¹ I dama, yaganaucin, ja ɗagwaita kun na gabaɗ i kun Məgənyi Yeso. Kakə mi kwa gugzu dari ja iiɗak mi dolle kwa dlam rakan bəlan kə ntu Səku, kuru iɗa duvu wara kwa dlamak rakan kun kasən, se kwa dlam kasən ii kunuk jirewa. ² Gaɗa kwa zəgana gugza wara ja dlami kun dari Məgəngyi Yeso. ³ Atəro sutku ntuk Səku, a dlamina mbasa kun go aipu, kwa dlaɓa ii kunuk tapi bai, ⁴ maya tike dazigi jəba aɗa gəri ii kunu aipu bai na saksakta ke. ⁵ Kwa dlaɓa nda mangarta bai (kakə kərdaucin wara zəga Səku bai). ⁶ Nən wam da ta aman yagana gəri bai iɗak bitku. Atəro Məgənyi baci ngumau ii aɗak tanke, kakə mi ja gabɗi kun waci kuru ja saidatədu. ⁷ Atəro Səku ɗauri wa ii bik ɓəne bai, amman gaɗa wa dlaɓ go aipu. ⁸ Gaɗa kasən, nən tawanke wara kuru sutku nən kuru nəngaiwa bai, amman kuru Səku wara bari kun Nənuwa gəri mi go aipu. ⁹ Iiɗa ntuk yaganaucin, kun na jəgtu gaɗa ɗagai da tarnyi kun wam bai, atəro kun na aɗa kun Səku gugzi dikun ntuk yaganaucin. ¹⁰ Taɓas, kwa dlmina sau ii yaganaucin mak wara aa kunu Makidoniya chakchak. Amman jaa ɗauzata kun yaganaucin, a dlamina kasau tlapar. ¹¹ Zam jaa ɗauzata kun wam kwa dlam mbasa kun bəlan, ampina ankal kun iiaɗak be mi kwaa dlamau, a dlamina wana na aikwak kun ke, kakə wara ja ɗawu kun, ¹² gaɗa kwa dlam rakan kun kalkal iirik ndawa wara aa ɗəga bai gaɗa kwa dlaɓa na jəkta ɗagi bai. ¹³ Jan cu kwa buka sanuta bai, yaganaucin, ii aɗak ndiwa wara bakotu nakshi, gaaɗa kwaa dlaɓa na dləməɗ aro bai kakə ndawa wara na taɓas be wara a wakata ii kəmangu bai. ¹⁴ Atəro waa dlama iman iiɗak Yeso mutu kuru da tlən gəri wam nən, kasau ke Səku a tlatlə na ndiwa wara dlamna yuwan ii kunu Yeso iiɗa gayi na aci. ¹⁵ A təro ja rame kun sutku darik rama Məgənyi, mi ramu maa wa wara na aaro, wa mi ndaivuna wa harr katayi Məgənyi, taɓas waa wurma ndawa wara bakotu ii kunu iman bai. ¹⁶ Atəro Məgənyi na aɗa gəri a fuwayi da dəsku. Aci aani na gərən, na wura marəm Maleka, na adər makəm kə Səku, se ndawa wara mutu ii kunu Masipu a ɓanda na tlayi. ¹⁷ Se wa wara na aro, wara ndaɓzu wa, wa tlayi wa ndagəmə iiaɗa gayi na akshi ii kunu kəraɓak wa damə ri Məgənyi ii kunu zuwak. Ka sən wa dlaɓa fatawanke aaɗa gayi na Məgənyi. ¹⁸ Gaɗa kasən, a dagwaitina aɗa kun na rama tuku.