¹ Atəro kun na aɗa kun kwa zəgadu, yaganaucin, ni ja iri kun kə vatku bai. ² Kwa zəgana bone wara ja sau, kuru nda zhərwi ja ii Filibi. Ja na awayau gəzhi ii kunu Səku gaɗa dlamak rama labar herr kə Səku na ravan tlapar. ³ Gaɗa gabaɗ mi ja dlami kun kə gabshu bai, ko ii kunu buka aipu, ii kunu babata ke bai. ⁴ Sərən sutku, kakə mi Səku kasaktən gəri na ja da bari ja aman ki labar herr, ja ramdu kasən ke. Ja ramu gaɗa ndiwa da kəmi karak bai amman gaɗa Səku da kəmi karak gu. Gaɗa aci ne a kaktla gəzha ja. ⁵ Ngalte ja dlami kun miya karak bai, ka kə mi kwa zəgau, ko kalɓe da ɗəbsa, atɵro saida ja nən Səku. ⁶ Ja makə gədləɓ da ri kun ko ri ndawa dama bai. Daa janci nən da ja kəma karak dlaɓa mawanaucin Masipu. ⁷ Amman, ja dlaɓə naja nda ankal ii wita kun kakə wara mai a zəma kutli gara. ⁸ Gaɗa kasau ja ntutə kun. Ja kəmu karak rame kun labar herr kə Səku rugara bai amman na aaro ja cam. Atəro kwa dlaɓə na kun bik ntuta iiri ja. ⁹ A tanina, yaganaucin, wana na dagwanji wara ja dlamau. Dəviɗ na afa ja wana gaɗa ja jekta kun bai. Lakwtu mi ja dlame kun wazək labar herr kə Səku. ¹⁰ Kun saida, Səku ke kasən, kakə mbasa ja mi go aipu, na kə adalta, na bik nyu bai ii rikun wara kwa dlam iman. ¹¹ Kasən ke, kwa zəgana gabaɗ mi ja dlami tike na tike kun kakə mi afək a dlame gutlai gəri, ¹² jaa bari kun kanadi ja ɗauzata kun ke gaɗa kwa dlam rakan ii dəvu bəlan ki Səku, wara dauri kun i garva gəri na kərmai gəri. ¹³ Gaɗa kasən zam jaa sanbarkata Səku fatawanke. Atəro kwa gənu saktu Səku darija mi kwa kəmau, kwa gəndu kakə rama gə nən bai, amman, kwa gənu gaɗa jirewa gara, wato ramak Səku. Rama tuku ro atu ne aa wana ii wita kun ndak bari jirewa. ¹⁴ Kun ro, yaganaucin, kwa dlaɓə nakun nda gugza iklisiyayin Səku wara a Yahudiya ii kunu Masipu Yeso. Atəro kun cam kwa sa bone dari ndak larda kun, kakə mi akshi ke sau ii aikwak Yahudaucin. ¹⁵ Atəro təki Yeso Məgənyi na nabaucin nən Yahudaucin gu. Atəro rarka ja nən Yahudaucin gu. Akshi paraktu gəshi Səku bai. Amman akshi na hal kə kuri ndawa mak. ¹⁶ Zam akshi dabtədi ja rama na kərdaucin gaɗa akshi daba rra bai. Gaɗa sən fatawanke akshi ganiyak na aipu. Dakəne-kəne afuwayi ii aɗakshi ii dadəgərik zaman. ¹⁷ Nda ɓərə na ja da kuna kun yaganaucin, kə lakwtu rap, ii kunu təka baya ii kunu gəzhi bai. Ja ɗawu aɗa tlapar, na kuno, jani jaikə jampel kun. ¹⁸ Ja ntutu ni iiri kun, I'u Bulus, zəgər gayi bai, amman lispər rotəna ja. ¹⁹ Mpik aaro ja nən tam ii kəma, ko pərdai, ko aryapu kkəma aadla ii kəma Yeso Məgənyi ii gafa ni gəri? Kun bi ko, na kakənai ndawa? ²⁰ Atəro kərmai ja na pərɗai ja nən kun.