¹ Mawanaucin na yaganaucin wara ndak iman ke Yahudiya da kǝma ma ndawa wara zǝga Sǝku bai gǝnna telam Kakasku. ² Lakwtu Bitrus deu Urshalima tunu, ndak imman na Yeso wara yahudaucin da jǝb dlama bayibako gǝri. ³ Akshi da ramma, "Ka nepki adaci na ndawa zǝga Sǝku bai hara kata ta na akshi!" ⁴ Bitrus da ɓanji pasaltekshi kurak-kurak ma, ⁵ Na kunu magita a marǝm ɗa ke Joppa. Se na ki i kun suwan marǝm daɓǝr tufeu da dǝsku nda, da perci kǝmau. ⁶ Na pi da naiki na dlam kuraram i ɗau. Naika fayuri ndak fuɗu, ke duniya, fayin kǝ pata, fayin ndak vaga tekakshi na dutatin ke dǝsku. ⁷ Se nekǝmi wura da dǝsku a rama ma, "Atlu Bitrus atki ka ki'yi!" ⁸ Na wuri ma, Kasǝn bai, mǝgǝnyi: Gaɗa ngalte tlewi fayin vatku tuku tefi miya gabai." ⁹ Amman wurau da wura da dǝsku ma, "Be wara kakasǝku ramdu ma cikas nin, ka rama bai ma bewu cikas bai" ¹⁰ Bitku wakatu zǝgǝr kwan, se nda mina be tanke mi naika gu i dǝsku wam. ¹¹ Na tasena bai , se so ndawa kwan dar'i a miya mafgi wǝnduwa wara aca kunu nda waneshi i riga da kaisariya. ¹² Nǝnwa Sǝku rama nayi na akshi; ma na dlama nyanyakshi bai. Ndawa zǝdu tuku, dayi na iyu ja yi wǝnduwa warau. ¹³ Daramija aci ika malaika Kakasǝku dar'i a wunduwa gǝri, mi ramici ma, "A wanyi ndawa i Joppa kani na Siman wara nda daura gǝri Bitrus. ¹⁴ Sautu mi acaye ramau ani na rra i ci na ndak wǝnduwa. ¹⁵ Lakwtu na ɓandikshi rama tunu se Nǝnwa Sǝku da nai i aɗakshi kake wara deu adawa ke sǝkur. ¹⁶ Se na tanuna telam mǝgǝnyi wara ramu ma, "Yahai dlamikun baptisma i jirewa, na am, amma ndaye dlamekun ikun Nǝnwa Sǝku" ¹⁷ To, Kakasǝku baridikshi kǝrmai Nǝnwa Sǝku kake wara aci bariwa lakwtu wa dlam iman na Mǝgǝnyi Yeso Masihu, tai wara a dlam gamdaya na Kakasku?" ¹⁸ Akshi kǝma bitku tunu, da dlam rama wam bai, se akshi da banji saksakta Kakasǝku, a ramau ma, "So Kakasǝku barina tubi i ndawa zǝga Sǝku bai cam." ¹⁹ I lakwtu ndawa wara wayu nakshi gaɗa kabine mi bakshi aku mutu Istifanus, har i lardi Prisiya, Sapirus, na Antakiya amman akshi a rama sautu ke Yeso gu yahudaucin rukshi. ²⁰ Amman gafkikshi, gamsak ɗa Saprrus, na Sirine da nai ɗa Antakiya, da rami da helenanci labar herr ke Mǝgǝnyi Yeso. Kǝrmai Mǝgǝnyi aɗa gayi na akshi tlapar; ndawa da dlam iman na Yeso, da katai nakshi iri Mǝgǝnyi. ²² Labarshi danin gara i aguɗ ndak dǝga Yeso ke Urshlima, se akshi da wanyi Barnabas har dayi Antakiya. ²³ A ci deu ika kǝrmai Kakasku tunu, se da dlam perdai, da dauzatakshi, ma akshi dan mbashi nakshi na Mǝgǝnyi na gǝshakshi mak. ²⁴ Gaɗa a ci nen herr, kuma ganiyak na Nǝnwa Sǝku na iman; ndawa wara dlam iman na Yesu, da sukuni gawa. ²⁵ Barnabas da tli dayi Tasus i maka shawulu. ²⁶ Banaci tunu ndanna aci Antakiya. Nda ritunu har aman gayi, akshi a cacpa aɗa gayi i coci, a gugza i ndawa gawa. Pakuraucin gu nda bandi daurakshi ma kirista sukur i Antakiya. ²⁷ Se so ikun yǝwangu, na nabaucin dagai wara deu da Urshalima da Antakiya. ²⁸ Gayi da kunakshi, baci dlugun, Agabus, da tli dar'i da tattki darik Nǝnwa Sǝku ma, ndaye dlam marem lamlam i duniya mak. Sutku wakatu lakwtu garvak kilariyus. ²⁹ Gada kasǝn, pakuraucin gu nǝn tawanke da kunakshi, dami gǝshakshi da wanyi bana i ndak dǝga yaganaucin ki Yahudiya. ³⁰ Akshi dlam sau, da wa'anyi dagwda i ndawa gasgaraucin ki coci gu da akwu gǝn Barnabas na Shawulu.