 "Sutku ne bee mi Məgənyi dlama nai, sarrtu mi launayu na kanjino, gaɗa da mi danai bik zhirau, da ri ndawa." 26 Lakwtu Alisabatu a kun tərra ma-zədu na ma madau, se Kakasəku da wanyi maleika Jibrrilu i ɗa ɗagai i kun lardi Galili mi dləgun Nazarrat, 27 i ri dabaku ɗagai, mi dləgun Maryamu, warra Isubu kə auɗu dəgəm Dauda a ɗəgau i patla. 28 Maleikau da nai i ri gara, da ramma, "Nda ndəma kəm, kəm warra ka ba na herr tlaparr! Kakasəku a ɗagayi na kəm." 29 Amman ankal gara tlangara tlaparr i ɗa təlam gəru, se atu da dlam ajap, da ramma, zada ndema tawan kasau. 30 Maleikau da ramitu ma, 'Ka kalwa bai Marryamu, gaɗa ka ba na herr da ri Səku. 31 Aiki, ka ye bi madau, ka 'yawi mayim. Kaye ɗaura dləgun gəri 'Yeso.' 32 Aye dlaɓa marəm, ke, ndaye ɗaura gəri Wən Kakasəku Mulah/baci saksakta. Kakasəku Məgənyi a bardici gwajere garva auɗu Dauda.. 33 Aye dlama garva wənduwa/audu Yakubu harr dəmarro, garva gəri ke a dama bai." 34 Se Maryamu da rami maleikau ma, "Bitku a wakata nana, bee galte na zẹga gəmsək bai?" 35 Se maleikau da ngumitu, da ramma, "Nẹnwa Sẹku aye fuwayi ɗa kəm, kərrmai Səku Mulah ke a cima na kəm. Gaɗa kasən, nən go aipu mi ndaye ɗi gu, nda ɗaurau Wen Kakaseku. 36 Aiki, yagana kem Alisabatu cam na madau mayim i kun garugaragu. Sutku terra gara ke zedu, atu mi nda daura tu duguru. 37 Gada go-bee warra a bedamu i Kakaseku." 38 Se Marryamu da ramma, "To, so iyu gabayi gama ke Megenyi rro. Arr'yi da dlabanai kake mi ka ramu." Se maleikau daivi na atu. 39 Se maryamu da tli kaɗe, i kun yiwangu, da yi ɗa ɗagai, mi a kun guguyayin Yahudiya, 40 təfi kunu wənduwa Zakarriya, da ndəmi Alisabatu. 41 Lakwtu mi Alisabatu kəma ndəma Marryamu tənu, se matkam warra a kunu garagu da dlam katarr, ke nda niyi na Alisabatu na Nənwa Səku. 42 Se atuu da tlatli wura gara na awayau da ram maya, "Mi barka ne kəm i kun amatin, matkam mi a kuna kəm ke baci barka. 43 Gaɗa gəmo wakatu na iyu kasau, harr mi məgənyi ga da nai i ri ga? 44 Aiki, lakwtu mi ndəma kəm təfi agu ga tənu, se matkam mi a kunuga katərri gaɗa pərrɗai. 45 Zam mi barka ne atu, mi barna jirrewa na bayangu, warra nda ramitu alkawarr gu da ri Məgənyi, ma nda niya du." 46 Se Marryamu da ramma, "Arroga a saksakta Məgənyi, 47 nənwa ga ke a pərrɗai na Kakasəku baci ra ga, 48 Gaɗa aci tanu na gabayi gəri gama. Aiki, i kəmangu, zaman tawanke mak, aye ɗaura ganai mi barka. 49 Gaɗa Kakasəku baci kərrmai dlamu danai bik ajap tlaparr, dləgun gəri ke go apu. 50 Kanjənogəri dlaɓungara katanas harr dẹmarro, i ɗa zaman/kəlama tawanke mi a kalu gəri/a dlameci nakwana. 51 Aci tatku kərrmai ami gəri, da wayi na ndawa mi a rrakdlaɗa na kurrarram gəshakshi. 52 Aci wurrtu na nda garva, da gwajerarin garvakshi, se da saksakci na ndawa warra bee wammbai. 