¹ عیسی سُوار کشتی وُوی، رَه اووَر آو مین شهر خوش. ² هَموسو یه میره فلجی که سَر دُشک خُو بی، اِوردِن تِیش عیسی که ایمون اُونون دی، وِشون گُو دلِت قوی بُکن فرزندم که گناهونِت بخشیه وُویِن. ⁴ اوسو عالما دینی وِ یَک گُون، ای میرهُ کُرف ایگو. ³ عیسی فَهمی چه فکری ایکُنِن، وِشون گُو سی چه ای فکرا پلیدون ایکُنین؟ ⁵ گُودَن کویِکی بهتره، یُو که گناهات بخشیه وُویِن یا یُوکه ویری رَه بِرُو؟ ⁶ حالا بِدونین پسر انسان ری زمین قدرت بخشیَن گناهان داره وِ افلیج گُو ویری دُشَکِت وَردار، بِرُو هُونَتون. اُوسو اُو میرِهُ ویریستا رَه هُونَش! ⁷ اُو میرهُ ویریستا رَه هونَش. ⁸ مردم که هِی سِیل ایکِردِن چه خِوَر وُوی، تَرسِستِن و خدایی که ای قدرتُون داده، وِ انسان شُکر کِردِن. ⁹ عیسی که اِز اوچوهِی ایرَه، میره این دی وِ اسم متی که سَر رَه نشسته بی وِش گُو: دیندا مُو بیُو. هُو هم ویریستا، وَست وِ دینداش. ¹⁰ یَه روز عیسی مین هُونه متی سَر سُرفه نشسته بی که خیلی اِز خِراج گیر و گنه کارا اِوِین، وا هُو و شاگرداش نشستِن سَر یَه سُرفه. ¹¹ فریسیان که اونُون دیِن، وِ شاگرداش گُون سی چه استاد ایشا وا خراجگیرا و گنه کارا غذا ایخوره؟ ¹² وقتی وِ گوش عیسی رِسی، گُو: مریضا طِویو ایخُون، نه سالما. ¹³ بِرین بِفهمین، ای کلامی که گُودِه چِنه که رحمتش ایپسندُم نه قربونی، چونکه مو نَوِیُومِه تا خداپرستان دعوت کُنُم، اِوِیُومِه سی گنه کارا. ¹⁴ شاگردا یحیی اِوِین تِی عیسی، وِش گُون سی چه ایما وا فریسیان روزه ایگِریم، اما شاگردا تو نیگِرِن؟ ¹⁵ عیسی وِشون گُو مَر اییُوه مهمونا عروسی، تا وقتی دوماد وا باشونه عزاداری بُکنِن؟ اما یَه روزی ایاهه که دوماد اِزشون گِرِده اییُوه، اوسو روزه ایگِرِن. ¹⁶ هیچکی پارچه نون وِ لَواس کهنه وصله نیکُنه چونکه وصله کَنده اییُوه اوسو بدتر پاره اییُوه. ¹⁷ شِراو تازَه ن مین مَشک کهنه نیریزِنچونکه مَشک ایپُوکه، وِ شِراو ایریسِه و مشکَم پاره اییُوه. شِراو تازَه ن مین مَشک نو ایریزِن تا هردوتا سالم بِمَنِن. ¹⁸ هَموسو که ای حرفان عیسی وِشون ایزِی یکی رِئیساشون اِوِی نِشست جلو پاش، و گُو دُوَرُم هَمی حالا مُرد وا ای حال بیُو دَستِت بِنِه سَرِش که زنده ایبُوه. ¹⁹ عیسی ویریستا ،وا شاگِرداش واش رَه. ²⁰ مین هَمو رَدَن یَه زینه ای که دوازده سال خین ریزی داشت، اِز پشت سَر وِ عیسی نزدیک وُویی و دست زِی وِ لِواسِش. ²¹ هُو تِی خوش گُو، اَیَر حتی وِ لِواسِشَم دَست بِزِنُم شفا پیدا ایکُنُوم. ²² عیسی وَرگَشت دِیِش و وِش گُو دِلت قوی بُکُن ،که ایمُونِت تُون شفا دا اِز هَمُوساعت زینه شفا پیدا کِرد. ²³ وقتی عیسی رَه مین هَمُو هُونه، و دی همه هِی سُروو ایخونِن. ²⁴ دستور دا بِرین سَرا دُوَر فقط خُووه، نَمُرده اما اُونو وِش خَندِستِن. ²⁶ وقتی مَردُمِن کِرد سَرا عیسی رَه داخل دست دُوَرِن گِرِه و دُوَر ویریستا. ²⁵ خِوَر ای اتفاق مین کُل منطقه پیچِست. ²⁷ وقتی عیسی اِز او مکان رَه، دوتا میره کور وَستِن وِ دینداش جار ایزِیِن وُی کُرِ داوود، وِ ایما رَحم کُن. ²⁸ تا رَه هُونه اودوتا میرهُ رَن تِیش عیسی وِشون گُو ایمون دارین که ایتِرُوم ای کارُن اَنجوم بُوم؟ وِشون گُون ها سَروَرمون. ²⁹ بعدش عیسی دست نا قَد تیاشون، و گُو اَیَر ایمون دارین تیاتون وازوون. ³⁰ هَموسو تیاشون واز وُوی عیسی وِشون هُشدار دا گُو هیچکس خِوَردار نَوُوِه. ³¹ اما اُونُو تا رَدِن، همه جان خِوَردار کِردِن. ³² هَمُوسُو که اونو هِی ایرَدِن یَه میِرِهُ ای که دیو زِهدِه بی و لال وُوی بی اِوِردِن تِی عیسی. ³³ تا عیسی او دیوُن کِرد سَرا، زِوُون میرِه واز وُوی مَردُم حیرت کِردِن که تاحالا چونو چی مین اسرائیل دیده نَوُویه. ³⁴ اما فریسیان گُودِن هُو دیوان وِ کمک رئیس دیوا، ایکُنه سَرا. ³⁵ عیسی مین همه شهرا و دِهاتا ایگَشت مین عبادتگاهاشون درس ایدا، و درد و مریضیان شفا ایدا. ³⁶ وقتی جمعیتن دی، دِلِش سُو چونکه مثل گوسفندا بی چوپون پَریشون و دَرمونده بیِن. ³⁷ وِ شاگرداش گُو مَحصول زیاده اما کارگَرا کَمِن. ³⁸ اِز صاحاو محصول بُخُوین کارگر سی دِرُو محصول خوش بفرسته.