¹ To, i lakwtu dǝgǝm Hirdus jǝb na ndau jǝgab wara ndak nya i Coci, gada da barik shi kabine. ² Tǝkina Yakubu yagana Yahai na kasakar. ³ A ci i ka yahudaucin a pǝrdai na be aci dlamu tunu, se dayi da jebena Bitrus wam. sutuku gu lakwtu ngemuri ke burodi mi go yist. ⁴ Aku a ci jǝbna Bitrus, dayina a ci delo da bari na a ci aikok askarabaucin da ankaltaci; a tuman nina a ci kǝma ndawa aku ngǝmuri paska. ⁵ Nda cǝmna Bitrus i delo, amman ndatka magita aɗau i Kakasǝku gaɗa gǝri i kun Coci. ⁶ Yǝwan kapǝn Hiridus aye dayi gǝri vida, i kun diviɗ gu Bitrus a yǝwan da vǝji a gadava askarabaucin shirin, da tausina dangwal ke waya shirin. Ndak demi gǝri shirin dar'i a miya mafgi delo gu. ⁷ Se so malaika go tasǝna da pakai i ri gǝri, se wiɗa da beli parak i sǝsau gu. Acu da lǝnci Bitrus da baka gǝri, da tlatla ci da yǝwan, da ramma, "Atlu kadǝ-kadǝ" se dangwal wayau da pǝnakshi da aikok gǝri. ⁸ Malaikau da rammi ma, "Aɗawu kare ci na tanke lapet i zǝgǝr ci" Bitrus da dlam kasǝn. malaikaucin da rami ci ma, "A ɗawina marǝm zanai ci ka dǝgai iyu." ⁹ Se Bitrus da dǝge malaikau da vǝrai nakshi vǝda. A ci zǝga ma be wara malaikau dlamu gu jire. A ca tuman be wara aci a lawangu ka sǝwan. ¹⁰ Aku akshi bǝntuna baci ankalta gǝri ke sǝkur na ke ma shirin gu se akshi da nai i miya mafgi ki ɗuyak wara a di nakshi i kun ɗa gu: miya mafgu da rǝpci na aɗagara. Akshi da vǝri veɗa i tarbo ɗa gu, mailakau daivina aci riwu. ¹¹ Lakwtu Bitrus kate ankal gǝri tunu, se da ramma, "Gususku ke jirewa Kakasǝku wane malaika gǝri da rayu da aikok Hiridus, na da mǝradi ke Yahudaucin." ¹² Daku a ci sanutu sutku tunu, se danai i wǝnduwa Marryamu, mi Yahai wara nda daura gǝri Markus; Ndak dǝga Yeso cacpu nakshi riwu a magita. ¹³ Lakwtu a ci gwaktlu miya mafgu tunu, se wunya dagai mi dlugun Rohda danai dauri ci. ¹⁴ Lakwtu atu sanutu warau ka Bitrus tunu, gaɗa thparr kuno dǝma rǝpta miya mafgu bai, se dayin gara na rawa i sǝsau wara ndau a kunu; da ramikshi ma Bitrus dar'i a miya mafgi. ¹⁵ Ka kun ankal kǝm kuwa, "Amman wunyau da ramikshi nakad-nakad ma be mi ata ramǝkeshi gu kasunu. se akshi da ramma, "Malaika gǝri." ¹⁶ Bitrus da jeb gwagdla miya mafgu, akshi de rǝptu miya mafgu tunu, se dai ki a ci, akshi sukci aikok gǝri da tatkikshi ma akshi da dlama rama bai, se aci ramikshi kake mi Kakasǝku de aci da dǝlo . Aci da ramma, "Awana labar betuku mak i Yakubu na yagaucin ndak iman." Se daivina riwu, dayin gǝri ri dama. ¹⁸ Ɗa gu tlanu tunu, be wakati Bitrus da jǝktina askarabaucin gu har ankal shi da thlan gara. ¹⁹ Aku Hiridus dawu nda makaci, nda ba ci bitunu, se da jayi ndak ankalta gǝri da ram wam ma nda tǝkǝ na akshi. Se Bitrus da tli da Judiya dayi Kaisariya dambasǝn gǝri riwu. ²⁰ Hiridus dlamin gǝri gǝshi tlaparr na ndak Taya na Sidon. Akshi dayi aɗagayi i ri gǝri. Da wili Bilasta, muwawak dǝgǝm gu, ma da banatakshi. Akshi da make mbasǝk Kilapiya; gaɗa lardakshi a gǝni bik ta da lardi dǝgǝm gu. ²¹ Gafo gu Hiridus da tefen gǝri kachum garva, dan mbasǝn gǝri da gwajerek garva da dlamikshi rama. ²² Ndau kǝma tunu se da dlam kurwa ma, "Sutku wura sǝ Kakasǝku beri wura nǝngaiwa bai." ²³ Na tasǝna bai malaika mǝgǝnyi dakka ci gaɗa bari saksakta i Kakasǝku bai, tǝntok da tǝna aci riwu damcin gǝri. ²⁴ Amman tǝlam Kakasǝku se sukuna. ²⁵ Barnabas na Shawulu da muna wanakshi tunu i Urshalima, da kacinakshi dasǝn; aɗa gayi na Yahai wara da daurau Markus cam.