53 Ndak maya ke aci da wayi na akshi na bəlalmin bayangu, amman nda bərrəɗ, aci rarka du ami gaɗau 54 Da banaci gabayi gəri Isrraila, gaɗa aci da tanyi da tatki mugurəm, 55 (kakə mi aci rami afafkin ja) i Ibrrahim na kadugumamin gəri harr dəmaro." 56 Marryamu da mbasi ri yaganagara Alisabatu harr damtu tərra kwan, da kugu da kacingara i wənduwa gara. 57 Yiwan mi Alisabatu aye ɗingara dengara tin se da'yawi mayim. 58 Makapətatin na yaganaucingara kəma ma Məgənyi tatku na mugurum geri tlaparr i Alisabatu, se akshi da jəb dlama pərdai atu. 59 Gafa yiwan danda-fudu na di mayingu dengara tenu, akshi da nai i wuda mayingu, Askhi maku da mpici dlegun ma "Zakariya;" cubena afekgeri. 60 Amman miwu da ramma, "O,o. Ndaye daura geri Yahai." 61 Se akshi da ramitu ma, "Go nen warra a kun yaganaucin kun mi nda daurau na dlegun teku." 62 Se akshi da dlam rama i afku na amai, nda jaya ci dlegun warra aci anci nda dauri mayim gu na atu. 63 Afku da jayi bi tarran, da tarrnyi ma, "Dlegun geri Yahai." Akshi mak da jeb ajap i da biyu. 64 Na tasena bai se Seku da repci na miya geri da fetki na marrnyu. Aci da banji rama a saksakta Kakaseku. 65 Ndawa mi da mbasu a damtukshi mak, da kalwi nakshi Kakaseku warra dlam bitku i Zakariya. Labarr bayangu mak da vaikingare lardi guguyayin Yahudiya. 66 Ndawa mi kema mak, da mpi di geshakshi, da jeb ramau ma, "Zada marem genen tawan mayim teku aye dlaba?" Gada aikwak Megenyi a da geri. 67 Nenwa Seku da niyi na afek geri Zakariya, da dlam anapci, maya, 68 "Sarkerta i Megenyi, Kakasəku Isrraila, gaɗa aci deu da dlam bana, ke damu na wana kə dləgda ndagəri, 69 Aci waneu diwa baci ra, warra na kərrmai tlaparr kə ra, da wənduwa gabayi gəri Dauda, wato da kun auɗu Dauda zədai gəri, 70 kakə mi Kakasəku ramu, da miya nabaucingəri mi ga aipu tin zaman waci. 71 Acaye ni diwa ra, da ri makuraucinwa na nda gaba na wa. 72 Aca dlama kasau gaɗa da tatki kanjino i afafkinwa Ibrrahim, ke da tanyi ardiya gəri mi goaipu, 73 yinɗa warra aci ramu i afəkwa Ibrahim, 74 ta yinɗa bəza nawa, wa dlamici nakwana go-kalau, aku nda ra na wa da ami makuraucinwa, 75 wa dlaɓi go aipu i kun adalta i kema geri, i kun mbasawa mak, 76 Auwo, mayim təku ke, ndaye ɗauraci nabi kə Kakasəku Mulah, gaɗa ka ye nute jampel Məgənyi, ka sapərraci ndiwa gaɗa ni gəri, 77 ka parrakci dəvu ra i ndiwa, da ri tupta aipapinshi. 78 Sutku aye wakata ne gaɗa gawa kanjino Kakasəkwawa, gaɗa ɓidla da dəsku a ni, da bariwa bana da ri Səku, 79 da bari ɓidla i ndawa mi da mbasu i kun aiwakwina, na nənwa mutu. Aca ye dlama sau da tatkiwa dəvu salam." 80 Mayingu da rawi da dlamingeri na awayau i kun Nenwa Seku, da mbasu a pata harr lakwtu mi aci bandu wazek i ndak Isrraila.