1
شیش روز بعد، عیسی، پطرس و یعقوب و گُوش یوحنان گِرِه و وا خُوش سَر بلندی یَ کُوهیِ وِ خلوت بُرد.
2
هامُوچُو، جلو هامونو ،رنگ ریش عِوَض وُوی :صورَتِش مث اَفتُو ایدِرَخشِست، وُ لَواساش مثل نوری، سفید وُویِن.
3
مین هَمی موقع موسی و ایلیا جلو تیا اونو ظاهر وُویِن، و واعیسی هِی صحبت ایکِردِن.
4
پطرس وِ عیسی گُو: ای سَروَرم، بیَنِ ایما ایچو خُوه. اَیَربُخُوی ،سه تا کِپَر بسازیم ،یِکی سی تو، یِکی سی موسی و یِکی سی ایلیا.
5
هَنی حرف پطرس مین دونِش بی که یَه آورِ دِرَخشونی اِوِی دُورِشون گِرِد، و صدایی اِزِش اِوِی که گُو: یُونِه کُر عزیزمو که اِزِش راضیُم؛ گُوشِش بِگرین.
6
وا شِنیَن ای صدا شاگِرداش خیلی تَرسِستِن، وُ وِ رِی سَرزِمین وَستن.
7
اما عیسی نِزیکِشون وُوی، و دست ناهاد سَرِشون وگُو: ویریستین و نترسین.
8
وقتی تیاشون واز کِردِن ،دی هیچکسِن بِغیر عیسی نِیدِن.
9
وقتی اِز کُوه هِی اِوِیدِن دوِن، عیسی اُونون امر کرد:هَرچی دِیدین سی کسی وازگو نَکُنین ،تا زمانی که پسر انسان اِز مُردیَل ویریستِه.
10
شاگِرداش اِزِش پُرسیِن: سی چه عُلَما دین ایگُون که اول ایلیا وا بیاهِه؟
11
جُواو دا : البته که، ایلیا ایاهِه و همه چینَم اصلاح ایکُنِه.
12
اما وِ ایشا ایگُوم که ایلیا اِوِی، اما هُون نَشناختِن و هرچی خواستِن واش کِردِن .هامُو طُورَم پسر انسان وِ دَستِشون آزار ایبینِه.
13
اوسو شاگِرداش فَهمیِن که دربارهء یحیی غُسل دهنده هِی گَپ اِیزِنه.
14
تا وَرگَشتِن تِی جِماعت، یَه میرِه ای اِوِی نِزیک عیسی و جِلُوش زُونی زِی و گُو:
15
سَروَرُم،وِ کُرُم رحم کن. تَشَنُج داره و خیلی عِذاو ایکِشِه .بیشتر وقتا ایبوفتِه مین تَش و آو.
16
هُون اِوِردُم تِی شاگردات، اما نَتِرستِن شِفاش بِِن.
17
عیسی مین جُواوِش گُو: ای نسل کَم اِیمون و اِز رَه وَرگَشتِه، تا و کِی واتون بُووم وتحملِتون بُکُنُم؟ هُن بیارین تی مو.
18
عیسی وِ دیو نِهیو زی، وُ دیو اِز کُر زی وِ در و هامو لَحظه کُر شفا پیدا کِرد.
19
اوسو شاگردا اِوِیِن تِی عیسی وُ مین خَلوَت وِش پُرسیِن: سی چه ایما نَتِرستیم اُو دیوُن وِ در کنیم؟
20
جُواو دا :چینوکه ایمونِتون کَمِه .آمین ،وِ ایشا ایگُوم، اَیَر وِ اندازه یَه دونه خَردلی ایمون داشته بویین ،ایتِرین وِ اِی کُوهُ بُگُوین اِز ایچو جاوِجا وُوه وُ جاوِجا ایووه و هیچ خواسته ای سی ایشا غیر ممکن نی.
21
اما این جنسُو بغِیر وزه و دعا وِ دَر نیرَه.
22
موقعی که مین جلیل دورِ یَک جمع وُویِن عیسی وِشون گُو: پسر انسان، وِ دست مردم تسلیم کرده ایبو.
23
اونو هُون ایکُشِن و هُو مین روز سوم ایویریسته، و شاگرداش خیلی ناراحت وُویِن.
24
بعد هُو عیسی و شاگرداش و کفرناحوم رِسیِن، مأمور مالیات دو درهم ،اِوِیِن تِی پطرس وِش گُون: استاد ایشا هم مالیات معبدن ایِه؟
25
هُو هَم جُواو دا :البته که ایِه ! تا پطرس رِسی هُونِه، قبل اِز ایکه حرفی بِزِنه، عیسی وِش گُو: شمعون پادشاها جهان، اِز چه کسایی باج و خراج اِیستونِن؟ اِز بَچیَل خوشون یا اِزاَجنِوییَل؟ چه ایگُوی؟
26
پطرس جُواو دا :اِز اَجنویَل عیسی وِش گُو: پَ بَچیَل مُعافِن!
27
اما وِ خاطر ای که نَرَنجونیمِشون بِرُو بال آو وُ قِلاوِ بِه . اوّلین ماهی که گِرِدی، حلقِش واز کن .سکه چهار درهمی ایجوری. وا هو سهم خُوم و خوتِن بِدِشون.